Mark 2 - Sumi Naga CL (Re-edited) Bible (BSI)

Jisü no Anhükithimi Shipivi

¹ Atsala hami thiu kughou Jisü no Capernaum lo ide ighi keno, pa ye aki lo anie pi timiqo no chiluve.

² Ikelo timi kutomo ighi kumqo luve keu lono a-a kitila mu kühave no ahukikha lou ghi kikiyi kuchope ngove, Jisü no panoqo vilo Alhou tsa piae.

³ Tile anhükithimi lakhi timi bidi no kuhope no pa lau saghi.

⁴ Ikemu aqokitikhi shoxüsü ilo Jisü kupunu lukepu shimove kehu panoqo no Jisü no akeu ki shou iku amole xaphe püzü aküsüu hu awophe gholono kighiti piqi.

⁵ Kughou Jisü no panoqo küpülü ithulu keno, pa no anhükithiu vilo pi, “Anu, o kipimi qhive tsüae.”

⁶ Tile Ayezah shikükami khami no pano mlo lono ishi ighiju kuto ae,

⁷ “Timi hipau ye kushiye hutoi pi ani kelae? Pa ye küthakügha shi ani! Alhou likhi no kumo aye khuu no akipimi qhitsü luni kea?”

⁸ Panoqo ye pano lolo titoi ighiju kuto anie pi Jisü no aghungu lono ithikuthu luve kehu pa no pi, “Kushiye nongu mlo lo hipaqo kümsüpu ani kea?

⁹ Anhükithiu vilo khikhiu pikeu no akümlau kea, ‘O xine qhive tsüae,’ ipikeu no keo, ‘Ithulo, o züa phi ikhiqhepe ala chelo,’ ipikeu no kea?

¹⁰ Ikemu nongu pelo Timi Nu ye ayeghi lo axine qhivetsü kepu kükagha ani kepi ithive penia na,” eno pa no anhükithiu vilo pi,

¹¹ “I no o vilo piani, ithulo, o züa phi ikhiqhepe aki lo wovelo.”

¹² Timi huno ithuve no paikhavi pa züa phi ikhiqhepe timi kümtsü zülono wuve, ikehu timi kümtsü no akümzave no Alhou sheqhe ghi pi, “Ningu ye hitoi keu khilemu ithulu mphie!”

Jisü no Levi Kulu

¹³ Jisü no itaghi khalau azüghi phivilo wuve, ikelo aqokitikhi no pa lau ighive kehu tileno pa no panoqo shika ae.

¹⁴ Tithiu pa no wuche kelo Alphaeus nu Levi zame qhakütsü-a lo apushonha qholo iqa aghi keu ithulu, eno Jisü no pa vilo pi, “I papelo.” Levi no ithu pa pape wuve.

¹⁵ Kughou Jisü no Levi kilo alibe chuniye iqa keno, zame küqhami ngo Ayezah pechemo kemi ghi kutomo no pa papeche kehu panoqo no Jisü ngo pa khopemi gholo kümtsa chua.

¹⁶ Pa no Ayezah pechemo kemi ngo zame küqhami gholo chuakeu Ayezah shikükami ngo Phariseemi no ithulu no pa khopemi vilo pi, “Kushiye pa ye zame küqhami ngo Ayezah pechemo kemi gholo chucheni kea?”

¹⁷ Hi chilu kelo Jisü no panoqo vilo pi, “Ashiaji vithai akeqou no kumo püzü khunono küsükini shi ani keno shikipiviu avehupu shi cheni. I no ighi keu ye amikuchomi kumono axinemi kuniye ke.”

Kümvü keu Vehu Ighiju

¹⁸ Ghulo lakhi John khopemi ngo Phariseemi no kümvü akelo timi khami no Jisü lau ighi no ighiju, “Kushiye John ngo Phariseemi khopemi ye kümvü cheni püzü o khopemi ye kümvü chemo kea?”

¹⁹ Jisü no panoqo vilo pi, “Külapuu no pa poshumi gholo apülaghi panoqo ye kümvü lunani keshea? Külapuu no panoqo gholo ake tivilo panongu ye kümvü mlae.

²⁰ Ikemu panoqo launo külapuu sawuve kepu tsala ighi nani, tileno panongu no kümvü nani.

²¹ Khunomu aphi kithe pesü aphimini qa lo tsüghuda chemoe. Tishi aye, aphi kithe no ichi-ilo kelo aqau ghi sünhekütsü luve no tiuno alhoksau shi ixüve nani.

²² Khunomu atsaizü kithe pesü ashiyiko hughi aqa lo süchemoe. Tishi aye, atsaizü kithe no ashiyiko hughi aqau pukoxüve niae, eno tino atsaizü ngo ashiyiko hughi kinikujo shipüsave nani. Ikemu atsaizü kithe pesü ashiyiko hughi kithe lo sükepue.”

Jisü ye Sabbath Mpeu

²³ Sabbath ni lakhi lo Jisü no aghi lu vechesü wuche, eno akhopemi no küpape ghi pa zübou chekelo panoqo no aghipe muxu thuve.

²⁴ Phariseemi no Jisü vilo pi, “Julepi, kushiye panongu ye Sabbath khuaye kumo keu shi ani kea?”

²⁵ Jisü no panoqo vilo pi, “David ngo pa gholo kichemi no müzüthi püzü achuqupu avehupu shive kelo kiu shi keno nongu ye khilemu phimla aphi keshea?

²⁶ Achinetou Abiathar ghuloki lo David no Alhou kilo ilo no asho, khikhi aye kiqilo achinemi nguno alau ye khumu chu pemoni keu ache keno, Alhou zülo shikimthe pe qhiche keu hu ikhipe chuve no pa gholo kichemi ghi tsüe.”

²⁷ Jisü no itaghi panoqo vilo pi, “Sabbath ghenguno timi lhoke kumono timi ghenguno Sabbath mla tsüe.

²⁸ Tighenguno Timi Nu ye Sabbath shou ghi Ampeu ke.”