Mark 15 - Sumi Naga CL (Re-edited) Bible (BSI)

Pilate Zülo Jisü Sawu

¹ Inaqhe shive kemtsa achinetomi no layemi, Ayezah shikükami ngo hoho mpemi kümtsü sasü kuchughuve. Panongu no Jisü phiau tshüve tsüno sawo Pilate u lo süvetsü.

² Pilate no Jisü vilo ighiju, “No ye Jewmi kükau keshea?” Jisü no khochile, “Nono pivae.”

³ Tileno achinetomi no nguku keu tsa jeli pesü pa shou pipuku.

⁴ Pilate no itaghi pa vilo ighiju, “No ye khokichile kiumu küha keo? Panongu no nguku keu tsa khije o shou süghi ani keno ithilo.”

⁵ Ikemu Jisü no kiu tsamu khochile move keu lono Pilate ye akümzave.

Jisü Yedave Penike Tsüve

⁶ Hechekulu ghulhu kümtsü lo Pilate no timiqo no khukeu kiqi lono akughumi lakhi khaqhiphe tsüche.

⁷ Yepeka hebide kelono timi pithi püakemi gholo milakhi Barabbas ipikeu akughuki lo ake.

⁸ Aqokitikhi no ighi no Pilate vilo thosülo toi panoqo lau shitsü lopi khu thuve.

⁹ Pa no timiqo vilo ighiju, “Nongu ye I pelo nongu lau Jewmi Kükau khaqhiphe tsü penishi ani kemo kea?”

¹⁰ Kughengu achinetomi no anhekushu lono Jisü kügha sawo pa tsükeu pa no ithive.

¹¹ Ikemu achinetomi no pa pelo Barabbas khaqhiphe tsü peniye aqokitikhi xukutho.

¹² Pilate no itaghi ighiju, “Maye ni ye timi hipau nongu no Jewmi Kükau ipi akeu lau kiu shitsü lopi kea?”

¹³ Panongu no ighamku pi, “Pa yedave lo.”

¹⁴ Pilate no panoqo vilo pi, “Kushiye kea? Pa ye kiu lhoksa shive kea?” Ikemu panongu no alaushi igha, “Pa yedave lo.”

¹⁵ Ikehu Pilate no aqokitikhi ghapiqi tsüniye Barabbas khaqhiphe pe panoqo tsüve, eno Jisü küghape hetha pinyive no yedave penike ikhiphe tsüve.

Ghüshimi no Jisü Thogha

¹⁶ Tithiu ghüshimi no Jisü sasü kükaki (ti ye anghw oking) alou ilove, eno pano loji lo kütami ghi kukütsü kha.

¹⁷ Panongu no hughai keu hebephi pesü pa puu, eno asahu ghokünape akütsükuqho shino pa pipe.

¹⁸ Tishino au peqhepe agigihu pa tsü, “Axüpushu lo, Jewmi Kükau!”

¹⁹ Panongu no aküsü pesü pa kütsü lo küza puku, eno amiti pesü müsüte no thogha ghi pa zülo qhoqhünhe.

²⁰ Kughou panongu no pa süqoqhive keno, panongu no hughai keu hebephi puu püakeu xave tsüno pa phimini pipeve, eno yedave nike pa sünhe saipeve.

Kros lo Yedave

²¹ Tile timi lakhi Simon ipikeu, Cyrene lo küami eno Alexander ngo Rufus papu, aphughi lo ilo niye ala lo cheke lono ghüshimi no Jisüw kros xapu penike anguka lono sünhe luve.

²² Ghüshimi no Jisü sasü Golgotha (tipa kiqi ye Aboghe-a) ipikeu lo ighi.

²³ Panongu no atsaiji lo akukhu zü kite keu pesü Jisü tsü kemu pa no lutsü moe.

²⁴ Ghüshimi no pa pesü kros lo yedave no pa phimini süxüpe milakhi khino kiu lukepu keno kimchini ke asaqhi khave.

