MATTHEW 26 - Sumi Naga CL (Re-edited) Bible (BSI)

Jisü Pithive nike Kuchughu

¹ Kughou Jisü no hi kümtsü pitave keno, pa no akhopemi vilo pi,

² “Hechekulu Ghulhu shini keu ghulo kini likhivae pi nongu no ithi ani, eno Timi Nu pesü kros lono yedave penike pephe tsüveni cheni.”

³ Tile achinetomi ngo Jewmi layemi ye achinetou Caiaphas kilo kumqo,

⁴ eno küsüu no Jisü küghape pithive nike kuchughu küqhave.

⁵ Panongu no pi, “Timiqo no mqhumza ipeghive nosake aghulhu ghuloki loye shimoni.”

Bethany lo Jisü Nukishe

⁶ Kughou Jisü no Bethany lo apüghau Simon kilo akeno,

⁷ totimi lakhi no alabaster külabo lo amekusho xokütsüngü pesü pa lau ighi, eno pa no chusho akelono li no pa kütsü lo lepuku tsüe.

⁸ Ikemu akhopemi no ti ithulu no axuideve eno pi, “Kushiye ishi kilheve ani kea?

⁹ Hi ye ame kutomo no jepe kumlhomi tsükulupu shiae.”

¹⁰ Jisü no ti vethaluve no panoqo vilo pi, “Nongu ye kushiye atotiu pünaqhi ani kea? Li ye I ghenguno jukighilepu shive tsüae.

¹¹ Kughengu kumlhomi ye alhokuthu nongu gholo anani, ikemu ni ye alhokuthu nongu ani chemoe.

¹² Li no axokütsüngü hipau I philo lepukuve keu ye ni shiqho nike kutotsü ayae.

¹³ Kuchou no I no nongu vilo piani, ayeghiqha kümtsü lo khile khilemu hipa tsakiviu pikülha wu kelo, li kümsüchile lughi li no kiu shive akeno tighi piche nani.”

Judas No Jisü Thechu

¹⁴ Akhopemi chighikini gholo lakhi, Judas Iscariot no achinetomi lau wu

¹⁵ eno pi, “I no nongu pelo Jisü küghalu penike ikhiphe tsü aye nongu ye kiu I tsüni kea?” Panongu no ghükayi shighi pesü pa tsüve.

¹⁶ Tithiu Judas ye Jisü thechuni ke adokivi phu thuve.

Hechekulu Ghulhu

¹⁷ Kholaqhi sümokeu Sho ghulhu tsala atüghüu lo akhopemi no Jisü lau ighi no pa vilo pi, “No ye ni pelo khileno Hechekulu Ghulhu o ghenguno kutotsü penishi ani kea?”

¹⁸ Pa no pi, “Nongu ye aphughi lo timi lakhi lau wuno pa vilo pilo, ‘Shikükau no piani, I do ye kupunuve ake ni ye I khopemi sasü o ki lono Hechekulu Ghulhu ikhiluni cheni.’”

¹⁹ Jisü no panoqo vilo pike toi akhopemi no Hechekulu Ghulhu kutove.

²⁰ Kijiliu shive kelo, Jisü no pa khopemi chighikini sasü chusho nike iqa.

²¹ Panongu chusho akelo Jisü no pi, “Kuchou no I no nongu vilo piani, nongu gholo milakhi no I thechu nani.”

²² Akhopemi no amlo imeuve eno lakhikhi no pa vilo pi thuve, “Ampeu, ti ye ni keshea?”

²³ Jisü no khochile “Khuu no pa u pesü I gholo akhu lakhi lono asho pütsü chu ani keno pa no I thechu nani.

²⁴ Kuchoyesü lo pa ghili yepüake toi Timi Nu ye wuve nani, ikemu khuu no Timi Nu thechu keno pa hasapue! Timi tipau ghengu ye punu move keu pavini chekena.”

²⁵ Jisü thechu niye akeu Judas huno pi, “Rabbi, ti ye ni keshea?” Jisü no pa vilo pi, “Nono piluvae.”

Ampeu Ghulhu

²⁶ Panongu no chusho akelo, Jisü no asho ikhilu, eno shikimthi tsüve kethiu ti süphope pa khopemi tsüno pi, “Hi ikhipe chulo, hi ye I phimpi ke.”

