MICAH 5 - Sumi Naga CL (Re-edited) Bible (BSI)

Bethlehem lono Yepeu Punu nani

¹ Itehi now ghüshimi hekütsülo, O ghüshimiw ayiliu; ningu lenike khasüpe ngovae; panongu no aqheküsü pesü Israel xaküthau gilo ghapuku ani.

² Ikemu O Bethlehem Ephrathah, no khuu Judah lagha gholo aghulou keno, I ghenguno Israel lo yepeu shiniye akeu lakhi o launo ighi nani, Pa ighini keu ye khaghi mulhou tsae.

³ Tighenguno apunu küsü lo akeu huno punu moke kutolo Pa no panongu qhive nani; Tithiuno pa thiküzümi no Israelmi lau ideighi nani.

⁴ Pa no Ampeu küka eno Ampeu Pa Lhou je kükanguagha lono ithughi no Pa mbeloji kheu shi nani. Panoqo ye sükusho auve nani, kughengu itehi ye ayeghi shekichi kutolo Pa no akighiche shive nani.

⁵ Eno Pa no panow külakishiu shive nani. Assyriami no ni yeghi lo ighi no niw kükakiqo lo nesü kelo, nino pa shou ambekhemi tsüni eno kükapumi tache puwuni;

⁶ panoqo no azütakikihi pesü Assyria yeghi eno Nimrod kulaghi kheluve nani; eno kughou Pa no ni yeghi lo ighi no ni lughi lo iloghiveni keno, Pa no Assyriami launo ni xaphe nani.

Ghükulumi Xaphelu nani

⁷ Tishino Jacobw ghükulumi ye Ampeu tsüzü toi, atsüni shou tsüghuqhi ketoi, ashiaye kutomo dolo anani ti ye timi ghenguno munuve chemo momu timi nuliqo ngokhe chemoe.

⁸ Eno Jacobw ghükulumi ye shiye eno ashiaye kutomo gholo anani, abongshuu lakhino aghasa lo tüghashiqo gholo aketoi, abongshuu lhothe no ambeloji gholo aketoi, kughou pa sholuni keno xapheni kemi kühano nedaqhi eno sütha pinyive cheni.

⁹ O u no o ghümi shou tokulu shi peqhe nani eno o ghümi kümtsü kütsave nani.

¹⁰ Tipani, Ampeu no shuphe, I no nongu launo now khurshi ngo khurkuluqo kütsave tsü nani;

¹¹ No yeghi lo mishighünaqo I no kütsave tsü nani eno now sükusho-aqo tuleqhive tsü nani;

¹² I no nongu launo atumu kütsave tsü nani eno nongu ye asakiqhimi kühave nani;

¹³ nonguw asü-atu julho ngo atsükuchoqo I no kütsave tsü nani eno nongu ye nongu u no mlakeu julho lau itsaqimo nani;

¹⁴ I no nonguw Asherah julhoqo akuhu lono nhüve tsüno no phughiqo kütsavetsü nani.

¹⁵ I no amlokighide eno aloghu lono agholumo keu shiyeqo shou amkhülu nani.