MATTHEW 10 - Sumi Naga CL (Re-edited) Bible (BSI)

Apostolmi Chighikini

¹ Tishino Jisü no akhopemi chighikini pa lau kukumqo no panongu pelo aghau lhoksaqo qhasülu eno haphelu penike, eno aküsü ghime jeli kümtsü shipivilu penike aküka tsü.

² Apostolmi pano chighikini je ye: atüghüshi, Simon, khuu Peter ipiche keno, eno pa thiküzüu Andrew; Zebedee nu James, eno pa thiküzüu John;

³ Philip eno Bartholomew; Thomas eno asüqha küqhau Matthew; Alphaeus nu James eno Thaddaeus;

⁴ Aza yeghi kikimiyeu Simon; eno Jisü thechuve keu Judas Iscariot.

Jisü no Chighikini Puwu

⁵ Jisü no pano chighikini lau akükütsütsa tsüno puwu, “Jewkumomi lau momu Samariami phughi lo wu kevilo,

⁶ ikemu Israel lagha lo püha püakeu mbeloji lau wulo.

⁷ Nongu no wuche kelo ishi sheshu lo, ‘Kungugha yekipe ye kupunu khoivae.’

⁸ Küsükinimi shipivi lo, kithimi xüputhu lo, apüghami shikimthe lo, tüghami haphelo. Ame tsümono nongu no ithulu kehu ame lumono tsülo.

⁹ Ameshoyi, ghükayi, momu asapuyi pisa achekha lo pusü wu kevilo,

¹⁰ nongu ghüzüla lo süqhu pewu moni, momu aphiküzü ala na, apukhuqho na, aküsü namu pemoni, kughengu akümlakishiu ye pa no avehupu shikeu ithulu küzüke.

¹¹ Aphughi lona aphu lomu nongu no ilo kelo, khuu no gihuküzüpu eno titoi nongu ikhiluni keno nongu no phujulo, eno tipa-a qhimoke kutolo nongu ye tile ngolo.

¹² Nongu no aki lo ilo kelo, alovi petha shilo.

¹³ Eno akibo tipau lo ngoküzüpu shi aye, nongu no aloino keu inibe tsülo, ikemu akibo tipau no aküzüpu kumo aye, nongu kighini ikhichile luvelo.

¹⁴ Tsala khunomu nongu sasümo momu nongu tsa ini tsümo aye, nongu no aki momu aphughi tipau qhive no ipeche kelono nongu pukhu lo ayeghimkhu ikuve keu ghi kukhu qhivelo.

¹⁵ Kuchou no I no nongu vilo piani, küghakütha tsala lo Sodom ngo Gomorrah ghimeu no tipano ghami nguno puqhekulu shinani.

Shikimghi Ighi nani

¹⁶ “Julo, ambe no tüngtügha dolo ilolu akeshi I no nongu puwu ani, tighenguno apighi toi tsükhüi lo eno miqhedu toi ivünheilo.

¹⁷ Timiqo jukuto lo, kughengu panongu no nongu sasü pano hoho zülo wunani eno sinagog lono akighikipili pesü nongu heqhi nani,

¹⁸ nongu sünhe sasü angh ngo kükamiqo lau wunani, ti ye panoqo eno Jewkumomi zülo I je ghenguno ashepe shilu peniye ke.

¹⁹ Kughou panongu no nongu küghani keno, nongu ye kishi pini momu kiu pini kea pi kütakihi kevilo, kughengu nongu no kiu pikepu keno, atüqhüdo ighi kelono nongu tsü nani.

²⁰ Kughengu atsa pini keu ye nongu no kumoe, ikemu nongu Papu Ghungu no nongu vecheo pi nani.

²¹ Athiküzü achelimi dolo lakhino lakhi pithive penike tsüve nani, apu ngo atianuli dolo, eno atianuli ngo apuaza dolo ighü mono pithive penike ikhiphe tsü nani,

²² I je ghenguno timi kümtsü no nongu mithi nani. Ikemu khuu no ashekha kutolo puqhe luni keno, pa xalu nani.

