NAHUM 1 - Sumi Naga CL (Re-edited) Bible (BSI)

¹ Nineveh ghenguno tungkuptsa. Elkoshmi Nahum kungunhetsü kaku.

Nineveh shou Alhou Loghu

² Ampeu ye anhekushu eno amkhükulu Lhou; amkhükulu eno axukighideu; Ampeu no Pa ghümi shou amkhü lu eno panoqo sala aloghu püa cheni.

³ Ampeu ye asheshino amloide cheni eno aküka kuloghi, Ampeu ye khilemu pimive keu phepuwuve chemo. Pa laghi ye miyitsü eno pasapagha lo ani, eno khüngküsü no Pa pukhu lo ayeghimkhu ke.

⁴ Pa no azüghi lomipi no qhaive tsü; Pa no aghoki kümtsü qhaive tsü; Bashan eno Carmel ye ighüyivae; Lebanon xamunu ye ighüyivae.

⁵ Naghutoqo no Pa zü lo itha; atoghiqo no ayitsü shivae; ayeghi eno tile xüküami kümtsü khokhoshi Pa zü lo ipeghi.

⁶ Khuu no Pa xukighide zülo puthugho luni kea? Khuu no Pa mlokighide kushu puqhe luni kea? Pa loghu no ami toi ghuqhi, Pa no atuquqo mukhumuno shi kubove tsü.

⁷ Ampeu ye aloe, shiluküsa tsala lo sükusho-a; khunono Pa ije cheni keno Pa no ithi ani.

⁸ Ikemu Pa no züqozü kije pesü aghümi qhoi kishekhave tsü nani, Pa ghümi hasü aküzü lo ilo nani.

⁹ Nongu ye Ampeu shou kiu kuchughu ani kea? Pa no qhoi kishekhave tsü nani; aküküpna ye ghuthu akiniu ipeghimo nani.

¹⁰ Kughengu panongu ye asahu küptshüpe ake toi, shokümzümi no shopusü ake toi; aghijini qhaive keu pitive ketoi nani.

¹¹ Ampeu shou küsakügha kuchughu keu ameküküha lapiyeu ye o launo ighi ke.

¹² Ikehu Ampeu no pi ani, “Panongu no kutomo eno aküka kumtoshi aghi namu, panoqo yeqhive eno pühave nani. I no o ghimeve aghi namu, Ni ye o ghime kithemae.

¹³ Eno itehi ye I no o phi lono paw kuokhasü hechheve tsüni eno o kütsüghaqo sütha kütüta shive tsüni.”

¹⁴ Ampeu no o ghenguno azah tsüvae: “O je ye pekishe wo pemoae; o lhou ki lono I no asü-atu eno ayi julho kütsave tsü nani. I no o kumoki mla nani, kughengu no ye ameküha ke.”

¹⁵ Khuu asütsa kivi pecheni eno külakishi sheshu cheni keno, naghuto lo chenike julo! Ow tiqhetiniqo pini lo, O Judah; o shoqhiqo shikupulo, kughengu amekükühami ye khilemu o leighi kithemae; pa ye qhoi kütsapinyivae.