Mark 16 - Sumi Naga CL (Re-edited) Bible (BSI)

Xüchilekulu

¹ Tishiwo thoghiu kughou Sabbath tsala wove keno, Mary Magdalene, James paza Mary eno Salome no axokütsüngü tsüni Jisü philo nutsüni ye qhü.

² Thanau apinedo kithe lo atsala atüghüni inaqhe kughou khetsünhe ipeghi keno, panongu no akumo kilo wue.

³ Eno ishi küptsa che, “Akumoki kichi lo khuu no ni ghenguno atuqu tukulo tsü nani kelae?”

⁴ Kughou panongu no pishipuwo jukeno, atuqu ye tukulove aghi—ti ye ighono akuloghi ke.

⁵ Panongu no akumoki alou ilo no apumi lakhi aphi kimiye pepusü ajeu iqa aghi keu ithulu, eno panongu ye akichiqhive.

⁶ Pa no pi, “Akichiqhi kevilo, Nazarethmi Jisü khuu kros lo yeda pithive keno, nongu no phuche keu ye xüthughivae. Pa ye hile kühae! A-a khile pa qhipüa keno julo.

⁷ Wulo, pa khopemi eno Peter vilo pa ye nongu züuno Galilee lo wu cheae pilo. Pa no pi püake toi tilau no nongu no pa ithulu nani.”

⁸ Panongu no akichiqhi kelauno thüthüshi eno msa khokhoshi akumoki lono poipe kuhave, eno akümsa lono khumu khuu pütsa move. [Kaku aqau hami loye 16:9-20 ye küha]

Mary Magdalene lau Ipeghi

⁹ [[Apinedo kithe lo atsala atüghüni inaqhe Jisü no xüthughive kethiu pa no Mary Magdalene, khuu phi lono tüghami tsüni pa no haphetsü keno, li lau atüghüshi ipeghi.

¹⁰ Li no wu püzü khunoqo qamlo akeno, Jisü poshumiqo vilo pi.

¹¹ Ikemu panongu no pa ye xüani eno li no pa ithulue pikeu pülü tsümoe.

Akhopemi Kini lau Ipeghi

¹² Hipa thiu, mikini no aphu lo wuche kelono Jisü no aghola kütau lono pama lau ipeghi.

¹³ Pama no idechile ilo püzü kümtsü vilo pi kemu panongu no pülü tsümoe.

Süküsü Za Kije

¹⁴ Ado hami thiu akhopemi chighiqhaqhi no aghulhu shi ake lono pa no ipeghi, eno panoqow pülükümla ngo amlo kümka ghenguno pa no sakiyi, kughengu pa no xüthughive kethiu pa ithulu keqo tsa panongu no pülü moke.

¹⁵ Pa no panongu vilo pi, “Ayeghiqha kümtsü lo wulo eno atsakiviu pesü pulhoküsü kümtsü lau sheshu lo.

¹⁶ Khunono pülü no baptiz shiluni keno xaluve nani, ikemu pülümo keu ye kileqhive nani.

¹⁷ Amchipu hipaqo no pülü luve kemi gholo anani: I je lono panongu no tüghami haphelu nani; panongu no amilikithe lono atsa pi nani;

¹⁸ panongu no au lono tüghükupu pighi ikhiqhelu momu akithipu tüghü yelu namu panongu shipüsamla nani; panongu no küsükinimi shou au bekelo tipaqo no viluve nani.”

Jisü ye Kungugha lo Saikuve

¹⁹ Ikehu Ampeu Jisü no akhopemi pütsave kethiu, pa ye kungugha lo saikuve no Alhou u ajeu küghüqave.

²⁰ Tithiu akhopemi no ashou akuaqha kümtsü lo sheshu wu, eno Ampeu no panoqo gholo mla eno amchipuqo vecheo atsape ye kuchoue pi alau iqhikumto tsüe.]]