Mark 5 - Sumi Naga CL (Re-edited) Bible (BSI)

Tüghami no Sa akeu Shipivi

¹ Panoqo no azüghi tüxau Gerasenes ghakhu lo ighi.

² Kughou Jisü no ashuka lono ipeghi keno, paikhavi no tile mithekumo ghawu no sa-akeu timi lakhi akumokilive lono pa sasü kushoni ke ipeghi.

³ Pa ye akumo tuki lo ache eno khunomu, ayikichhe kutolo mu pa tshü mlave.

⁴ Kughengu azüu ghi ayikha no pa pukhu khavetsü eno ayikichhe no au tshüve tsü kemu pa no ayikichhe süthave tsü eno pa pukhu yikha atachu shi hephove tsü. Khunomu pa mhoqhi luni keu kumto kühave.

⁵ Putho pucho pa ye alhokuthu akumo tuki eno naghutoqo lono ighamku eno atu pesü pa ampi ghüza cheke.

⁶ Pa no pishipuwo Jisü ithulu kemtsa mtazü posü ighi no pa zülo qhoqhünhe luve.

⁷ Eno asütsa kuloghi lono ighamku pi, “O Shishe Akiqheu Alhou Nu Jisü, no ye I lau kiu shikepu ani kea? I no Alhou je lono o qhüiniju ani, I ghime tsü kevilo.”

⁸ Kughengu Jisü no, “Pa launo ipeghive lo, no mithekumo ghawu!” ipi azah pa tsü ake.

⁹ Tile Jisü no pa vilo ighiju, “O je ye khuu kea?” Pa no khochile, “I je ye Ghüshimi qhethonhe ke, kughengu ningu ye kütsasae.”

¹⁰ Timi huno Jisü vilo tsüikhomo aghakhu lono panoqo hapupo tsükelo pi qhüiniju.

¹¹ Tile naghuto qhau awo loji no achu mzasü che;

¹² aghawuqo no Jisü qhüiniju pi, “Nino awoqo philo iloveni ke ni puwu lo.”

¹³ Ikehu pa no pulove tsü. Aghawuqo no timi phi lono ipeghi no awoqo philo ilove; eno awo loji qhethonhe kini qhalo ke atuxu lo kohasü iqive püzü tilau no azüghi lo ikiqi ilo pütsüqhi khave.

¹⁴ Awokhemi no ti ithulupe pokhave no hipa vehu pesü mishighüna eno mishiphu kümtsü külhave tsü, ikehu timiqo no mtsüqhei kiu shive keno junike ighi.

¹⁵ Panoqo no Jisü lau ighi kelo, azüu khuu philo tüghami ghüshimi qhethonhe ache keno, timi hu aphimini puve no akükümsü achipishi tile iqa aghi keu ithulu no msave.

¹⁶ Ti ithulu keqo no tüghami no sa-akeu eno awoqo lau kiu shive keno aboake shi timiqo vilo lhepiye.

¹⁷ Timiqo no Jisü vilo pano cheaxü lono wuve tsülo pi qhüiniju thuve.

¹⁸ Ikehu pa no ashuka lo ikuche kelo tüghami no sa-ache keu timi huno pa ghi wulu pelo pi qhüiniju.

¹⁹ Ikemu Jisü no milive no pi, “O kibolomi lau wolo eno Ampeu no khipa qhemi o lau mlatsü eno kishi o lau kimiyekini pephe keno panoqo vilo pilo.”

²⁰ Timi huno wuve no Decapolis cheaxü lo Jisü no khipa qhemi pa lau mlatsü keno sheshu thuve, eno kümtsü no akümza khave.

Totimi ngo Jairus Nga Shipivi

²¹ Kughou Jisü no itaghi ashuka lono azüghi kathasü ikughive keno, pa no amkü lo cheke lono aqokitikhi kije no pa lau shesü ighive.

²² Tile sinagog lo yepemi gholo lakhi, Jairus ipikeu, ighi no Jisü ithulu kemtsa Pa pukhu philo itsaqi ngove,

²³ eno tsüikhomo pa qhüiniju pi, “I nga ye thiveni keu lo ngovae. Kimiye no ighi püzü li shou o u betsü lo, tishi aye li ye athoputho luve no xülu nani.”

²⁴ Ikehu Jisü no pa gholo wuve. Itaghi aqokitikhi kije no pa sühope papeche.

²⁵ Totimi lakhi khuu ampe chighikini kutolo aji poche keno tile aqo gholo che.

²⁶ Li ye shikipivimi kutomo no tucho, eno küakini kümtsü puwove namu viluke kumono alhoksa shikitheve kehu aloqhi iju ache.

²⁷ Li no Jisü ghili chilu püa kehu pa thiu no ighi püzü aqokitikhi dolono pa phi bulu.

²⁸ Kughengu li no hitoi kümsü, “Tsala I no pa phi likhimu bulu aye ni ye athoputho luve nani.”

²⁹ Paikhavi no aji po akeu hu tave, eno li philo aküsü shipivi luvae pi li lolo ithithai ighive.

³⁰ Tipa mtsa Jisü ye pa launo aküka ipeve keu amichi shive no aqokitikhi lau tsüghü puwo no pi, “Khuu no I phi bu kea?”

³¹ Akhopemi no pa vilo pi, “Aqokitikhi no o sühope chekeu nono ithulu akeghi, ‘Khuu no I bu kea?’ ipi ani keo?”

³² Ikemu khuu no ti shikeno ithini ke pa no homxawo jua.

³³ Tile totimi huno li lau kiu shive keno ithi akehu msa khokhoshi ipeghi no Jisü pukhu philo itsaqi püzü kuchou tsa qhoi pive.

³⁴ Jisü no li vilo pi, “Angao, o küpülü no o shipivivae; aloinoqhiyi wolo, eno o küsü lono vilulo.”

³⁵ Pa no atsa pi aphi lono timi khami no yepeu ki lono ighi püzü pi, “O nga ye thive ake kushiye Akükütsüu püna ani kea?”

³⁶ Ikemu panoqo no pi akeu iniküküzüi shi Jisü no sinagog yepeu vilo pi, “Pülüni thono msa kevilo.”

³⁷ Tishino Peter ngo James eno pa thiküzüu John likhi kumo aye khumu pa pape pemove.

³⁸ Panoqo no sinagog yepeu kilo ighi kelo timiqo no mbumghu ighaqa aghi keu Jisü no ithulu.

³⁹ Pa no aki alou ilo püzü tile akeqo vilo pi, “Kushiye nongu ye ishi mbumghu ighaqa ani kea? Anga ye thive ake kumoe ikemu zü ani.”

⁴⁰ Panoqo no numighei pa jukünatha. Ikemu pa no timi kümtsü khalau pipeve no anga puaza ngo pa gholo kichemi ishi sasü anga no khile akeno achebo lo ilo.

⁴¹ Pa no li u tsüqü pesü li vilo pi, “Talitha cumi,” tipa kiqi ye, “I no o vilo piani, angao, ithulo.”

⁴² Paikhavi anga no ithu püzü alache thuve (kughengu li ye ampe chighikini shiae), eno tipa mtsa panoqo ye akichiqhi kelau no thüghüive.

⁴³ Jisü no tsatsai khuu pelomu ithi pemoni ke panoqo ghutuve, eno tithiu kiuala chukepu anga tsülopi panoqo vilo pive.