MATTHEW 11 - Sumi Naga CL (Re-edited) Bible (BSI)

Baptiz Kishiu John Ghinimi

¹ Kughou Jisü no pa khopemi chighikini lau akükütsütsa tsüve keno, pa ye tileno chesü aphughiqo lo shika eno kütsü nike wuve.

² Baptiz kishiu John no akughuki lono Khristo kümla ghili chilu kelo, pa khopemi launo pa no atsa pi puwu,

³ eno Jisü vilo pi, “Milakhi khuu ighi niye akeno tihu no keo, ningu ye kütami juwulo pi kea?”

⁴ Jisü no panoqo khochile, “Wuno John vilo nongu no kiu chilu eno ithulu keno pilo;

⁵ anhechemi no ithulu ani eno apukhu kighichemi no ala chelu ani, apüghami shikimthelu ani, akini kughupomi no chilu ani, kithimi xüputhu ani, eno atsakiviu pesü sheshu kelo kumlhomi no ikhilu ani.

⁶ Khunono I jupe apukhu püsü moni keno akümghapue.”

⁷ John khopemi no idewo chekelo, Jisü no aqokitikhi vilo John ghili pithuve: “Nongu ye yenguyi ke-a lo kiu juniye wu kea? Amülhü no ayeghü fukini keu keo?

⁸ Tikumo aye kushiye wu kea? Timi lakhi akümtsha eno amekusho phimini pepu aghikeu keo? Julo, khunoqo no akümtsha phimini pepu cheni keno, panongu ye kükami kilo acheni.

⁹ Tishiaye nongu ye kiu juniye wu kea? Tungkupu keo? Iyei, tishi pütsae, I no nongu vilo piani, pa ye tungkupu kütami nguno akijeu ke.

¹⁰ Hi yepüa keu ye pa ghenguno ke, ‘Julo, I ghinimi khuu no o züuno o laghi kutotsü nani keno, I no o züuno pa puwu ani.’

¹¹ Kuchou no I no nongu vilo piani, totimi no punu keqo gholo timi khumu Baptiz kishiu John nguno akijeu ipeghi mphi. Tishimu kungugha yekipe loye khuu no kütami nguno akitilau keno pa no Baptiz kishiu John nguno akijeu ke.

¹² Baptiz kishiu John ghuloki lono ishi kutolo kungugha yekipe ye alhoksa küka sasü küpüghü eno ngukangughami no ayeghi lo pano kumto pesü süxa luveni ke pükapütsa ighivae.

¹³ Kughengu Moses Yezah eno Tungkupmi kümtsü no John ghuloki kutolo hipau yekipe vehu pikibe ighi,

¹⁴ eno nongu no tipaqo tsape ikhilu aye, John huno ighi nanie piche keu Elijah ke.

¹⁵ Khuu no chikulu kini ani keno pa no chilulo.

¹⁶ Ikemu ni ye kiu pesü hipa tiqhelimi kimhe tsüni kea? Ti ye itimiqo no alhikishi-a lo iqa no ilini ke pano qhejoqo kusü aketoi ke,

¹⁷ “‘Nino no ghenguno fulili igha kemu nongu no ilhemoe; nino akumlo le phe kemu nongu no amloiju moe.’

¹⁸ Kughengu John no kuchu-kusho shimo no ighi kelo timiqo no pi, ‘Pa philo tüghami ani.’

¹⁹ Timi Nu no ighi kelo pa ye chuqu-kusho lemoe, ikelo timiqo no pi, ‘Julepi! Pa ye akimnhemi eno shokümzümi, asüqha küqhami ngo khalaumi küsau ke!’ Tishimu Alhou lokütsü huno achipiu kepi akümla lono piyeve nani.”

Xaidemo keu Phughiqo

²⁰ Tishino Jisü no aphughi khipaqo lo pa no akümzapu kümla shipüa keno, tipaqo no xaidemo kehu sakiyi thuve.

²¹ “Chorazin, o hasapue! Bethsaida, o hasapue! Kughengu nongu lau aküka kumto kümla shikeu hu Tyre ngo Sidon lau shi püaghi keaye, tipaqo ye khaghi no yeqhiyephi pepusü ayevu lo ihino xaideve aghini cheke.

²² Ikemu I no nongu vilo piani, küghakütha tsala lo Tyre ngo Sidon no nongu nguno aghimepu mthüthei puqhelu nani.

²³ Eno no, Capernaum, no ye atsütsü kutolo o süqheni shi ani kea? No ye Kithigha lo sünhe piqive nani. Kughengu o lau akümzapu kümla shikeu no Sodom lau shipüaghi keaye, tipa phughi ye ishi kutolo puthugho aghini cheke.

²⁴ Ikemu I no nongu vilo piani, küghakütha tsala lo Sodom yeghi no nongu nguno aghime puqhekulupu shinani.”

I lau Ighi no Akulhoqhi lo

²⁵ Tipa tüqhüdo lo Jisü no pi, “Apuo, kungugha eno ayeghi Mpeu, I no O shikimthi ani, kughengu nono thime hipaqo pesü ayeghi lo lokütsümi ngo ithikuthu kemi launo küsüve no hi itimi kititiqo lau pephe tsüke;

²⁶ iyei, Apuo, kughengu hitoi shinikeu no O pulou shiake.

²⁷ I pu no thime hi kümtsü pesü I lau kuchoqhive tsüae, Apu likhino kumo aye khunomu Anu mthae, tihutoi Anu eno pa gholo khukhumu pa no Apu ithi penike kishephe keu no kumo aye khunomu Apu mthae.

²⁸ Khunono akho kimshi xapu akulho shive akeno kümtsü I lau ighilo, eno I no akulhokiqhi nongu tsüni.

²⁹ Iw kuokhasü ikhipe xapulo, eno I launo shikalu lo, kughengu ni ye ivünhei eno aqhokighemi, eno nongu ngulho ghenguno nongu no akulhokiqhi ithulu nani.

³⁰ Kughengu Iw kuokhasü ye pepu kivi eno I pekimshi ye mthüthei ke.”