MICAH 2 - Sumi Naga CL (Re-edited) Bible (BSI)

Nedaqoda kemi Hasapu

¹ Khunono küsakügha kuchughu eno pano lüpa lono alhoksa shicheni keno ahasapue! Kughou no tsütho ipeghini keno panongu no tishi cheni, kughengu pano u lo tishilu kepu küka anike.

² Panongu no aluzaqo mine eno süxa luve cheni, eno akiqo süxa luve cheni; timi kibolomi nedaqoda cheni, eno pano mheghi luvetsü cheni.

³ Tighenguno Ampeu no piani: julo, Ni ye akibo hipau shou amhekiqi kughupe ani, tipau lono nongu xaphemla nani, eno nongu no aqheküzashi ala chemove nani, kughengu ti ye amhekiqi doke.

⁴ Tipani panongu no nongu müsü kutho keu le phe eno kukhukimji shi qa nani, eno, “Ningu ye shishe kütsavae; Pa no Iw timi saje kilive tsüae; kishi Pa no I launo ti ikhipe wuvetsü akelae! Pa no ni luzaqo pesü pülümo kemi tsüvae,” ipi nani.

⁵ Tighenguno nongu ye Ampeu hoho lo asaqhini kemi khumu kühave nani.

⁶ “Kütsü kevilo”—panongu no ishi kütsü cheni— “hipa vehu kütsü kepu kumoe; akukujo ye ni züthave mo nani.”

⁷ Hitoi pi kepu keshea, O Jacob laghami? Ampeu ye kutuumla aya keshea? Hipaqo ye Pa kümla keshea? I tsapi ye müzüchoi cheche kemi lau akivi shilu chemo keshea?

⁸ Ikemu anileshi Iw timiqo ye aghümi toi ithughi ani; khunono aghü shinike kümsümo no pükhübe qhiyi cheni keno tipaqow amekusho phimini nongu no xaluve tsü.

⁹ Nongu no Iw timi totimiqo pano lokughuno ki lono eno pano tianuliqo launo hapheve, eno alholo ghenguno I juküvü pewuve tsüae.

¹⁰ Ithu no wuvelo, kughengu hi ye akulhokiqhi-a kumoe, mithekumo khikhino shishe kütsakungo cheni keno tipau ghenguno ke.

¹¹ Tsala timi lakhino akimki eno pishikiqhi lono, “I no atsaiji eno aji kümka ghili kütsüni,” ipi cheghi aye, pa ye timi hipaqo ghenguno akükütsüu shinani!

¹² I no mtsüqheino nongu kümtsü hekütsü nani, O Jacob; I no Israelmi ghükulumi hekütsü nani; Aqokitikhi mbumghu keu no achu kümza-a lo ambeloji toi, ambeqo sasü aki lo hekütsü ketoi I no panoqo hekütsü nani.

¹³ Khuu no ala kophetsü keno Pa no panoqo züu wunani panongu no khagho hepho ipeve no ti heche wuve nani. Panongu kükau no pano züuno ti heche wunani, Ampeu no pano kütsü shi nani.