MATTHEW 13 - Sumi Naga CL (Re-edited) Bible (BSI)

Apitikiveu Kimghikipiye

¹ Tipani Jisü no aki lono ipeve no azüghi phivilo ngoa.

² Ikelo aqokitikhi kije no pa süho luve kehu pa no ashuka lo iku iqave. Eno aqokitikhi kümtsü no azümkü lo puthugho ngove.

³ Pa no kimghikipiye lono thime kutomo pesü panoqo vilo pi, “Apitikiveu no apiti veniye wu.

⁴ Pa no veche kelo, hami no ala lo ikiqive, eno aghauqo no yeighi no mighipe wuve.

⁵ Hami no ayeghi ghüma lo kumono atuli lo ikiqi ikuve, tipaqo ye ayeghi kutho lo kumo kehu paikhavi no thuikughi,

⁶ ikemu kughou khetsünhe ipeghi keno, tipaqo ye püghaqhive. Eno akuhu qüsümo keke tipaqo ye thizümüi hailove.

⁷ Apiti hami no asahuli lo ikiqi iloluke tipaqo ye asahubo no thuikughi püzü ghüsüve.

⁸ Apiti hami no aghüma kivi lo ilolu eno athi pithilu, hami no aqhe piqi, hami no lhotsügho, hami no shighi.

⁹ Khuu no akini ani keno pa no chilu pelo.”

Kimghikipiye Kimji

¹⁰ Tileno akhopemi no Jisü lau ighi no pa vilo pi, “Kushiye no ye kimghikipiye lono timiqo pütsa cheni kea?”

¹¹ Pa no khochile, “Kungugha yekipe tuqhou ithi penike nongu lau tsüvae, ikemu panoqo lau ye tsümphi.

¹² Kughengu khuu lau tsüpüani keno, alau tsü küpha nani, eno pa ye kupukuno shi anani, ikemu khuu no kiumu küha keno, pa no kitila aghikeu ghi luve tsü nani.

¹³ Hi ghenguno I no kimghikipiye lono timiqo pütsa cheni, kughengu panoqo ye ju animu ithulu chemo, ini animu chilu chemo, momu ithikuthulu chemoe.

¹⁴ Panoqo tsa loye Isaiah no tungkuptsa pikeu kuchou no shikupuvae: “‘Nongu no chilu nani kemu khilemu ithikuthumo nani, eno nongu no ithulu nani kemu khilemu vethalumo nani.’

¹⁵ Kughengu timi hipaqo mlo ye kiumu shikalu moae, pano kini ye ini kushughivae, pano nhethi ye miyi luvae, tikumo aye pano nhethi no ithulu, pano kini no chilu, eno pano mlo no ithikuthulu no tsüghü ighi kelo I no panoqo shipivilu nosa kehue.”

¹⁶ Ikemu nongu nhethi no ithulu aphike akümghapue, titoi nongu kini no chilu aphike akümghapue.

¹⁷ Kughengu I no kuchou no nongu vilo piani, nongu no kiu ithulu ani keno tungkupmi ngo amikuchomi kutomo no ithuluni shiche kemu ithumlave, eno kiu chilu ani keno panoqo ghi chiluni shiche kemu chimlave ke.

Apitikiveu Tsa Hephopiye

¹⁸ “Tishiaye, apitikiveu kimghikipiye inilo.

¹⁹ Kughou khuana no Ayekipe Tsa chilu püzü ithikuthu moveni keno, alhoksau no ighi no pa mlo lo yisü mlano akeu piti süxape wuve cheni. Hi no khikhi alaphe lo vesülu keno apiti huke.

²⁰ Atuli lo vesülu keu piti ye Atsa chilu no sü-i khavi alokivishi ti ikhilu keu timi,

²¹ tishimu pa lolo akuhu küha keke pa ye ado hami apüzü kughou Atsa ghenguno aghime momu kijiküpsa ighi keno, pa ye pai pheve cheni.

²² Asahuli lo vesülu keu piti ye Atsa chiluve keu timi, ikemu ayeghi lo küxü no azüküvü shiuve, eno küakini kimne no pishiqhipe Atsa hu ghüsüve, eno ti ye athi pithi move.

²³ Ayeghi kivi lo vesülu keu piti ye Atsa chilu no ithikuthulu keu timi ke. Pa ye kuchou no athi pithi cheni, eno xokütsü kelo hami no aqhe piqi ithulu cheni, hami no lhotsügho, eno hami no shighi.”

Alupi Kimghikipiye

²⁴ Jisü no kimghikipiye kütau pesü panoqo vilo pi, “Kungugha yekipe ye timi lakhi no apiti kivi pesü pa lulo xusüke toie.

²⁵ Akümlami no züake lono aghümi no alupi pewo aghibo gholo yisüve no wuve.

²⁶ Kughou aghibo thuikughi no aghipeuve keno, alupi ghi ipeghive.

²⁷ Aqemi no alu mpeu kilo ighi no pi, ‘Akijeu, no ye apiti kivi xusüke kumo keshea? Maye kishino alupiqo ghi ani kea?’

²⁸ Pa no panoqo vilo pi, ‘Hi ye aghümi no mlavae.’ Ikehu aqemi no pa vilo pi, ‘Tishiaye no ye ni pelo wuno alupiqo mxave tsü penishi anima?’

²⁹ Ikemu pa no pi, ‘Moe, kughengu nongu no alupi mxa ake lono aghibo ghi nhü küqhave nosae.

³⁰ Ghile tomoke kutolo küma kümtsa thuwu aghi pelo, eno ghile ghuloki lono I no ghilemi vilo pini, “Atüghüshi alupiqo nhüpe piti nike piqhe khavelo, ikemu athi thaqhü no pewo I lelo sülo.”’”

