Mark 7 - Sumi Naga CL (Re-edited) Bible (BSI)

Apuasü Khuaye eno Azakütsü

¹ Phariseemi gholo Ayezah shikükami khami Jerusalem lo ighi keqo no kümtsa Jisü lau ighi,

² Jisü khopemi khami no au mithekumo, ti ye mtsümo keu pi ani, pesü asho chuve keu panoqo no ithulu.

³ (Kughengu apuasü khuaye kiqi lono Phariseemi, kuchou loye, Jewmi kümtsü, no au mtsümo kelo chuchemo,

⁴ kughou panongu no alhikishia lono ideighini keno, panongu ye mitheve paghimo kelo chuchemoe. Hinguno alau ghi kütau ajukhu, ana-kulholi, azübohu, eno aghulhu lakhüqo qhukimthe keu khuaye, kutomo panoqo no pape chekeu ani.)

⁵ Ikehu panongu no Jisü vilo ighiju, “Kushiye o khopemi ye apuasü khuaye papemo no mithekumo u pesü chu cheni kea?”

⁶ Jisü no khochile, “Isaiah no hitoi nongu keghilishi kemi ghenguno tungkuptsa pi achipi shi pitsüe: “‘Timi hipaqo no akichi loye I gihu cheni, ikemu pano mlo ye I launo putou ani;

⁷ panongu no adou lono I mlla cheni, timi zakütsü pesü akülü tsa kuchoue pi shika cheni.’

⁸ Nongu no Alhou zakütsü pheve no timi khuaye akhoto shi pape cheni.”

⁹ Panongu vilo pa no pi, “Nongu ye no khuaye iqhi kumtoni ke ghenguno mqüijoi Alhou zakütsü kileve cheni!

¹⁰ Kughengu Moses no pike, ‘O pu ngo o za gihulo’; eno, ‘Khukhumu apuaza thaigha keu ye mtsüqheino thinani.’

¹¹ Ikemu nongu no picheni, ‘Milakhi no pa puaza vilo, “I no kiu kiumu pesü o tsülu kepushi akeu ye Corban shivae”’ (ti ye, Alhou tsüvae piani) ipi aye,

¹² nongu no pa pelo kiumu pesü apuaza tsülu pemove ani.

¹³ Tishianguno nongu no nongu khuaye itehi pekiye puwu akeu eno kütau nongu no shiche keqo vecheo Alhou tsa abokümsa shive tsü ani.”

Timi Shikuchhube Chekeu

¹⁴ Jisü no itaghi aqokitikhi pa lau kukütsü no pi, “Nongu kümtsü I tsa inilo eno vethalu lo:

¹⁵ Ashou no timi phi alou ilo keu ye kiumu shikuchhube chemoe, ikemu timi lolo no ipeghi keu no shikuchhube cheni.

¹⁶ Khukhumu akini pu akeu no chilu lo.”

¹⁷ Kughou pa no timiqo launo ixasü aki lo ilo keno, pa khopemi no kimghikipiye vehu pa vilo ighiju.

¹⁸ Pa no pi, “Imaye nongu ghi vethakulu küha aphi keo? Kiu kiumu ashou no chusü keu ye timi shikuchhube mlae pi nongu ye ithikuthulu chemo keshea?

¹⁹ Kughengu achuqupu ye amlo lo ilove chenike kumono akive lou ke, tishino tübatüzü shi ipeghive cheni.” (Hitoi Jisü no achuqupu kümtsü akimthe kepi shuphetsü.)

²⁰ Pa no itaghi pi, “Alou no kiu ipeghi keno tino timi shikuchhube cheni.

²¹ Kughengu timi mlo alou no alhoksa kükümsü ipeghi cheni, kipti-toti dolo mithekumo, aküpka, ghikiqhi, ashupu asalha,

²² alakimne, kixikila, pishikiqhi, ashi ghakiqipu, anhekushu, küthakügha, aqheküza, eno mbomzü.

²³ Alhoksa hi kümtsü alou no ipeghi cheni, eno timi shikuchhube cheni.”

Totimi Lakhi Küpülü

²⁴ Tithiu Jisü no tileno chesü Tyre ngo Sidon cheaxü lo wuno aki lakhi lo ngove. Pa ye khuu pelomu ithi penishi mono ae, tishimu timi zütshü khamlave.

²⁵ Totimi lakhi khuu nga aphi lo mithekumo ghawu akeno li no Jisü ghili chiluve no paikhavi ighi püzü pa pukhu philo itsaqi.

²⁶ Totimi huye khalaumi Syrophoenicia qhaumi. Ikehu li no Jisü vilo tsüikhomo anga phi lono tüghami hapheve tsü penike qhüiniju.

²⁷ Jisü no li vilo pi, “Atianuli paghi lojive pelo, kughengu atianuli chuqupu pesü atsüqo lau veqhi tsükeu ye achipi kumoe.”

²⁸ Li no pa khochile, “Iyei, Ampeu, tishimu atsüqou ghi aghulhu lüpa qholo atianuliw munomugho chu cheni.”

²⁹ Jisü no li vilo pi, “Nono hipa tsa pike ghenguno wolo, tüghami ye o nga qhivae.”

³⁰ Li no aki lo ighi kelo kuchono anga ye alüpa lo zü aghikeu ithulu eno tüghami ye kühave aghi.

Chimla-Piphemla Kemi Shipivi

³¹ Jisü no Tyre cheaxü qhive no Sidon lo iqhove, eno tilau no homxasü iqi Galilee züghi cheaxü lo Decapolis qhalo wu.

³² Timi khami no akini ipo eno atsa akivishi piphemla keu timi lakhi sasü pa lau ighi no pa shou au betsü lopi qhüiniju.

³³ Pa no aqokitikhi gholono timi hu sawuve no lomoshi pa uloti pesü timi tipau kini lo chuxusü tsü, eno amiti müsüpe pa mili lo ditsü.

³⁴ Tishino kungugha lo juno pa no atuthu akuloghiu shephe no timi hu vilo pi, “Ephphatha,” ti ye, “Khaqhi luvelo.”

³⁵ Kuchono timi tipau kini khaqhi luve, pa mili kuqhove tsü, eno pa ye vejoi atsa pi thuve.

³⁶ Jisü no khuu vilomu pipemo nike timiqo ghutu, ikemu pa no khije tishi keno panoqo no alau külhave tsü.

³⁷ Timiqo no shishe akichiqhive no pi, “Timi hipau ye thokha akivishi mla ani. Akini ipo kemi eno piphemla kemi ghi pa no chilupe eno pilupe ani.”