Mark 3 - Sumi Naga CL (Re-edited) Bible (BSI)

Jisü no Au Kithiu Shipivi

¹ Ado hami thiu itaghi Jisü no sinagog lo iloghi kelo au thive keu timi lakhi aghi.

² Timi khami no akipimi Jisü tsüniye pa ye Sabbath lono timi hu shipivi nani kemo keno jukutoa.

³ Jisü no au kithiu vilo pi, “Hilau ighilo.”

⁴ Pa no panoqo vilo ighiju, “Sabbath lo khikhiu no akhuaye kiqilo achipi kea: akivi mlakeu no keo timi ghüza keu no kea; momu püxülu keu no keo pithive keu no kea?” Ikemu panoqo ye tshümu shimono ngove.

⁵ Pa no amlo vimoqhiyi ighowo panoqo juno pano mlo kümka jupe ighono pa mlo pünaqhive, tishino pa no timi hu vilo pi, “O u xachholo.” Timi huno pa u xachho, eno ti ye kuchou no athoputho luve.

⁶ Tile Phariseemi no khalau ipeve no mtazü Herod papemi sasü kishi pa kütsave kepu keno kuchughu thuve.

Aqokitikhi Kije no Jisü Pape

⁷ Jisü no pa khopemi sasü azüghi phivilo wu, eno aqokitikhi kije no pa pape wu, ti ye Galilee ngo Judea,

⁸ Jerusalem ngo Idumea, Jordan kukuu eno Tyre ngo Sidon hokümxa lo akeqoe. Kughou Jisü no mlaitha keu ghili kümtsü aqokitikhi kije no chilu keno, panoqo no pa lau ighi.

⁹ Aqokitikhi no pa tsakibive nosa kehu pa no akhopemi vilo ashuka kuto aghilo pive,

¹⁰ kughengu pa no timi kutomo shipivive kehu aküsü jeli xapu akemi kümtsü no pa buniye tsatsai kuko iloghi ke.

¹¹ Kugho kughomu mithekumo ghawuqo no pa ithulu kelo, panoqo no pa zülo ikiqive no ighamku pi, “No ye Alhou Nue.”

¹² Ikemu timi pelo ithi pemoni ke pa no mtotoi panoqo ghasüve.

Apostolmi Chighikini

¹³ Jisü no atoghi lakhi lo iqho püzü timi khunoqo pa no avehupu shi akeno kusü, eno panoqo no ighi.

¹⁴ Pa no timi chighikini süsülu (tipaqo pesü apostolmi ipi jeku tsü); tishianguno panoqo pelo pa gholo lakhi shino khalau sheshu wupe,

¹⁵ eno tüghami hapheni keu kükagha ithulu peniye ke.

¹⁶ Pa no süsü keu timi chighikini ye hipaqo: Simon (khuu je pa no Peter kuvetsü keno);

¹⁷ Zebedee nu James ngo pa thiküzüu John (pama je no Boanerges kuvetsü, tipa kiqi ye Tsütsüküsü Nuliqo);

¹⁸ Andrew; Philip; Bartholomew; Matthew; Thomas; Alphaeus nu James; Thaddaeus; Zealot mqolomi Simon;

¹⁹ eno Jisü jechuve keu Judas Iscariot.

Jisü ngo Beelzebul

²⁰ Tishino Jisü ye aki lo wove, ikelo itaghi timi kitikhi no shesü ighive kehu Jisü ngo akhopemi ye chushoni keu ghi shimlave.

²¹ Kughou Jisü kibolomi no ti chilu keno, panoqo no pa ghasüve niye wu, kughengu timiqo no pa ghili hitoi kügha ake, “Pa ye akükümsü kühavae.”

Aghungu Kimthe Piküptha

²² Tile Jerusalem lono Ayezah shikükami iqighi no piae, “Pa ye Beelzebul no peitha ani,” eno, “Pa ye tüghami yepetou vecheo tüghami haphe ani.”

²³ Jisü no panoqo ku püzü kimghikipiye lono panoqo vilo pi, “Kishino Satan no Satan haphe luni kea?

²⁴ Kükaqha lakhi dolono laumi shi kijethave aye, kükaqha tipau ye puthugho lumoae.

²⁵ Akibo lakhi dolono kijethave aye, akibo tipau ye puthugho lumoae.

²⁶ Titoi Satan no pa ampi mjochile thughive no kijethave aye, pa ye puthugho lumoa eno pa ghulokiu ghi kishekha niae.

²⁷ Tinguno alau, akumtomi ki xüni kelo atüghüshi pa tshüpe qhilumo keloye khunomu pa ki hepho ilo thime kivi xüpe wuve mlae. Pa no ti shilu kethiu no xüpe wulu nani.

²⁸ “Mtsüqheino I no nongu vilo piani, timiqo xine eno panoqo no kiukiu küthakügha tsa pi püaghi namu qhoi akipimi qhivetsü nani,

²⁹ ikemu khunono Aghungu Kimthe thaighani keno khilemu akipimi qhitsümo nani, eno pa ye lhokta xine shivae”—

³⁰ timiqo no, “Pa ye mithekumo ghawu ani,” ipi akehu Jisü no hipa tsa pike.

Jisü Paza ngo Athiküzümi

³¹ Tile Jisü paza ngo pa thiküzümi no ighi, eno khalau puthugho no aghini shipe Jisü ku puwu.

³² Aqokitikhi no pa bope akelo khami no pa vilo pi, “O za ngo o thiküzümi ye khalau o phucheni.”

³³ Pa no panoqo khochile, “Khuu no I za eno khuu no I thiküzümi kea?”

³⁴ Eno pa bope akeqo lau jupuwo no pa no pi, “I za eno I thiküzümi ye hipaqo ke!

³⁵ Kughengu khunono Alhou pulou shi cheni keno, pa no I thiküzü I chelimi eno I za ke.”