MATTHEW 15 - Sumi Naga CL (Re-edited) Bible (BSI)

Apuasü Khuaye eno Azakütsü

¹ Tithiu Phariseemi ngo Ayezah shikükami Jerusalem lono Jisü lau ighi no pi,

² “Kushiye o khopemi ye püzüu apuasü khuaye hexave cheni kea? Kughengu panongu ye chuni kelo pano u mütsü chemoe.”

³ Jisü no panoqo khochile, “Le maye nongu ye kushiye nongu no khuaye pape niye Alhou zakütsü hexave cheni kea?

⁴ Kughengu Alhou no azah tsüke, ‘O pu ngo o za gihulo,’ eno ‘Khukhumu apuaza ghusho keu ye mtsüqheino thive masae.’

⁵ Ikemu nongu no picheni, ‘Khuana no pa puaza vilo, “I no kiu o tsülu kepushi akeno, ti ye Alhou tsüvae” ipive aye,

⁶ pa ye papu gihu amasa kelau kumoe.’ Ikehu nongu khuaye ghenguno Alhou tsa abokümsa shive tsüae.

⁷ Nongu keghilishi keqo! Isaiah no nongu ghenguno achipi shi tungkuptsa pitsü kena:

⁸ ‘Timi hipaqo ye akichi loye I gihu cheni kemu pano mlo ye I launo putou ani;

⁹ Panongu ye abokümsa I mlla, timi no mlakeu yezah pesü Alhou yezah toi shika cheni.’”

Timi Shikuchhube chekeu

¹⁰ Jisü no timiqo pa lau kuno pi, “Inilo eno vethalulo:

¹¹ akichi lo kiu ilo keno tino timi shikuchhube chemoe, ikemu akichi lono ipeghi keu no timi shikuchhube cheni.”

¹² Tileno pa khopemi no pa lau ighi no pi, “Nono pikeu tsa no Phariseemi mlo pünave tsüapi no ye ithi anima?”

¹³ Pa no khochile, “I Pu kungugha lo akeu no shosümo keu sübo thaqhü nhüve nani.

¹⁴ Palokuto lo; panongu ye anhethi kighiche lapiyemi ke. Anhechemi no anhechemi saphe aye, pama kinikujo aqo lo ilove nani.”

¹⁵ Ikemu Peter no pa vilo pi, “Kimghikipiye ni vilo chixechilei pitsülo.”

¹⁶ Jisü no pi, “Nongu ye itehimu vethamla aphi keo?

¹⁷ Kiu kiumu akichi lo ilo keu no akive lo ilove püzü tino tübatüzü shi ipeghive chenie pi nongu ye mtha keshea?

¹⁸ Ikemu akichi lono kiu ipeghi keno ti ye amlo lono huthuphe cheni, eno tino timi shikuchhube cheni.

¹⁹ Kughengu amlo lono alhoksa kükümsü ipeghi cheni, ghikiqhi, asalha, ghaghu ghale, aküpka, akimki shepe, xikishi.

²⁰ Hipaqo no timi shikuchhube cheni kethono au mütsü mono chusho keu no kumoe.”

Canaanmi Topumi Küpülü

²¹ Tishino Jisü ye tipa-a qhive no Tyre ngo Sidon tokukujo lo wuve.

²² Ikelo Canaanmi topumi lakhi tipa cheaxü lo achekeu no pa lau ighi no ighamku pi, “O Ampeu, David Nu, I kimiyekütü tsülo; I nga ye tüghami no shishe ghime ani.”

²³ Ikemu Jisü no atsathi lakhimu li pütsamoe. Pa khopemi no pa qhüiniju pi, “Li puwuve lo, kughengu li ye ighamku ningu pape cheni.”

²⁴ Pa no khochile, “Israel lagha lo püha püakeu mbeqo lau likhi I puwu püanie.”

²⁵ Ikemu li no ighi no pa zülo qhoqhünhe püzü pi, “Ampeu, I kuphu tsülo.”

²⁶ Jisü no li khochile, “Anuliqo chuqupu ikhipe atsüqo zülo pheqhi tsüni keu ye achipi kumoe.”

²⁷ Li no pi, “Iyei, Ampeu, tishinamu atsüqo ghi pano mpeu ghulhu lüpa lo phekiqhi kighi chu chenie.”

²⁸ Tileno Jisü no li vilo pi, “O totimi, o küpülü ye kije kena! Nono pulo aketoi o ghenguno shitsü peniu.” Eno li nga ye tipamtsa viluve.

Jisü no Kutomo Shipivi

²⁹ Jisü no tileno chesü Galilee Züghi mkülo wuve. Pa no naghuto lakhi lo iqho püzü tile iqa ae.

³⁰ Eno aqokitikhi kije no panoqo gholo ayiku küghüpami, anhechemi, aphiau kinitave kemi, atsa pikümlami eno küsükinimi kutomo saghi no Jisü pukhu philo qhitsü; eno pa no panoqo shipivitsü,

³¹ kughou atsa pikümlami no pilu, aphiau kinitave kemi no achipi shive, ayiku küghüpami no alachelu eno anhethi kighichemi no ithulu keno aqokitikhi ye akümzave. Eno panongu no Israel Lhou akishe tsü.

Jisü no 4,000 Loji

³² Tithiu Jisü no pa khopemi pa lau kuno pi, “Ni ye aqokitikhi shou amloighivae kughengu panongu ye atsala küthü kutolo I gholo ngova püzü itehi ye chukepu kiumu kühavae. Eno ni ye akhüava shi panongu puwoveni shiamoe, tikumo aye panongu ye ala lono ikiqive nosae.”

³³ Tileno akhopemi no pa vilo iniju, “Yenguyi ke-a hikithipu lo khile no aqokitikhi kije lojini ke achuqupu lukümkhashi ithuluni kea?”

³⁴ Jisü no panoqo vilo ighiju, “Nongu ye asho khije ani kea?” Panongu no pi, “Ashopa tsüni eno akha aghulo hami ani.”

³⁵ Jisü no aqokitikhi pelo ayeghi lo iqave peniye kichetsü ghi

³⁶ pa no ashopa tsüni eno akha ikhipe shikimthi tsüno süphope pa khopemi tsü, eno akhopemi no tipaqo pesü aqokitikhi tsüe.

³⁷ Panongu kümtsü no aghapiqi chuluve. Eno munomugho chukha kumo akhopemi no ashoghi tsüni kiche kütsülu.

³⁸ Totimi ngo ititunu nguno alau timi 4,000 no chue.

³⁹ Aqokitikhi puwove kethiu Jisü no ashuka lo ikuve no Magadan cheaxü lo wuve.