Aghanethi eno Kholaqhi

³¹ Jisü no kimghikipiye kütau panoqo vilo pi, “Kungugha yekipe ye timi lakhi no alu lo aghanethi vesüke toie.

³² Aghanethi ye alothi kümtsü nguno aghulou kemu kughou tino thuipeghi keno, aghutu lo atsünibo jeli kümtsü nguno akuloghiu shive no asübo toive cheni, ikehu aghau jeli ighi no tipau lokaqo lo apüsü mla cheni.”

³³ Itaghi Jisü no kimghikipiye kütau panoqo vilo pi, “Kungugha yekipe ye kholaqhi toike. Totimi lakhi no ti au kichhi lakhi pewo ashomkhu ashoghi kichhi lakhi gholo xukütshü kelo ti kümtsü ingu ipeghive chekeu toike.”

Tungkuptsa eno Kimghikipiye

³⁴ Jisü no kimghikipiye lono atsa hi kümtsü pesü aqokitikhi vilo piche, kuchou no pa ye kimghikipiye sümo kelo panoqo vilo kiumu pimoe.

³⁵ Hi ye tungkupu no kiu pipüa keno shikupu niye ke: “I no kimghikipiye lono pinike I kichi xükhoni; ayeghi boqha gho kelono kiu küsü püache keno I no pini.”

Alupi kimghikipiye Hephopiye

³⁶ Tithiu Jisü no aqokitikhi qhive no aki lo ilove. Eno pa khopemi no pa lau ighi no pi, “Alupi kimghikipiye ningu lau hephopiye tsülo.”

³⁷ Pa no khochile, “Apiti kivi xusü keu ye Timi Nu.

³⁸ Alu no ayeghiqha, apiti kivi huno Ayekipe tianuliqo, eno alupi no alhoksau tianuliqo ke.

³⁹ Eno khuu alupi yisüve tsü keno, ti aghümi huye tüghami ke. Ghile huno tiqheli shekuho, eno ghilemi no kungumi ke.

⁴⁰ Alupiqo thaqhü piqhe küqhape ami lono pitive ketoi, tiqheli shekuho lo ghi titoi nani.

⁴¹ Timi Nu no paw kungumi puwu no pa kükaqha lo axine kuhu aghü eno küsaküghami kümtsü panoqo no xukumqo nani,

⁴² eno panoqo pesü amiqo lo vesüve nani. Tile küqa kumlo eno ahu tsüghü bubushi nani.

⁴³ Ikemu amikuchomi ye panongu Papu kükaqha lo khetsünhe toi vünani. Khuu no akini ani keno pa no chilulo.

Küsü püakeu Kinikhuki

⁴⁴ “Kungugha yekipe ye alu lo akinikhuki küsü püake toike. Timi lakhi no tipau chhuphelu püzü itaghi jonhave no pa lokivi lono idewo pa no aghikeu qhoi jekütsüpe alu tipau qhüluve.

Amekusho Mlapuchi

⁴⁵ “Itaghi, kungugha yekipe ye küqhükilimi no mlapuchi kivi phu cheke toike.

⁴⁶ Pa no ighono amekusho mlapuchi kivi ithulu kelo idewo pa no aghikeu qhoi jekütsüpe tipau qhüluve.

Akhame Kimghikipiye

⁴⁷ “Itaghi kungugha yekipe ye akhame lakhi azüghi lo vesü kelo akha jeli kümtsü velu chekeu toike.

⁴⁸ Kughou akhame kichhishi veluni keno, timiqo no amkü lo sünhe saipe qhino akha kivi kishepe pano qhupu lo süve, ikemu alhoksa thaqhü ye peve.

⁴⁹ Tiqheli shekuho lo ghi titoi nani. Kungumi no ipeghi no amikuchomi launo alhoksami kishephe luve nani,

⁵⁰ eno panoqo ye pesü amiqo lo vesüve nani. Tile küqa kumlo eno ahu tsüghü bubushi nani.

⁵¹ “Nongu ye hi kümtsü ithikuthu luve akema?” Panoqo no, “Iyei” ipi.

⁵² Pa no panoqo vilo pi, “Tighenguno Ayezah shikükami khuu pesü kungugha yekipe ghenguno qophe luve akeno, pa ye aki mpeu toike. Pa kinikhuki lono thime kiu no akithe eno kiu no aqa keno kümtsü ikhiphelu cheni.”

Nazareth lo Jisü Kileve

⁵³ Kughou Jisü no kimghikipiye hipaqo pitave keno, pa ye tileno wuve,

⁵⁴ eno pa phughi lo ighi kelo pa no sinagog lono timiqo kütsü, ikelo panongu no ighono akichiqhive no pi, “Timi hipau ye khile no alokütsü eno akumto kümla shinikeu ithulu kea?

⁵⁵ Pa ye asü kümlau nuke kumo? Paza je Mary ke kumo? Eno James, Joseph, Simon ngo Judas noqo ye pa thiküzümi ke kumo?

⁵⁶ Pa chelimiqo ye ningu gholo acheni ke kumo keshea? Tishiaye pa ye khileno thime hipaqo ithulu kea?”

⁵⁷ Eno panoqo no pa kileve. Ikemu Jisü no panoqo vilo pi, “Tungkupu lakhi ye pa punugha eno pa kibo lono kumo aye khilehi mu agigihu kühave chemoe.”

⁵⁸ Eno panoqo no pülü mlaveke ghenguno pa ye tile akümzapu kümla kutomo shimove.