MICAH 1 - Sumi Naga CL (Re-edited) Bible (BSI)

¹ Jotham, Ahaz eno Hezekiah noqo no Judah lo kükami shiake ghuloki lo Moreshethmi Micah lau Samaria eno Jerusalem ghenguno Ampeu tsa ighi.

Kütsakungo Chekeu

² Inilo, nongu ashiaye kümtsü; amlo tsüqhiyilo, O ayeghi, eno tile akeqo kümtsü, Ampeu Alhou pelo Pa kimthe chineki lono nongu shou thopi shipelo.

³ Kughengu julo, Ampeu ye Pa kungo-a lono cheni, Pa no iqighi no ayeghi lo qhemghaike-aqo neda nani.

⁴ Ami lono aghügha kümlave keshi naghutoqo no Pa zülo mlaghubeive nani, kunguu no azü peleqhi akeshi akhilaqo no iko ipeghive nani.

⁵ Hi kümtsü Jacob xine eno Israel lagha xine ghenguno ke. Jacob xine ye kiu kea? Ti ye Samaria ke kumo? Eno Judah kuchuqu-a ye kiu kea? Ti ye Jerusalem ke kumo?

⁶ Ikehu I no Samaria pesü xine-xigha pekilepu-a shive tsüni, atsaibo shokepu-a shive tsüni, eno li tuquqo pesü akhila lo kulu piqive tsüno li boqhaqo xaleve tsü nani.

⁷ Li julho shisü keu kümtsü hephopinyive tsü nani, li jume kümtsü ami lono pitive tsü nani, eno li julho kümtsü I no kütsaleve tsü nani, kughengu li no kütüqha keu jume kütsüpe qhi kehu, li ye kütüqha keu jume lau idewove nani.

⁸ Hi ghenguno I no mloqani; I no aphimini xave no aphikümsa shi iqhoiqini; I no aghalo tsü toi amloijuni, eno ostrich toi mloqani.

⁹ Kughengu li zaku ye shipivi kümlapu shivae, eno ti ye Judah lau ighivae; tipau ye Iw timiqow khagho eno Jerusalem tovae.

¹⁰ Gath lo tipau pi kevilo khilemu mloqa kevilo; Beth-le-aphrah lo ayeghimkhu lo ihozü lo.

¹¹ Shaphir lo küxümiqo aphikümsa eno akukujopu shi nongu la lo chechelo; Zanaan lo küxümiqo khalau ipeghi kevilo; Beth-ezel kumlo no nongu-a ghi sükusho kühavae pi ithipe nani.

¹² Kughengu Maroth lo küxümi no tinhemgha ghenguno kütakihi ngokhe ani, kughengu Ampeu launo amhekiqi Jerusalem khagho lo ighivae.

¹³ Lachish lo küamiqo, khurshi pesü khurkulu lo tsüghada lo; kughengu tino Zion limi shou axine hukuthu ke, kughengu Israel xine ye o launo ithulue.

¹⁴ Tighenguno Moresheth-gath lau nongu ye kütüta shivekeu gho tsüni, Israel kükamiqo ye Achzib lo küami no pishiqhive nani.

¹⁵ Nongu Mareshah lo küami lau I no itaghi tokuluu saighi nani; Israel jekipimi ye Adullam lo itshü nani.

¹⁶ Nongu züküvüpu tianuliqo ghenguno nongu kütsüsa tsave no boghesho shivelo; alhuqu lakhi toi miyeboive lo, kughengu panongu ye nongu launo haphe sawuve nani.