Mark 13 - Sumi Naga CL (Re-edited) Bible (BSI)

Achineki Kütsaveni Keu Pichho

¹ Jisü no achineki lono ipeche kelo, akhopemi dolo lakhino pa vilo pi, “Julo, Shikükau, atu kuloghi pesü shikeu ki kiu toi mzamghalei kelae!”

² Jisü no pa vilo pi, “No ye aki kuloghi hipaqo juani kea? Atu lakhimu lakhi shou küqakile mono qhoi kütsa khave nani.”

Tiqheli Shekuho lo Amchipuqo

³ Jisü no Olive toghi lo pa gizüu achineki pishipuwo ithulu ghi iqa akelo, Peter, James ngo John eno Andrew no lomoshi pa vilo ighiju,

⁴ “Thime hipaqo ye kughou no shinani, eno hipaqo huthuni kelo kiu no amchipu shinani kea?”

⁵ Jisü no panoqo vilo pi thuve, “Khunomu nongu saküghüzüve pemoni ke ithilo.

⁶ Kutomo no I je lono pisü ighi nani, ‘Ni ye Pa ke!’ eno kutomo saküghüzüve nani.

⁷ Kughou nongu no aghüshi sütsa eno uyeu ghüshi sütsa chiluni keno, khilemu amlo hau kevilo. Hi ye ighini pütsae, ikemu ashekuho ye kumphie.

⁸ Shiye lakhi no lakhi sasü aghüshi nani, titoi kükaqha kini dolono aghüshi nani. Ayeghi küghütha a-a kutomo lono ipeghi nani; püqümiye ighi nani. Hipaqo ye apunu küsü hukuthu likhi aphie.

⁹ “Ikemu nongu ye jukuto khelo. Kughengu nongu küghape hoho u lo süvetsü nani, sinagog lono nongu heqhi nani, eno I je ghenguno nongu no angh ngo kükamiqo zülo thopimi shi puthugho nani.

¹⁰ Atüghüshi atsakiviu pesü shiye kümtsü lau sheshu masae.

¹¹ Kughou nongu küghape akughu shive niye atsakükügha lo sawuni keno, nongu ye kiu pinia pi azüuno amlo kütakihi kevilo, ikemu tipau süchedo lono kiu kiumu o tsükeu pesü pilo, kughengu nongu no kumoe, ikemu Aghungu Kimthe no atsa pi nani.

¹² Athiküzüu no athiküzüu pithive penike thechu nani, titoi apu no atianuli lau shinani, eno atianuli no apuaza sasü kumjo kichighi no pithive penike timi u lo süvetsü nani.

¹³ I je ghenguno timi kümtsü no nongu mithi nani. Ikemu khuu no ashekha kutolo kutuulu keno xaluve nani.

Aphikümqhüpu Julho

¹⁴ “Ikemu kughou kütsakungoni keu aphikümqhüpu julho no khile ngomo kepu alo puthugho aghi keu nongu no ithuluni keno (phikuluu no vethaluve lo), tile khunoqo no Judea lo aghini keno, ato yeghi lo povelo.

¹⁵ Khuu no aki kütsüqa lo aghini keno, aki lo ilo tinhemgha ikhiphe lunike iqi kevilo,

¹⁶ eno khuu no alu lo aghini keno aphimini lunike idewo kevilo.

¹⁷ Tipa ghuloki lo mishipu akemi momu atianuli kughunu sa-aghi kemi ghenguno ahae!

¹⁸ Hi ye süsü tusho lono shi pemoni ke inikhu alo.

¹⁹ Kughengu tipa ghuloki lo kijiküpsa ye inahuu Alhou no pulhosü kelono itehi kutolo khilemu shiju mphi eno hithiu mu khilemu shimo nani.

²⁰ Ampeu no atsalaqo kughukho tsümo keaye, milakhimu xakulupu shimoni cheke. Ikemu pa no khunoqo kishephelu keno tipaqo ghenguno atsala kughukhove tsüe.

²¹ Khuana no o vilo, ‘Julo, Khristo hi cheni!’ momu ‘Julo, pa ye hu cheni!’ ipi namu pülü kevilo.

²² Kughengu kichile Khristo eno kichile tungkupmi no tolukivi thaqhü kishekiphemi ghi saküghüzü nike ipeghi nani eno amchipu ngo akümzapu kümlaqo shinani.

²³ Ikemu ni ye hi kümtsü azünatha pive akehu nongu ye khekuto luvelo.

Timi Nu Ikighi

²⁴ “Ikemu tipa ghuloki lo kijiküpsa thiu, khetsünhe no züchiyi hailove nani, eno aqhi no aküvü tsümove nani.

²⁵ Atsütsü lono ayepuqo ikiqive nani, eno kütau akeqo kümtsü süküghütha nani.

²⁶ Tileno Timi Nu ye aküka eno ajuküvü kuloghi shi khüngküsü lono chekeu kümtsü no ithulu nani.

²⁷ Pa no paw kungumi puwu no ayeghiqha kobidi lono, eno atsütsü ngo ayeghi shekhau no paw kishekiphemi hekütsü nani.

Mububo launo Shikalu

²⁸ “Mububo launo hi shikalu lo: kughou tipa loka lo akhuni ipeghi wuveni keno, nongu no mütsü tusho kupunuvae pi ithive cheni.

²⁹ Ikehu nongu ghi, kughou no ado-aghuloki hi kümtsü sholuni keno, pa ye kupunukhoi ahukikha lo ighivae pi ithive lo.

³⁰ Kuchou no I no nongu vilo piani, hipa tiqhelimi kühave mphi lono ado-aghuloki hi kümtsü sholu nani.

³¹ Atsütsü eno ayeghi ye hauve nani, ikemu I tsa ye hauvemo nani.

Khunomu Atüqhüdo Mthae

³² “Ikemu tipa tsala momu atüqhüdo vehu ye Apu likhi no kumo aye Anu shi aghina, kungugha lo kungumi namu khunomu mthae.

³³ Piqepuloi khelulo, tsükhüi lo. Kughengu nongu ye atüqhüdo kughou no ighini keno mthae.

³⁴ Ti ye timi lakhi no kicheghüzü lo wuniye aki kuchoqhipe pa qemi tsüve ketoie: pa no pütüta kümla kughuve tsü, eno ahukikha kheu vilo tsükhüi lopi azah tsü.

³⁵ Tighenguno tsükhüi shilo, kughengu aki mpeu ye avelau no keo, zübumtau no keo, tsükutho lau awudu igha kelono keo, inaqhe no keo, kughou no ighi nani keno nongu ye mthae,

³⁶ tikumo aye, pa no züleno ighi püzü nongu no züakeu ithuluve nosae.

³⁷ I no nongu vilo kiu pi ani keno, ni ye timi kümtsü vilo pi anike: Tsükhüi shilo.”