²⁷ Tishino pa no ajukhu ikhilu, eno shikimthi tsüve kethiu tipau pesü panoqo tsüno pi, “Nongu kümtsü hi sholo,

²⁸ kughengu hi ye timi kutomo xine qhitsü nike peleve keu Iw puloshoqhi ji ke.

²⁹ I no nongu vilo piani, I Pu yekipe lono nongu sasü anileshi shomoke tsala kutolo, ni ye hipa tsaibo lo pekighi zü shomoae.”

³⁰ Panongu no ale lakhi pheve kethiu Olive Toghi lo iqhove.

Peter Ghili Azünatha Pi

³¹ Tile Jisü no panoqo vilo pi, “Itiji nongu kümtsü I qhive no pokhave nani. Kughengu ishi yepüani, ‘I no ambekheu ghiqhive nani, eno ambe loji ye apanaghave nani.’

³² Ikemu I xüputhuve kethiu I no nongu züuno Galilee lo wunani.”

³³ Peter no pa khochile, “Panongu kümtsü no o qhive namu, ni ye khilemu o qhimo nani.”

³⁴ Jisü no pa vilo pi, “Kuchou no I no piani, itiji awudu no igha mphilo, no ye ni mthae pi ghuthu küthü milive nani.”

³⁵ Peter no pi, “Ni ye o gholono thive kepushi namu o milive monani!” Akhopemi kümtsü no tishi pive.

Gethsemane lono Inikhu

³⁶ Tithiu Jisü no pa khopemi sasü Gethsemane ipikeu lo wuno panongu vilo pi, “I no hule wuno inikhu akelo hile iqa aghilo.”

³⁷ Pa no Peter ngo Zebedee nu pama pa gholo sawu, eno pa ye amlo ghime eno amlo kughuju shive.

³⁸ Pano küthü vilo pa no pi, “Ni ye thiveni keshi ighono amlo iju ani; hile ngolo eno I gholono khekuto lo.”

³⁹ Pa no kitila azüu wuno agi no ayeghi dape inikhu, “I Pu, shikulupu shi aye ajukhu hipau I launo ikhiluve tsülo; tishinamu I gho kumono o pulou shilo.”

⁴⁰ Pa no akhopemi lau ideighi kelo pano küthü ye zü aghive, tile pa no Peter vilo pi, “No küthü ye ayi kihedo lakhi I gholo khemlave keshea?

⁴¹ Ghukuju lo ilovemo kepushi tsükhüi shino inikhu lo. Aghungu ye pulo ani kemu ashi no qeinai anie.”

⁴² Itaghi, ghuthu akiniu Jisü no wuno ishi inikhu, “I Pu, ajukhu hipau I no shomo kelo ikhiluve tsümla aye, o pulou shilo.”

⁴³ Pa no itaghi ideighi kelo pano küthü ye zünishi kelauno anhethi mu tsükhomla zü aghive.

⁴⁴ Panoqo qhive no Jisü no itaghi wuve, eno ghuthu aküthüu azüu tsatho inikhue.

⁴⁵ Tithiu pa no akhopemi lau ighi no pi, “Kutou no zü eno akulhoqhi alo. Julo, ado ye ighivae, eno Timi Nu ye axinemi u lo phesüvae.

⁴⁶ Ithulo, ningu wuveni shilo; julo, I thekuchuu ye hi cheae.”

Jisü Küghaluve

⁴⁷ Jisü no atsapi aphi lono, chighikini gholo lakhi Judas ighive, eno pa gholo achinetomi ngo Jewmi layemi no puwu kemi timi kutomo no azütakikihi ngo asüthalu pesü ighi.

⁴⁸ Thekuchuu no amchipu lakhi timiqo tsüpüa, “I no müma keu kene, pa tsüqü luvelo.”

⁴⁹ Judas no mtazü Jisü lau ighi no “Petha lulo, Rabbi!” ipi püzü pa mümae.

⁵⁰ Jisü no pa vilo pi, “Aküsau, nono kiu shiniye ighi keno shilulo.” Tileno panongu no iqhoghi püzü Jisü tsüqü luve no mtotoi pa tshüluve.

⁵¹ Jisü gholo akemi lakhi no pa zütakikihi süjope achinetou qeu shou ghipuku no pa kini küsavetsü.