²⁵ Panongu no inaqhe ayi toku kihe qhalono pa yedave.

²⁶ Eno Jisü kipimi tsa ishi yepe kros lo datsü, “Jewmi Kükau.”

²⁷ Jisü gholo panongu no küpkami kini, lakhino pa u ajeu eno lakhiu no pa u piyiu yedave.

²⁸ (Tishikeu lono Kuchoyesü lo yepüa keu shikupuve, “Pa ye alhoksami gholono pithive.”)

²⁹ Khunoqo ti kathawu keno panongu no pa thaigha ghi akütsü küngü tsüno pi, “Aha! No achineki kütsave no atsala küthü lono shiqhe kitheni küau,

³⁰ no ampi xaluve lo, eno kros lono iqighive lo!”

³¹ Titoi achinetomi gholo Ayezah shikükami ghi pa cheqhi no panoqo dolo pikile, “Pa ye kütami xaluve kemu pa likhi pau ye xamlae.

³² Israelmi Kükau, Khristo pelo kros lono iqighive pelo, tishi aye ningu no pülüni.” Jisü gholo yeda keu pama ghi pa thaighae.

Jisü Kithi

³³ Puchou ayi chighikini kihelo, tipa ghakhu kümtsü ayikihedo küthü kutolo züchiyi ighive.

³⁴ Avelau ayi küthü kihelo Jisü no asütsa kuloghi shi ighamku, “Eloi, Eloi, lema sabachthani?” tipa kiqi ye, “I Lhou, I Lhou, No ye kushiye I qhive akea?”

³⁵ Aphivilo akeqo no ti chilu kelo pi, “Julo, pa ye Elijah ku ani.”

³⁶ Milakhi no aghüshi lono akiqhi ji pütsü no aqhaqhi lo tsada pewo müsü peniye Jisü tsüno pi, “Qele, ningu Elijah no pa ikhiqhi nike ighi nani kemo keno juni.”

³⁷ Jisü no asütsa kuloghi shi igha no pa tuthu kishekhave.

³⁸ Tileno achineki lo kokütha nhaqhiphi ye akütsü lono abophi kutolo ixü kütüta shive.

³⁹ Ghüshimi aqhe zatsüu no Jisü zülo ngono Jisü no hipa gholau no süthauve keu ithulu kelo ishi pi, “Mtsüqheino timi hipau ye Alhou Nue!”

⁴⁰ Tile totimi khami ghi putou no juae, tipaqo gholo Mary Magdalene ngo Mary lakhiu, James ayitiu ngo Joses pama paza, eno Salome ishi ae.

⁴¹ Jisü no Galilee lo ake ghuloki lo panongu no pa pape no huthu cheke, hinguno alau totimi kütami khunoqo pa gholono Jerusalem lo iqhoghi keno kutomo tile ae.

Jisü Kumo Kuqho

⁴² Sabbath tsala züu, ti ye Akukuto Tsala kehu, kughou avela shive keno,

⁴³ Arimatheami lakhi, hoho mpemi agigihu küami khuu ampi no Alhou yekipe ghi laju chekeno, Joseph ipikeu no amlo kuloghi shi püzü Pilate lau wuno Jisü sükumo khu.

⁴⁴ Pilate no Jisü thive aghi keu chilu kelo akümzave. Pa no aqhe zatsüu kuno thebeive nike kighinikile.

⁴⁵ Kughou pa no aqhe zatsüu launo thive keu thebeive keno, pa no Jisü sükumo Joseph tsüni keu za tsüve.

⁴⁶ Joseph no phepheike phi qhüluve, eno kros lono Jisü ikhiqhive no aphi pesü pa küzüve püzü pewo akumoki lakhi atu no chhutha püakeu lo süve. Pa no tithiu atuqu kulu sawo akumoki kichi lakhape qhive.

⁴⁷ Mary Magdalene ngo Joses paza Mary pama no Jisü kumo khile qhipüa keno ithuluve.