²³ Kughou aphughi lakhi lono nongu pishipujuni keno, kütau lakhiu lo povelo, kughengu I no kuchou no nongu vilo piani ke nongu no Israel lo aphughi kümtsü lo wumphi lono Timi Nu ighive nani.

²⁴ “Akhopeu lakhi ye pa kükütsüu nguno akijeu kumoe, momu aqüaxeu ye pa mpeu nguno akijeu kumoe.

²⁵ Akhopeu ye pa kükütsüu kimihi shilu keu no lukümkhae, tihutoi aqüaxeu ghi tishike. Timiqo no akibo mpeu vilo Beelzebul ipi kucheni aye, pa kibolomi kütami vilou ye kishi aje küsa tsünani kelae.

Msa Kevilo

²⁶ “Ikehu panoqo msa kevilo, kughengu thime lakhimu pephe mono nhave keu shimo nani, momu ithi pemono küsüve keu shimo nani.

²⁷ I no aküzü lono nongu vilo kiu piani keno, aküvü lono pilo, eno nongu no kiu aqhou tsa chilu ani keno, aki kütsüqa lono sheshulo.

²⁸ Khunoqo no aphimpi pithivetsü cheni mu angulho ye pithilu chemo keno, nongu ye panoqo msa kevilo. Tishini kepu ye Alhou khuu no alhomi lono aphimpi ngo angulho kütsalu nani keno, Pa msalo.

²⁹ Tüghashoqhi kini ye pisa muno me qhemike kumo? Ikeghi nongu Papu sümo keloye tipaqo lakhimu ikiqimo nani.

³⁰ Eno nongu ghengu ye no kütsüsa kutolo kihipe püani.

³¹ Tighenguno msa kevilo, nongu ye aghau kümtsü nguno ameküapu ke.

³² Tishiaye khukhumu aqha zülono I je piphetsü keu ye ni ghi I pu khuu kungugha lo ani keno, Pa zülono piphetsü nani,

³³ ikemu khukhumu aqha zülono ni milive keu ye ni ghi I pu kungugha lo akeu zülono milive nani.

Alakishi Kumono Azüta

³⁴ “Ni ye ayeghi lo alakishi süghini ye ighi anipi kümsü kevilo. Ni ye alakishi kumono azütakikihi süghi niye ke.

³⁵ Kughengu I no ighi keu ye anu no apu hebide, anga no aza hebide, eno amukishiu no ani hebide peniye ke,

³⁶ tishikeu lono timi lakhi ghümi kuchou ye pa kibolomi no shinani.

³⁷ Khukhumu apu momu aza kimiye akeu nguno alau I kimiyemo keu ye I laumi shiküzüpu kumoe, eno khukhumu apuanga kimiye akeu nguno alau I kimiyemo keu ye I laumi shiküzüpu kumoe.

³⁸ Khunono paw kros xapu mono I papeni keno pa ye I laumi shiküzüpu kumoe.

³⁹ Khunono pa küxü pükhani keno pühave nani, eno khunono I je ghenguno pa küxü pühaveni keno phuluve nani.

Asaxü

⁴⁰ “Khukhumu nongu ikhilu keu ye ni ikhilu ani, eno ni ikhilu keu ye I puwu keu ghi ikhilu ani.

⁴¹ Tungkupmie pikeu je lono khuu no alokivishi tungkupmi ikhiluni keno tungkupu saxü ithulu nani, eno khuu no timi lakhi ye Alhou lopushi xüche kemi kepi ithi no pa ikhiluni keno, Alhou lopu saxü ithulu nani.

⁴² Khuu no I khopemie pikeu je lono azü kumko ajukhu lakhi pesü hipaqo gholo aghulou piyeni keno, kuchou no I no nongu vilo piani, pa ye kiu gholau nomu asaxü pühave monani.