Mark 9 - Sumi Naga CL (Re-edited) Bible (BSI)

¹ Tishino panoqo vilo pa no pi, “Kuchou no I no nongu vilo piani, hile puthugho akemi dolo khami ye Alhou yekipe aküka kumto lono ighi keu pano nhethi no ithulu moke kutolo akithi michemo nani.”

Ajuhi Kikili

² Atsala tsügho thiu Jisü no pa gholo Peter eno James ngo John sasü panoqo likhi atoghi kiqhe lo iqho. Eno tilau panoqo zülono Jisü ye ajuhi kilive,

³ pa phimini no phuphushi ipeghive no ayeghi lo aphimini shikütsüghü chekeu thime nomu shimla kepushi shishe metsüghoive.

⁴ Tileno panongu zülo Elijah ngo Moses ipeghi, eno pama no Jisü sasü küptsa ae.

⁵ Peter no Jisü vilo pi, “Rabbi, ningu no hile aghi keu ye achipi shivae. Ningu apusho küthü mlani, lakhino o sala, lakhino Moses eno lakhino Elijah sala.”

⁶ Peter ye kiu pikepu keno mthave, kughengu panongu ye thüghüive ke.

⁷ Tile khüngküsü phoighi no panongu küzü luve, eno asütsa lakhi khüngküsü lono ipeghi, “Hi no I Nu I qhuu, pa tsa inilo.”

⁸ Paikhavi panongu no homxawo jukelo Jisü likhi thono khumu ithumlave.

⁹ Panongu no naghuto lono iqiche kelo Jisü no panoqo vilo akithi lono Timi Nu xüputhu moke kutolo panoqo no kiu ithulu keno khuu vilomu pipemo nike ghutuve.

¹⁰ Ikehu panoqo no tipa tsa ye panongu dolo likhi qhiluve, ikemu akithi lono xüthughini keu vehu ye kiu keno ighijua.

¹¹ Akhopemi no pa vilo ighiju, “Kushiye Ayezah shikükami ye Elijah paghi ighi masae picheni kea?”

¹² Pa no khochile, “Elijah paghi no thokha kümtsü athoputho tsünike cheni. Maye kushiye Timi Nu no aghime shimasa keu eno pa kiphikumo shi kileveni keu ghili yepüani kea?

¹³ Ikemu I no nongu vilo pi anike Elijah ye ighivae, eno pa ghili yepüake toi timiqo no kiu kiumu panongu no pulo keu ghola lono pa lau mlake.”

Tüghaküsa Akeu Itimi Shipivi

¹⁴ Panongu no akhopemi kütami lau ighi kelo aqokitikhi kije no vehope Ayezah shikükami sasü kütsala aghi keu panongu no ithulu.

¹⁵ Aqokitikhi no Jisü ithulu kelo panongu ye shishe akümzave no mtazü pa lau posü wuno petha shi.

¹⁶ Pa no akhopemi kütami vilo ighiju, “Nongu ye panoqo sasü kiu kütsala ani kea?”

¹⁷ Aqokitikhi gholo milakhi no khochile, “Akükütsüu, I no I nu sasü o lau ighike, kughengu atsa pikümla ghawu no pa philo ani.

¹⁸ Tino pa tsüqüpe ayeghi lo kuluqhive cheni, anu kichi lono mlaghubei ipeghi püzü ahu tsüghü no choshiyi ngove cheni. Ikehu I no o khopemi vilo hapheve tsülopi kemu shimlave.”

¹⁹ Jisü no panoqo vilo pi, “O aküpülü küküha tiqhelimio, ni ye khitohi nongu gholo anani kea? Ni ye khitohi nongu khea lopi kea? Anu hilau saghi lo.”

²⁰ Panongu no anu sasü pa lau ighi, eno kughou aghawu no pa ithulu keno, paikhavi no anu tsüqüpe sükuchoqhi thuve, anu ye ayeghi lo ikiqive no akichi lono mlaghubei püzü ihi thuve.

²¹ Jisü no apu vilo ighiju, “Anu lau hitoi shisü ighikeu ye ado khitohi shive akea?” Apu no khochile, “Iti lonoe.

²² Ghuthu kutomo aghawu no anu pithive nike ami eno azü lo ghi vesü ighivae. Nono kiu kiumu shikulupu shiaye ni kimiyekütü no kuphu tsülo.”

²³ Jisü no pa vilo pi, “Nono shikulupu shiaye ya? Khuu no pülüni keno pa ghengu ye thokha shikulupu ani thono.”

²⁴ Paikhavi apu no ighamku pi, “I no pülü ani; I küpülü kutokumo kuphu tsülo!”

