MICAH 3 - Sumi Naga CL (Re-edited) Bible (BSI)

Yepemi ngo Tungkupmi Pipütha

¹ I no pi: inilo, Jacob lagha lo sakiphemi eno Israel yepemi! Nongu ye kuchou xakütha ithi masake kumo?

² Nongu akivi mithi eno küsakügha kimiye chekeqo, Nongu no Iw timi yiko lhave tsüno asaghi lono ashi sülavetsü,

³ Iw timi phiashi chuve tsüno pano philono ayiko lhavetsü, eno aliqu lo ashi süpüa keshi pano saghi kubopinyipe ali lo ghekucho süve tsüe.

⁴ Tileno panongu no Ampeu lau qasü ighi nani, ikemu Pa no khochilemo nani; tipa ghuloki lo Pa no panongu launo Pa gi küsüve nani, kughengu panongu no küsakügha kümla shive ke.

⁵ Ampeu no tungkupmi ghenguno ishi pi, panoqo no Iw timi sabidevae, kughou chukepu thime ani keno, panoqo no “Aloino” ipi igha ikemu khuu no panoqo kichi lo kiumu sütsü moni keno pa shou aghükishi sheshue.

⁶ Ikehu kungunhetsü kühano nongu ye zümoive nani, eno pichho keu kühano nongu lau aküzü ighive nani. Tungkupmi launo khetsünhe ilove nani, eno panoqo shou atsala no züchiyive nani;

⁷ tungkupmi ye kujove nani, eno pichhotsü chekemi ye akukujopu lo süve nani; Alhou launo khokichile kiumu küha kehu panongu kümtsü akichi kujukhave nani.

⁸ Ikemu I ghengu ye, Ampeu Ghungu küka eno kuchou xakütha ngo akumto no I shepichhipe ani, ti ye Jacob vilo paw hekibide eno Israel vilo pa xine piniye ke.

⁹ Hi inilo, nongu Jacob lagha lo sakiphemi eno Israel lagha lo yepemiqo, nongu no kuchou xakütha mithi eno müzüchoi keqo kümtsü tuchighive tsüke,

¹⁰ aji pesü Zion shiqhe eno axine pesü Jerusalem shiqhe ke.

¹¹ Tile sakiphemi no külügho vecheo xakütha tsü; achinemi no ame lono shika; tungkupmi no pisa ghenguno pichho tsü; ikeghi panoqo no Ampeu mungu bepe no pi, “Ampeu ye ni gholo anike kumo? Amhekiqi kiumu ningu shou ikughimo nani.”

¹² Ikehu nongu ghenguno Zion ye aluza toi hokideve nani; Jerusalem ye xine-xigha pekilepu-a shive nani, eno achineki toghi no aghasü ilhouve nani.