Mark 8 - Sumi Naga CL (Re-edited) Bible (BSI)

Jisü no Qhethonhe bidi Loji

¹ Tipa ghuloki lo kughou aqokitikhi no kumqope akelo itaghi timiqo ye chukepu kiumu kühave keno, Jisü no pa khopemi kuno pi,

² “Ni ye aqokitikhi lau amlo ighiqhiyi ani, kughengu panongu ye I gholo hi atsala küthü ngova püzü kiumu chukepu kühavae.

³ I no panoqo pelo müzüthi aki lo wovepe aye, panongu ye ala lono ikiqive niae, eno khami ye aghacheu no ighi kemike.”

⁴ Akhopemi no pa khochile, “Kishino yenguyi ke-a hitoi kelono achuqupu pesü timi hijeje loji luni kea?”

⁵ Pa no ighiju, “Nongu ye asho khije ani kea?” Panoqo no pi, “Tsüni.”

⁶ Pa no aqokitikhi pelo iqave penike mije tsüno asho tsüni ikhipe shikimthi tsü, eno süphope timiqo kijetsü penike akhopemi u lo sütsü; akhopemi no titoi aqokitikhi lojive.

⁷ Itaghi khami u lo akha kititiqo hami aghi. Pa no shikimthi tsüno hipaqo ghi pewo timiqo kijetsü lopi.

⁸ Timi kümtsü no chuve püzü aghapiqi luve. Tithiu munomugho ala ipeghi keu timiqo no ashoghi tsüni chhitoto kichekütsü lue.

⁹ Tipani tile timi qhethonhe bidi qhalo ae, tishino pa no timiqo küghüxa puwo khave.

¹⁰ Paikhavi no pa ye akhopemi sasü ashuka lo ikuve no Dalmanutha bocho lo wuve.

Phariseemi no Amchipu Khu

¹¹ Phariseemi no ighi no Jisü pejuni ke kungugha lono amchipu hami piye lopi pa sasü kighe thuve.

¹² Pa no amlo alou no atuthu akuloghiu shephe no pi, “Kushiye hipa tiqhelimi ye amchipu phu acheni kea? I no mtsüqheino nongu vilo piani, hipa tiqhelimi lau amchipu kiumu tsümo nani.”

¹³ Tishino pa ye panoqo qhive no itaghi ashuka lono azüghi tüxau wuve.

Phariseemi ngo Herod Kholaqhi

¹⁴ Akhopemi no asho pewu kümsümave no lakhi likhi aghive.

¹⁵ Jisü no panongu ghutu ghi pi, “Jukuto lo; Phariseemi ngo Herod kholaqhi lono tsükhüi shilo.”

¹⁶ Panongu no lakhino lakhi dolo asho pemo keu tsau küptsa thuve.

¹⁷ Jisü no vethalu akehu panoqo vilo pi, “Kushiye nongu ye asho pemo keu tsau küptsa ani kea? Nongu ye itehi mu pimhelu momu vethalu mphi keshea? Nongu mlo mkamghai ani keo?

¹⁸ Nongu ye anhethi apülaghi ithumla, akini apülaghi chimla keshea? Nongu ye kümsüchile luamo keshea?

¹⁹ Kughou I no qhethonhe pungu ghenguno asho pungu süpho keno, nongu ye munomugho ashoghi kichhi khije kichekütsülu kea?” Panongu no khochile, “Chighikini.”

²⁰ “Itaghi qhethonhe bidi ghenguno asho tsüni süpho kelo, nongu ye munomugho ashoghi kichhi khije kichekütsülu kea?” Panongu no pi, “Tsüni.”

²¹ Tile pa no pi, “Tishi keghi nongu ye vethalu mphi keshea?”

Bethsaida lo Anhechemi Shipivi

²² Panongu no Bethsaida lo ighi kelo, timi khami no anhechemi lakhi sasü Jisü lau ighi no pa u betsü penike qhüiniju.

²³ Jisü no anhecheu sünhepe aphu khalau ipeve, eno pa no amiti pesü timi nhethi lo sütsü püzü pa u no buno pi, “No ye kiuala ithulu animoe?”

²⁴ Timi huno jupuku no pi, “Ni ye timiqo ithulu ani, ikemu panoqo ye asüboqo no ala cheche ketoi ani.”

²⁵ Jisü no itaghi pa u pesü timi nhethi lo butsü; eno pa ye anhethi tsükho luve, pa nhetsü alove no thime kümtsü mtsümishei ithuluve.

²⁶ Ikehu pa no timi hu aki lo puwove ghi pi, “Aphu lomu ilo kevilo.”

Peter no Jisü Je Piphe

²⁷ Jisü no akhopemi sasü Caesarea Philippi lo aphuqo lo itsüsü wuve. Ala lo pa no akhopemi vilo ighiju, “Timiqo ye ni ye khuue picheni kea?”

²⁸ Panongu no khochile, “Baptiz kishiu John; khami no Elijah; kütami no tungkupmi lakhi” ipi cheni.

²⁹ Pa no ighiju, “Imaye nongu ye ni ye khuue picheni kea?” Peter no khochile, “No ye Khristo ke.”

³⁰ Tileno khuu vilomu pa ghili pipemo nike pa no tsatsai panoqo ghutuve.

Jisü Kithi eno Xüchilekulu

³¹ Tithiu Jisü no Timi Nu ye aghime shimasa keu, layemi eno achinetomi ngo Ayezah shikükami no kileve no pithiveni keu, eno atsala küthü thiu itaghi xüthuveni keu tsa pesü akhopemi kütsü thuve.

³² Pa no pekiphe shi hipaqo pi akelo Peter no pa sünhe sawo sakiyi thuve.

³³ Ikemu Jisü no tsüghü wo akhopemi juno Peter sakiyi ghi pi, “I launo chevelo, Satan! Kughengu no ye Alhou gholau no kumono timi gholau no o lomsü ani.”

Jisü Papeni Kemi

³⁴ Tithiu Jisü no akhopemi gholono aqokitikhi pa lau kukütsü no pi, “Khuana no I papenishi aye pa ye pa ampi milive no paw kros xapu I pape masae.

³⁵ Kughengu khunono pano küxü pükhani keno pühave nani, ikemu I ghenguno eno atsakiviu ghenguno aküxü tsüve kemi no ti xalu nani.

³⁶ Milakhi no ayeghiqha kuchopu paw shive namu pa küxü pühave aye pa ghenguno kiu ala ani kea?

³⁷ Kughengu timi ye pa küxü theli lo kiu pesü tsülu nani kea?

³⁸ Amlokupu kumo eno axine tiqheli hipau lo khukhumu I je eno I tsa lo puthugho mokeu ye Timi Nu ghi kughou Papu juküvü lono kungumi kimthemi sasü ighini keno, pa ghenguno puthugho tsümo nani.”