²⁵ Kughou aqokitikhi no aqoshi posü cheghi keu Jisü no ithulu keno, pa no mithekumo ghawu sakiyi no pi, “No tsapimo eno akinikughupo ghawu, I no azah o tsü ani, pa launo ipeve no khilemu ideilo kevilo.”

²⁶ Aghawu no anu sükuchoqhive kethiu ighasü ipeve, eno anu ye asükumo toive kehu timi kutomo no pi, “Pa ye thivae.”

²⁷ Ikemu Jisü no anu u lono sünhe puthu, eno kuchono pa ye ithughive.

²⁸ Jisü no aki lo ilove kethiu akhopemi no lomoshi pa vilo ighiju, “Kushiye ningu ye ti haphe mlave kea?”

²⁹ Pa no khochile, “Hitoi keu ye akighini no kumo aye kütau kiu nomu shimlae.”

Jisü no Pa Kithi eno Xüchilekulu Pikithe

³⁰ Tithiu panongu ye tileno chesü Galilee lo wuve. Ikemu pa ye khuu pelomu ithi penishi mono ae,

³¹ kughengu pa no ishi akhopemi kütsüshika che, “Timi Nu ye küghape timiqo u lo phesüve tsü nani. Panongu no pa pithive nani, eno atsala küthü thiu pa ye ithughive nani.”

³² Ikemu panongu ye hipa tsa vethamlae, eno pa vilo inijuni keu ghi msave.

Khuu no Akijeu Kea?

³³ Panongu no Capernaum lo ighi no aki lakhi lo akelo Jisü no akhopemi vilo ighiju, “Nongu ye ala lo kiu küptsa chekea?”

³⁴ Ikemu panongu ye ala lo khuu no akijeu kea pi kütsala chekehu inaqhoive.

³⁵ Pa no iqave no pano chighikini kukumqo no pi, “Khukhumu atüghüu shinishi aye, pa no kümtsü nguno ashekhau eno kümtsü qeu shimasae.”

³⁶ Pa no itimi lakhi sawo panoqo mta lo qhino pa u no khape luve püzü pi,

³⁷ “Khunono I je lono itimi hitoike lakhimu ikhiluni keno ni ikhilu ani, eno khunono ni ikhiluni keno, ni kumono I puwu keu ikhilu ani.”

Ni Külamo Kemi ye Ni Ngulami

³⁸ John no Jisü vilo pi, “Shikükau, ningu no milakhi o je lono tüghami haphe aghike ithulu, eno pa ye ni papemi kumo kehu ningu no pa lakha niye shie.”

³⁹ Ikemu Jisü no pi, “Pa lakha kevilo, kughengu khunomu I je lono itehi akümzapu kümla shi apüzü kutou ye I shou atsa lhoksa pipuku monani.

⁴⁰ Kughengu khuu no ni küla moni keno ni ngulami ke.

⁴¹ Kuchou no I no nongu vilo piani, nongu no Khristo laumike ghenguno khuu no azü ajukhu lakhimu nongu piyeni keno, pa saxü ye kiu gholau nomu pühave monani.

Axine Shive penike Ghuju

⁴² “Khuu no I pülü chekemi itimi hipaqo gholo akitilau pelomu küpxape axine lo ilove peni keno, pa ghengu ye athikütsüghü tuqu kije pesü pa kuo lo tshüqhi pipe no azüghi lo vesüve pekeu pavi nani.

⁴³ Ikehu o u no o pelo axine shipe cheghi aye micheve lo. O ghenguno au kini xapusü ghapinhe kümlapu miyizü lo ilove kepu ye au kinitave no aküxüpu lo ilolu keu pavi.

⁴⁴ (Tile pano pithe ye thive chemo, eno ami ye inheve chemoe.)

⁴⁵ O pukhu no o pelo axine shipe cheghi aye micheve lo. O ghenguno apukhu kini xapusü amiyizü lo vesüvepe kepu ye apukhu kinitave no aküxüpu lo ilolu keu pavi.

⁴⁶ (Tile pano pithe ye thive chemo, eno ami ye inheve chemoe.)

⁴⁷ O nhethi no o pelo axine shipe cheghi aye lejove lo. O ghenguno anhethi kini xapusü amiyizü lo vesüvepe kepu ye anhethi lakhi xapusü Alhou yekipe lo ilolu keu pavi,

⁴⁸ ‘tile pano pithe ye thive chemo, eno ami ye inheve chemoe.’

⁴⁹ Amti pesü thokha shipüxü cheke toi ami pesü timi kümtsü ghukimthe nani.

⁵⁰ Amti ye aloe, ikemu amti no aküqhü kühave aye, nongu ye kishino tipau qhümzai kithelu nani kea? Nongu lolo amti küqhü alo, eno lakhino lakhi sasü aloino alo.