MATTHEW 20 - Sumi Naga CL (Re-edited) Bible (BSI)

Atsailu Kümlami

¹ “Kughengu Kungugha yekipe ye aki-alu pighimi lakhi no pa tsailu lo hupenike ajumi piqe niye inaqhe itheno kapewu ketoie.

² Atsala lakhi jume tsünike küghave kethiu panoqo pesü pa tsailu lo puhuve.

³ Tulhu ghuloki lo pa no alhikishi-a lo timi khami azükütütüi puthugho aghi keu ithulu,

⁴ eno pa no pi, ‘Nongu ghi atsailu lo hulo, eno nongu jume kiu no achipi keno I no tsüni.’

⁵ Ikehu panongu no huve. Tithiu pa no puchou lhuba ghuloki lo wuno kütamiqo ghi azüu tholono puhuve.

⁶ Phitsü ghuloki lo pa no alhikishi-alo wu kelo itaghi timi khami tile puthugho aghi keu ithulu. Panoqo vilo pa no iniju, ‘Nongu ye kushiye azükütütüi hile puthugho ani kea?’

⁷ Panoqo no pa khochile, ‘Khunomu ajume ningu piqe nike ghaighi moe.’ Ikehu pa no pi, ‘Tishiaye nongu ghi atsailu lo hulo.’

⁸ Kughou tsüzüve keno, atsailu mpeu no jukükütsüu vilo pi, ‘Aqekiqemi kulo eno ashekhashi hukemi launo huthusü atüghümi kutolo panoqo jume tsüwolo.’

⁹ Phitsü shive kethiuno hukeqo no ighi kelo milakhi khino atsala lo jume ithulu.

¹⁰ Kughou atüghüshi hukeqo no ighi keno, panongu ye ala ithulu nani kepi kümsü ae, ikemu panoqo ghi lakhikhi no aphiphi shi ithulue.

¹¹ Ti ikhipe panoqo no alu mpeu shou muchho

¹² ghi pi, ‘Timi hi ashekhashi hughi kemi ye asüchedo lakhi likhi mla, eno ningu ye atsala kupuju aghimeshi khetsünhe no phuqhi mla akeghi nono ningu tsüke qhemi panongu tsüvae.’

¹³ Ikemu alu mpeu no panoqo gholo lakhi vilo pi, ‘Qele aküsau, ni ye kiumu o pishi püamoe! No ye atsala lakhi jume lono I sasü küghake kumo?

¹⁴ Kiu no ow keno luve no wuvelo. I no o tsüke qhemi ni ye timi ashekhau hukeu ghi tsünike pulovae.

¹⁵ I no akeu pesü kiu shinishi keno ni ye shimlani keshea? Ikeo, Iw tsüjekini ghenguno o nheshuve kea?’

¹⁶ Ikehu ashekhami no atüghümi shive nani eno atüghümi no ashekhami shive nani.”

Jisü no Aküthüu Pa Kithi Vehu pi

¹⁷ Jisü no Jerusalem lo wuche kelo pa khopemi chighikini sasü lomoshi panoqo vilo pi,

¹⁸ “Julo, ningu ye Jerusalem lo iqho cheae, tilau no Timi Nu pesü achinetomi ngo Ayezah shikükami u lo süve tsüno pa pithive penike panongu no ikhiphe tsü nani,

¹⁹ eno ashiaye kütami pelo thogha eno heqhi püzü yedave penike tsüve nani. Tishino pa ye aküthüni no xüputhu nani.”

Aza Lakhi no Qhüiniju

²⁰ Tile Zebedee nuliqo paza no li nuli sasü Jisü lau ighi, eno pa vilo kiuala inijuni ke pa zülo qhoqhünhe.

²¹ Jisü no li vilo iniju, “No ye kiu lunishi ani kea?” Li no khochile, “O yekipe ighi kelo I nu hi pama lakhi no o u ajeu eno lakhi no o u piyiu iqa penike piqhive tsülo.”

²² Ikemu Jisü no khochile, “Nongu no kiu khu ani keno nongu ye mtha aphie. I no shoniye akeu jukhu nongu ye sholu nani keshea?” Pama no khochile, “Nikujo ye tishilu nani.”

²³ Pa no pama vilo pi, “Nokujo ye I jukhu sholu nani, ikemu I u ajeu eno I u piyiu iqani keu ye I gho kumoe, ikemu I Pu no khuno ghenguno kuto püani keno pano salake.”

²⁴ Kughou akhopemi chighi no ti chilu keno, panongu no pama athiazü shou axuideve.

²⁵ Ikemu Jisü no panongu kümtsü kukumqo no pi, “Nongu no ithi anike ashiaye kütami ye yepemi no timiqo shou ampeu shicheni, eno panow kijemi no panoqo shou kükagha peitha cheni.

²⁶ Nongu dolo ye hitoi shimoni. Ikemu nongu gholo milakhi no kije shinishi aye pa no nongu qeu shimasae,

²⁷ nongu dolo khukhumu atüghüu shinishi aye, pa no nongu qüaxeu shimasae.

²⁸ Timi Nu thotsü huthu peniye ighike kumoe, ikemu huthu niyeke, eno timi kutomo ghenguno pa küxü pesü xakipheme shi tsüniye ighike.”

Anhechemi kini Shipivi

²⁹ Panongu no Jericho qhive no wuche kelo aqokitikhi kije no Jisü papeche.

³⁰ Anhechemi kini alaphe lo iqa ae, eno Jisü ye tipa la chenie pi pama no chilu no ighamku, “David Nu, ni kimiyekütü tsülo, Ampeu!”

³¹ Timiqo no pama vilo iqünheive lopi lomipi, ikemu pama no alau ighamku, “David Nu, ni kimiyekütü tsülo, Ampeu!”

³² Jisü no ngove no pama ku püzü iniju, “I pelo nokujo ghenguno kiu shitsü penishi ani kea?”

³³ Pama no khochile, “Ampeu, ni nhethi xükhove tsü penishi ani.”

³⁴ Jisü no pama kimiye qhiyive no pama nhethi lo chotsü, paikhavi no pama nhethi tsükho luve, eno pa pape wuve.