MATTHEW 1 - Sumi Naga CL (Re-edited) Bible (BSI)

Jisü Khristo Puasü

¹ Jisü Khristo, David nu, Abraham nu, puasüqo laghaphi kaku.

² Abraham nu Isaac, Isaac nu Jacob, Jacob nu Judah ngo pa thiküzümi,

³ Judah nu Perez ngo Zerah, Tamar vecheo punu keu, Perez nu Hezron, Hezron nu Ram,

⁴ Ram nu Amminadab, Amminadab nu Nahshon, Nahshon nu Salmon,

⁵ Salmon nu Boaz, Rahab vecheo punu keu, Boaz nu Obed, Ruth vecheo punu keu, Obed nu Jesse,

⁶ eno Jesse nu akükau David. David nu Solomon, Uriah nipu vecheo punu keu,

⁷ Solomon nu Rehoboam, Rehoboam nu Abijah, Abijah nu Asaph,

⁸ Asaph nu Jehoshaphat, Jehoshaphat nu Joram, Joram nu Uzziah,

⁹ Uzziah nu Jotham, Jotham nu Ahaz, Ahaz nu Hezekiah,

¹⁰ Hezekiah nu Manasseh, Manasseh nu Amos, Amos nu Josiah,

¹¹ Josiah nu Jeconiah ngo pa thiküzümi, Babylon lo kughu sawuve keu ghuloki kutolo hi no apuasüqo ke.

¹² Babylon lo kughu sawuve kethiu: Jeconiah nu Shealtiel, Shealtiel nu Zerubbabel,

¹³ Zerubbabel nu Abiud, Abiud nu Eliakim, Eliakim nu Azor,

¹⁴ Azor nu Zadok, Zadok nu Achim, Achim nu Eliud,

¹⁵ Eliud nu Eleazar, Eleazar nu Matthan, Matthan nu Jacob,

¹⁶ eno Khristo ipi chekeu Jisü ye Mary, khuu Jacob nu Joseph nipu keno, li vecheo punu.

¹⁷ Ikehu Abraham lono David kutolo tiqheli chighibidi, titoi David lono Babylon lo kughu sawuve keu kutolo tiqheli chighibidi, eno Babylon lo kughu sawuve keu lono Khristo kutolo no tiqheli chighibidi ishike.

Jisü Khristo Punu

¹⁸ Jisü Khristo ye hitoi punu: Paza Mary ye Joseph sasü akibo shinike küsükha kileve no ache, ikemu pama no kümtsa küghüna mphi lono li ye Aghungu Kimthe launo mishipuve aghikeu ithulu.

¹⁹ Li kimi shiniye akeu Joseph ye müzüchoi kemi eno aqha zülono li pelo tichetighe shive penishimo kehu mükhano ashoileveni pi kümsüve.

²⁰ Ikemu pa no hipa vehu kümsükuto ake lono julo, Ampeuw kungumi lakhino asamou no pa lau ipeghi no pi, “David nu Joseph, Mary pesü o nipu shinikeu msa kevilo, kughengu li no khikhi mishipu ani keno ti ye Aghungu Kimthe launo ke.

²¹ Li no anu lakhi punu nani, eno no ye pa je Jisü kutsü nani, kughengu pa no paw timiqo pano xine lono xalu nani.”

²² Hi kümtsü shikeu ye Ampeu no tungkupu vecheo kiu pipüa keno shikupu niyeke:

²³ “Julo, ilimi huno mishipuve no anu lakhi punu nani, eno panongu no pa je Immanuel kutsü nani” (Immanuel kiqi ye Alhou no ni gholo ani).

²⁴ Kughou Joseph no idathughi keno, Ampeuw kungumi no azah tsükeu kiqi lono pa no titoi shive, eno Mary pesü pa nipu shive,

²⁵ ikemu li no anu punu moke kutolo pama ye ashiaji küqhamoe. Tithiu pa no anu je Jisü kuvetsü.