MATTHEW 22 - Sumi Naga CL (Re-edited) Bible (BSI)

Külakupu Ghulhu

¹ Jisü no itaghi kimghikipiye lono timiqo pütsa,

² “Kungugha yekipe ye kükami lakhi no pa nu ghenguno külakupu ghulhu kutotsü ketoi ke.

³ Pa no kuküsümi kusaghi penike pa qemi puwu, ikemu panongu no ighini shimove.

⁴ Itaghi pa no aqemi kütami puwu no pi, ‘Kuküsümi vilo pilo, “Ni ye I ghulhu kutope qhivae, athakupu mishitsü ngo amshiti heqhi no qhoi kutope ani. Külakupu ghulhu lo ighilo.”’

⁵ Ikemu panongu no iniküküzüi chekhave, lakhi no pa lulo huve, lakhi no paw lhidi-a lo wuve,

⁶ eno kütami no pa qemi tsüqüpe peitha püsa eno pithivetsü.

⁷ Akükau no axuidepe paw ghüshimi puwu no hekiqhimi tipaqo pithive eno pano phughi pitive tsü.

⁸ Tishino pa no pa qemi vilo pi, ‘Külakupu ghulhu ye kutope ani, ikemu kuküsümi no ighi küzüpu kumove ke.

⁹ Tighenguno alaghila lo wuno nongu no ithuluke thaqhü külakupu ghulhu lo kusülo.’

¹⁰ Aqemi tipaqo no alaghila lo wuno sholuke thaqhü akivimi alhoksami kümtsü kusaghi. Ikehu külakupu-a ye inami no chhitoive.

¹¹ “Ikemu kughou akükau no inami juniye iloghi keno, pa no tile timi lakhi külakupu phimini pepumo no akeu ithulu.

¹² Eno pa no pi, ‘Ashou, no ye külakupu phimini pepumo no hile kishi iloghilu kea?’ Timi huye kiu tsamu pimlave.

¹³ Tileno akükau no jukükütsümi vilo pi, ‘Pa phiau pheve no khalau aküzü lo vepheve lo, tile ahu tsüghü bubushi qa nani.’

¹⁴ Kughengu kutomo kue, ikemu aghulo likhi kishelue.”

Asüqha pesü Caesar Tsükeu

¹⁵ Tileno Phariseemi ye wuve no pa tsa lono pa kitime niye kuchughu.

¹⁶ Panongu no pano khopemi khami gholo Herod papemi ishi Jisü lau puwu no pipe, “Shikükau, nino ithi anike no ye kuchou eno kuchou shi Alhou laghi shika cheni, eno kütami no o züluve pe chemoe, kughengu no ye ashou koghe juchemoe.

¹⁷ Ikehu no ye kiu kümsü ani keno ni vilo pilo. Ayezah kiqilo Caesar lau asüqha tsü kelau kemo kea?”

¹⁸ Ikemu Jisü no pano lhoksa kukughu ithive no pi, “Nongu keghilishi chekeqo, kushiye I peju ani kea?”

¹⁹ “Asüqha pisa muno I piyelo.” Panongu no ghükayi lakhi pa lau süghi.

²⁰ Jisü no panoqo vilo ighiju, “Hi ye khuu julho eno khuu je kea?” Panongu pi, “Caesarw ke.”

²¹ Jisü no panoqo vilo pi, “Tishiaye Caesarw no Caesar tsülo, eno Alhouw no Alhou tsülo.”

²² Panongu no ti chilupe akümzave, eno pa qhive no wuve.

Xüchilekulu Vehu Ighiju

²³ Tipani xüchilekulu kühae piche keqo Sadduceemi no Jisü lau ighi no pa vilo ighikuju tsa iniju,

²⁴ “Shikükau, Moses no pi, ‘Milakhi no atianuli kühano thive aye, pa thiküzüu no pamu nipu sasü külave no pa sala atianuli shitsü masae.’

²⁵ Ningu gholo athiküzümi tsüni ache, akichiu no akibo shi püzü atianuli shimono thive eno pa nipu ye pa thiküzüu no valuve.

²⁶ Titoi athiküzüu akiniu eno aküthüu lono akütsüniu kutolo tishive.

²⁷ Ashekha lo atopuu ghi thive.

²⁸ Ikehu xüchilekulu tsala lo li ye khuu nipu shinani kea? Kughengu li ye panongu kümtsü nipu ke.”

²⁹ Ikemu Jisü no panongu khochile, “Nongu ye pimi ani, kughengu nongu ye Kuchoyesü na Alhou küka namu mthae.

³⁰ Kughengu xüchilekulu tsala loye külakupu shimono kungugha lo kungumi toive nani.

³¹ Eno kithimi xüputhu keu vehu loye Alhou no nongu vilo ishi pikeu nongu ye phimla keshea?

³² ‘Ni ye Abraham Lhou, Isaac Lhou, eno Jacob Lhou ke.’ Pa ye küxümi Lhou kethono kithimi Lhou kumoe.”

³³ Kughou aqokitikhi no ti chilu keno akümza qhiyive.

Ayezah gholo Akhotou

³⁴ Kughou Jisü no Sadduceemi ghesüve keu Phariseemi no chilu keno panongu no kümtsa ighi.

³⁵ Tipaqo gholo Ayezah shikükami lakhi no Jisü peju nike ighikuju tsa iniju,

³⁶ “Shikükau, Ayezah lo khikhi no azakütsü akhotou kea?”

³⁷ Jisü no pa vilo pi, “No ye o mlo kuchopu, o ngulho kümtsü, o kükümsü kümtsü eno o kumto kümtsü pesü Ampeu o Lhou kimiyeni.

³⁸ Hi no azakütsü gholo akhotou eno atüghüu.

³⁹ Eno akiniu no: No ye o likhi o toi o kisüghümi kimiyeni.

⁴⁰ Moses Yezah ngo Tungkupmi kaku kümtsü azakütsü hi küma shou bepe ani.”

Messiah ye Khuu Nu Kea?

⁴¹ Phariseemi no kumqo akelo Jisü no panoqo vilo ighikuju tsa iniju,

⁴² “Nongu ye Messiah vehulo kiu kümsü cheni kea? Pa ye khuu nu kea?” Panongu no pi, “Pa ye David nue.”

⁴³ Tile pa no pi, “Imaye kushiye David ye Aghungu lono pa vilo Ampeu ipi kea? David no pike,

⁴⁴ “‘Ampeu no I Mpeu vilo pi, “I no o ghümi pesü o pukhu qholo qhitsü moke kutolo I u ajeu iqalo.”’

⁴⁵ Tishiaye David no pa vilo Ampeu ipi aye, kishino Messiah ye David nu kea?”

⁴⁶ Khunomu atsa lakhimu pa khochile mlave, eno tinguno tilauye khuana no pa vilo ighikuju inijuni keu ighüve.