MATTHEW 16 - Sumi Naga CL (Re-edited) Bible (BSI)

Amchipu Khu

¹ Phariseemi ngo Sadduceemi no Jisü lau ighi no pa pejuni ye kungugha lono amchipu piyelo pi khu.

² Jisü no panoqo khochile, “Kughou kijiliu shiveni keno nongu no, ‘Atsütsü ye huchuyi ani keke atsala aloni cheni’ ipi cheni.

³ Eno inaqhe nongu no, ‘Atsütsü ye huchuyi eno züchiyi ani keke ishi ye pasapagha tsala shinani’ ipi cheni. Nongu ye atsütsü lo juno atsala kiu toi nani keno pilu cheni, ikemu ado aghuloki michipuqo kiqilu chemoe.

⁴ Kixikila eno amikucho kumo tiqhelimi no amchipu phucheni, ikemu Jonah michipu nguno alau kütau michipu ye tsümo nani.” Tishino pa ye panoqo qhive no wuve.

Phariseemi, Sadduceemi Kholaqhi

⁵ Kughou akhopemi no azü kathasü tüxau ikughi keno, panongu ye asho süghini keu kümsümave.

⁶ Jisü no panoqo vilo pi, “Phariseemi ngo Sadduceemi kholaqhi jukuto no kutokupui alo.”

⁷ Panongu dolono ishi küptsa kile thuve, “Ningu no asho süghimo kehu pa ye ishi pianie.”

⁸ Ikemu Jisü no ithive no panoqo vilo pi, “Nongu aküpülü kulotiqo, kushiye nongu ye asho süghimo keu vehu küptsa kile ani kea?

⁹ Itehi kutolo nongu ye ithikuthu mla aphi kea? Ashopa pungu pesü timi 5,000 tsükeu eno ashoghi khije nongu no likütsülu keno kümsü luamo keshea?

¹⁰ Momu ashopa tsüni pesü timi 4,000 tsüno ashoghi khije nongu no hekütsülu kea?

¹¹ Ni ye asho vehu piamo kepi kushiye nongu ye vethalumo kea? Phariseemi ngo Sadduceemi kholaqhi jukuto alo.”

¹² Tileno pa ye kholaqhi asho lo peitha chekeu kumono Phariseemi ngo Sadduceemi kükütsü jukuto luvelo pi akenapi panoqo no vethalu.

Peter no Jisü Je Piphetsü

¹³ Kughou Jisü no Caesarea Philippi tokukujo lo ighi keno, pa no pa khopemi vilo ighiju, “Timiqo ye Timi Nu pesü khuu ipi cheni kea?”

¹⁴ Panongu no pi, “Khami no Baptiz kishiu John ipi cheni, khami no Elijah ipi cheni, kütami khami no Jeremiah momu tungkupmi lakhi ipi cheni.”

¹⁵ Panoqo vilo pa no iniju, “Imaye nongu ye ni ye khuu ipi cheni kea?”

¹⁶ Simon Peter no khochile, “No ye aküxüpu Lhou nu Messiah ke.”

¹⁷ Jisü no pa vilo pi, “Jonah nu Simon, no ye akümghapue! Kughengu timi shi aji no o lau hi pephe piyeke kumoe, ikemu I Pu kungugha lo akeu noke.

¹⁸ I no o vilo piani, no ye Peter, eno atuqu hipau shou no I no I kukuhou shipukuni, eno Kithigha khagho ye tipau shou tomla nani.

¹⁹ I no kungugha yekipe khaqhiyi o tsüni, eno ayeghi lo nono kiu kiumu lakhave keu ye kungugha lo ghi lakhaveni; ayeghi lo nono kiu kiumu kuqhove keu ye kungugha lo ghi kuqhoveni.”

²⁰ Tishino Jisü no pa khopemi vilo khuu vilomu pa ye Messiah ipi kevilo pi tsatsai azah shive.

Jisü no Pa Kithi Pichho

²¹ Tipa ghuloki lono Jisü ye pa khopemi vilo tucheche pa ye Jerusalem lo wuno kichimi eno achinetomi ngo Ayezah shikükami u lono ime masa keu, eno pithive no aküthüni no xüthughini keu vehu pithuve.

²² Peter no Jisü kusawo lomipi ghi pi, “Tishimla thono Ampeu! Khilemu o lau hipau shimo nani.”

²³ Ikemu Jisü no tsüghüwo Peter vilo pi, “I launo wuvelo, Satan! No ye I püxa ani, kughengu no ye Alhou kükümsü kumono timi kükümsü ghola lo ani.”

Ow Kros Xapu Jisü Papelo

²⁴ Tishino Jisü no pa khopemi vilo pi, “Khukhumu I papeni keu ye pa ampi milive no paw kros xapu I papelo.

²⁵ Kughengu khunono pano küxü pükhani keno pühave nani, ikemu khunono I ghenguno pa küxü pühaveni keno ti phulu nani.

²⁶ Timi lakhi no ayeghiqha kümtsü paw shive namu pa küxü pühave aye pa ghenguno kiu ala ani kea? Momu timi ye pa küxü theli lo kiu pesü tsülu nani kea?

²⁷ Kughengu Timi Nu ye Papu juküvü lono paw kungumi sasü ighini cheni, eno pa no milakhi khino kiu mla püaghini keno tipau kiqi lono tsüchile nani.

²⁸ Kuchou no I no nongu vilo piani, hile puthugho akemi khami ye Timi Nu no pa yekipe süghi keu ithulu moke kutolo akithi michemo nani.”