MATTHEW 21 - Sumi Naga CL (Re-edited) Bible (BSI)

Tokulu Hukülü shi Ilo

¹ Kughou panongu no Jerusalem kupunuve no Olive Toghi lo Bethphage lo ighi keno, Jisü no akhopemi kini puwu no pi,

² “Nokujo zülo aphu akeu lo ilolo, ti to kemtsa nokujo no khurhaqu lakhi tshüpe ati sasü aghikeu ithulu nani. Ti küma kuqho no I lau saghilo.

³ Tsala khuana no nokujo vilo kiuala pi aye, ishi pilo, ‘AMPEU no hi avehupu shi ani,’ eno pa no mtazü tsü puwuve nani.”

⁴ Hi ye tungkupu no pi püakeu shikupu niye ke,

⁵ “Zion limi vilo pilo, ‘Julo, o kükau o lau cheni, ivünhei khurha shouno cheni, khurhati shouno cheni.’”

⁶ Akhopemi pama no wu püzü Jisü no mijetsü ketoi shi.

⁷ Pama no khurhaqu ngo ati saghi no panonguw hebephi xape tiküma shou qhatsü, eno Jisü no tile iqave.

⁸ Timi kutomo no alaghi lo panow hebephi qhatsü, eno khami no asüloka miche süwo alaghi lo qhatsü.

⁹ Jisü züu eno pa thiu aqokitikhi chekeqo no ighamku, “David Nu Sheqhelo! Khuu no Ampeu je lono cheni keno Alhou no pa kümgha tsülo! Kungugha lono Alhou sheqhelo!”

¹⁰ Kughou Jisü no Jerusalem lo iloghi keno, aphughi lo kümtsü no, “Huye khuu kea?” ipi kügha ipeghive.

¹¹ Eno aqokitikhi no khochile, “Hi ye Galilee lo Nazareth lono ighikeu tungkupu Jisü huke.”

Jisü no Achineki Shikimthe

¹² Jisü no achineki lo ilo no tile küqhükili shi akemi kümtsü hapheve, eno pisa kilitsü akemi kibepu ngo amiqhi je akemi lakhü tukulove tsü.

¹³ Tipaqo vilo pa no pi, “Ishi yepüani, ‘I ki ye akighini ki ipi ku nani,’ ikemu nongu no hipau pesü küpkami küghütshü-a shive tsüae.”

¹⁴ Anhechemi eno aphiau kinitave kemi no achineki lo pa lau ighi, eno pa no panoqo shipivi tsüe.

¹⁵ Jisü no akümzapu kümla shikeu eno itimiqo no achineki lo “David Nu sheqhelo!” ipi ighakeu achinetomi ngo Ayezah shikükami no ithulu kelo, panongu ye shishe axuideve,

¹⁶ eno panongu no pa vilo pi, “Hipaqo no kiu piani keno no ye chilu anima?” Jisü no panoqo vilo pi, “Iyei; eno nongu ye ishi yepüa keu phimla aphi keshea? “‘Itimi ngo angakughunuqo kichi lono akiqheu shekiqhe tsü penike nono kuto tsüe.’”

¹⁷ Jisü no panoqo qhive kethiu pa ye aphughi lono chesü Bethany lo wuve no tilau ngove.

Jisü no Mububo Müsüini

¹⁸ Inaqhe Jisü no aphughi lo ideilo chekelo, pa ye müzüthive.

¹⁹ Alaghi phivilo mububo ithulu kehu pa no wu kemu tile anipa likhi thono kiumu küha. Ikehu pa no asübo vilo pi, “No ye khilemu athi pithi pemoniu!” Paikhavi mububo no thizümüive.

²⁰ Akhopemi no ti ithulupe akichiqhive no pi, “Kishino mububo ye paikhavi no thizümüive kea?”

²¹ Jisü no panoqo khochile, “Kuchou no I no nongu vilo piani, nongu no aküpülü aghi püzü amlo lo lipimo aye, mububo lau kiu shive keno nongu no ti shiluke likhi kumono naghuto hipau vilo, ‘Iqesü azüghi lo ilove lo’ ipi namu tishilu nani.

²² Eno nongu no akighini lono kiu kiumu khu kelo, nongu no aküpülü aghi aye ithulu nani.”

Jisü Kükagha Khü

²³ Kughou Jisü no achineki lo iloghi no timiqo kütsü akeno, achinetomi ngo layemi no pa lau ighi no pi, “No ye kiu küka lono hipaqo shi ani kea? Khuu no kükagha hipau o tsü kea?”

²⁴ Jisü no panoqo khochile. “Ni ghi nongu vilo ighikuju lakhi inijuni, eno nongu no I khochile aye, tileno ni ghi kiu küka pesü hipaqo shicheni keno nongu vilo pini.

