MICAH 6 - Sumi Naga CL (Re-edited) Bible (BSI)

Ampeu no Nguku

¹ Ampeu no kiu piani keno inilo: Ithulo, naghutoqo zülo o tsakükügha süghilo, atoghiqo pelo o sütsa ini pelo.

² Nongu naghutoqo eno ayeghi boqhaqo Ampeu no nguku keu inilo, kughengu Ampeu ye Paw timi shou nguku ani, eno Pa ye Israel sasü kütsala nani.

³ “O Iw timiqo, Ni ye nongu lau kiu shive kea? Ni ye kishi nongu züpüzüve kea? I khochile lo!

⁴ Kughengu I no Egypt yeghi lono nongu saipeghi eno aqüaxe kibo lono nongu qhüchilelu ke, I no nongu lau Moses, Aaron eno Miriam puwue.

⁵ O Iw timiqo, Moab kükau Balak no kiu kuchughu, Beor nu Balaam no kiu pa khochile, Shittim lono Gilgal kutolo kiu shikeno kümsülu lo, eno AMPEUw achipiu kümla nongu no ithi nani.”

Ampeu ye Kiu Avehupu shi Ania?

⁶ “Ni ye kiu pesü Ampeu zülo ighini eno akiqheu Lhou zülo qhoqhüni kea? Ni ye Pa zülo akipti kümllagho, ampe lakhi mishi peighini keo?

⁷ Ampeu ye ambetsü qhethonhe no qhethonhe, thazü ghoki qhethonhe chighi piqino aloqilu nani keo? Iw hekibide ghenguno ni ye I nu anoghiu pesü tsüni keo, I xine ghenguno I philo axathi tsüni kea?”

⁸ O timi, kiu no alo keno Ampeu no o vilo pivae; kuchou xakütha eno iqemokeu kikimiye piyeni keu eno aqhokigheu lono nongu Lhou gholo checheni keu nguno alau Pa ye o launo kiu avehupu shi ani kea?

Küsaküghami Kütsakungo

⁹ Ampeu sütsa no mishighüna lau ighamku—O je sümsani keu no kuchou lokütsüe: “Khuu no aküsü kutope qhikeno Pa huqhelo

¹⁰ Kixikilami kilo kixikila küakini akeu eno ahu mighi pimive keu ngusü Ni ye kümsüma luni keshea?

¹¹ Kixikilamiw ahu kimghipu eno pishikiqhi kimghitu peitha chekemi kipimi Ni ye qhive tsüni keshea?

¹² Now kinimiqo ye ngukangugha no chhitoi ke; xüküamiqo no alatsa picheni, eno pano mili ye pishikiqhie.

¹³ Tighenguno nongu ghüzave kepushi I no nongu heveke, no xine ghenguno nongu ye küghüküghaleive ke.

¹⁴ Nongu no chunani kemu aghaqimo nani eno nongu lolo amzü anani; nongu no kike nani kemu kütsüpe qhimla nani, ikemu kiu kütsü püaghini keno I no azütakikihi tsüve nani.

¹⁵ Nongu no shosü nani kemu xolumo nani; olive tsüghü nani kemu thazü pesü nongu nukishe monani; nongu no atsaithi tsüghü nani kemu atsaiji yemo nani.

¹⁶ Kughengu nongu no Omri yezah eno Ahab lagha kümla kümtsü papeke; eno nongu no panoqow mijekütsü laghi pülake, ikehu I no nongu kütsale eno xüküami jukünatha penani; eno nongu no Iw timiw tichetighe xapu nani.”