NAHUM 2 - Sumi Naga CL (Re-edited) Bible (BSI)

Nineveh Kütsave

¹ O haleveni kemi ye ighivae. Aghukhe-a lo ngoluve lo; alaghi khekuto lo; aghü shinike aghili kutolulo; o kumto kümtsü pephelo.

² Kughengu Ampeu no Israel kükanguagha toi keu Jacob kükanguagha tsüchile ani, kughengu küpkami no panongu xulepuwuve eno pano lokaqo kütsave tsüe.

³ Akughushumi züto ye huchuyi; ghüshimi no hughüi keu phimini pepu ani. Pa no panoqo kuloquke tsalani khurkulu ngo cypress ngupa no kulo phaphashi ighi.

⁴ Khurkuluqo no alaghi lo mqhumza kuhapo, alapaqo lo mtazü pohu powo; tipaqo ye akuluqhe toi iqü; tsütsüpha toi mthüthei ke.

⁵ Pa no paw hiyampemi kümsülu; panongu no chewu kelo küpxalu, panongu no mtazü aliwo lo wu; eno aqoghe shiqhe puku.

⁶ Aghoki khaghoqo khaqhivae; kükaki ye pitikümlavae;

⁷ tile alojiliu ye aphikümsa shive no xapu wuvae, li qelimi no mloqa ani, miqhedu toi mlo ani eno pano mla kukhu ani.

⁸ Nineveh ye ayizükucho lakhi azü qowuve keu toivae. “Ngovelo! Ngovelo!” ipi ighamku, ikemu khunomu ide ighimoe.

⁹ Ghükayi xulepuwu lo, ameshoyi xulepuwu lo! Küakini momu akughupu thime akeqo ye ashekha küha anie.

¹⁰ Pighivae! Küghüküghalei eno kütsalevae! Amlo hau, akhonhe khokhoshi; aphi kümtsü amloghuju likhi; kümtsü no agi phalaivae!

¹¹ Abongshuu ki eno abongshuu lhotheqo loji chekeu-a khilave akea? Abongshuu atsü eno aqu no achekeu, khunomu patiqo pünaqhi mono acheke.

¹² Abongshuu no patiqo sala lukümkha shi lhoxü heqhiche eno pa tüna sala lhoxü tsüqhiche; pa kungo-a lo lhoxü tsüve keu eno ashi sütha pinyive keu no chhitoike.

¹³ Aqokitikhi Mpeu no sheshu, Julo, Ni ye o mjochile ani, eno I no ow khurkuluqo pitileve tsü nani, eno azütakikihi no ow abongshuu lhotheqo kütsave nani. Nono xulepughi keu I no ayeghi lono pühave tsü nani, eno o ghinimi sütsa ye khilemu chilu kithe move nani.