²⁵ John no baptiz shikeu küka ye khilano ighi kea? Kungugha lono keo, timi launo kea?” Tile panongu dolono küptsa kile thuve, “Ningu no ‘Kungugha lono’ ipi aye pa no ningu vilo, ‘Imaye nongu ye kushiye pa pülümo kea?’ ipini cheni.

²⁶ Le ningu no, ‘Timi launo’ ipi aye, ningu ye aqokitikhi msae, kughengu kümtsü no John ye tungkupu lakhie piche ke.”

²⁷ Ikehu panongu no Jisü khochile, “Ningu ye mthae.” Pa no panoqo vilo pi, “Imaye ni ghi kiu küka lono hipaqo shicheni keno nongu vilo pimoae.”

Anu Kini Kimghikipiye

²⁸ “Nongu ye kiu pini kea? Timi lakhi no anu kini ache. Pa no akichiu vilo pi, ‘Anu, ishi atsailu lo huno mlalo.’

²⁹ Pa no, ‘Ni ye humoe’ ipi khochile, ikemu athiu ye pa kükümsü kilive no huve.

³⁰ Apu no ayitiu vilo ghi athoshi pi, eno ayitiu no, ‘Ni ye wuni, akijeu’ ipi khochile kemu humove.

³¹ Hi pama dolo khikhiu no apu pulou shitsü kea?” Panongu no khochile, “Akichiu no,” Jisü no panoqo vilo pi, “Kuchou no I no nongu vilo piani, asüqha küqhami eno kütüqhalimi no nongu züuno Alhou yekipe lo ilolu anie.”

³² Kughengu Baptiz kishiu John no nongu lau ighi no amikucho laghi piye kemu nongu no pa pülümoe; ikemu asüqha küqhami eno kütüqhalimi no pa pülüe. Nongu no ti ithuluve kethiu ghi no mlo kili no pa pülü moke.

Atsailu Mishikulumi

³³ “Kimghikipiye kütau lakhi inilo. Alu pighimi lakhi no atsailu lakhi chi eno tipau homxa ghi aghutu shino atsaizü kütsüghü tughuko chhu, eno aqoghe mlape qhi; tishino mishikulumi pichive no aghakhu kütau wuve.

³⁴ Atsaithi xoluke tusho touve kelo pa no mishikulumi launo pa saje süghi penike pa qemi puwu.

³⁵ Mishikulumi no pa qemi lakhi küghape heqhi, lakhi pithivetsü, eno lakhi ye atu pesü veqhive.

³⁶ Pa no itaghi atüghü lo nguno alau aqemi puwu, ikemu mishikulumi no azüu paphi shivetsü.

³⁷ Ashekha lo panoqo lau pa nu puwu. Pa no pi, ‘Panongu no I nu ye gihutsü nani.’

³⁸ Ikemu kughou mishikulumi no anu ithulu keno, panongu lakhi no lakhi vilo pi, ‘Hi no amheghi kiyighiue. Ighilo, ningu pa pithive no pa mheghi luveni nolo.’

³⁹ Ikehu panongu no pa tsüqü luve eno atsailu lono khalau vephe no pa pithive.

⁴⁰ Tishiaye, kughou atsailu mpeu no ighi keno, pa ye mishikulumi lau kiu shinani kea?”

⁴¹ Panongu no pa khochile, “Pa no akithi kijiküsa pesü küsaküghami tipaqo tsü nani, eno atsailu pesü mishikulumi khunono axathi xoluke tusho lo asaje achipishi pa tsü nani keno tipaqo pichive nani.”

⁴² Jisü no panoqo vilo pi, “Nongu ye Kuchoyesü lo khilemu phimla aphi keshea? “‘Aki kishimi no atu kideqhive keu no atsükupu tuqu shive; hi ye Ampeu kümlae eno ti ye ni nhethi lo akichiqhipu.’”

⁴³ “Tighenguno I no nongu vilo piani, nongu launo Alhou yekipe pewuve no tipa xathi pithini keu shiaye tsüve nani.

⁴⁴ Khunono atuqu hipau shou ikiqi ikuni keno vetha pinyive nani; eno atuqu no khuana shou iku aye pa ye mukhumuno shive nani.”

⁴⁵ Achinetomi ngo Phariseemi no Jisüw kimghikipiye chilu kelo pa ye pano ghenguno piani kepi panongu no pimhe luve.

⁴⁶ Panongu no pa kügha niye pükapütsa kemu aqokitikhi msa ae, kughengu panoqo no Jisü ye tungkupu kepi kihi ake.