⁵² Tile Jisü no pa vilo pi, “O zütakikihi abohu lo süvelo. Kughengu azütakikihi kipemi kümtsü ghüyi lono wonani.

⁵³ I no I Pu qhüiniju kelo Pa ye mtazü kungumi aqo chighikini nguno alau I lau puwu tsü nanie pi nongu ye kümsü mla keshea?

⁵⁴ Ikemu tishive aye Kuchoyesü lo hitoi shimasae pi püakeu ye kishino shikupuni kea?”

⁵⁵ Tileno aqokitikhi vilo Jisü no pi, “Ni ye heqhi buqhi kemi toi nongu ye azütakikihi ngo asüthalu pesü I kügha niye ighi ani keshea? Ghulo atsütsü I no achineki lo iqa no kütsü anamu nongu ye I küghamoe.

⁵⁶ Ikemu tungkupmi no Kuchoyesü lo yepüa keu shikupu niye hi kümtsü shi ani.” Tileno akhopemi kümtsü no pa qhive no pove.

Judahmi Hoho Zülo

⁵⁷ Jisü küghalu keqo no pa sasü achinetou Caiaphas kilo Ayezah shikükami ngo layemi kumqo akeu lo wu.

⁵⁸ Peter ye putou no Jisü papesü achinetou kikhala kutolo ighi, eno ashekha lo kishive nani keno aghukhemi gholo ilo iqa no juae.

⁵⁹ Jisü pithive niye achinetomi ngo hoho mpemi kümtsü no kichile thopi phuae,

⁶⁰ kichile thopimi kutomo no pi akemu kiumu phumlave. Ashekha lo timi kini no azüu ighi

⁶¹ eno pi, “Timi hipau no pi, ‘Niye Alhou chineki xave no atsala küthü lono shiluve nani.’”

⁶² Achinetou no puthughove no Jisü vilo pi, “Timi hi pama no o shou ngukube akeu lo khokichile küha keo?”

⁶³ Ikemu Jisü no inaqhoi ngove. Achinetou no itaghi pa vilo pi, “Aküxüpu Lhou je lono I no ashoqhi tsa o vilo piani, no ye Alhou Nu Messiah kemo keno ni vilo pilo.”

⁶⁴ Jisü no pa vilo pi, “Nono pivae. Ikemu I no nongu vilo piani, hinguno hilauye Timi Nu no Akumtou u ajeu iqa no atsütsü lo khüngküsü lono ipe cheghi keu nongu no ithulu nani.”

⁶⁵ Tile achinetou no pa phi süxüve no pi, “Pa ye Lhoupiküptha tsa pivae. Ningu ye thopimi kütami kiu avehupu shini kea? Itehi nongu no paw piküptha tsa chiluvae.

⁶⁶ Nonguw xakütha ye kiu kea?” Panongu no khochile, “Pa ye thive küzüpue.”

⁶⁷ Tishino panongu no pa gilo müsü puku eno pa chishiqhi. Khami no pa ghaqhi ghi pi,

⁶⁸ “Tungkuptsa ni vilo pilo, no Messiah! O heqhi akeu ye khuu kea?”

Peter no Jisü Milive

⁶⁹ Peter no aki khala lo iqa akelo achinetou qelimi lakhi no pa lau ighi no pi, “No ghi Galileemi Jisü gholo cheke lae.”

⁷⁰ Ikemu panongu kümtsü zülono pa no ishi milive, “Nono kiu piani keno ni ye mthae.”

⁷¹ Pa no akulaghi lo ipeve, ikelo aqeliu kütami no pa ithulu no tile akeqo vilo pi, “Timi hipau ye Nazarethmi Jisü gholo cheke.”

⁷² Itaghi Peter no ashoqhi shi milive, “Ni ye timi hu mthae.”

⁷³ Ado hami thiu tile timi puthugho akeqo no Peter lau ighi no pi, “Mtsüqheino no ghi panoqo gholo lakhie, kughengu o tsapi ghola no o küta ani.”

⁷⁴ Tile Peter no pa ampi ghushouve no ishi tushoqhi, “Ni ye timi hipau mthae.” Tipa mtsa awudu no ighave.

⁷⁵ Eno Jisü no pikeu tsa Peter no kümsüchilelu, “Awudu no igha mphilo no ye ni mthae pi ghuthu küthü milive nani.” Peter no khalau ipeve no amloiju qae.