Mark 12 - Sumi Naga CL (Re-edited) Bible (BSI)

Alu Mishikulumi Kimghikipiye

¹ Tileno Jisü no kimghikipiye lono timiqo vilo pi thuve. “Timi lakhi no atsailu chi, pa no tipau homxa akuptu süve, atsaithi kütsüghü ghenguno aqo lakhi chhu, eno aqoghe ghopuku no tipaqo pesü mishikulumi tsüve püzü pa ye aghakhu kütau wuve.

² Kughou ghile ghuloki ighi keno, pa no alu lo xathi hami pa saje shi süghi peniye aqeu hape mishikulumi lau puwu.

³ Ikemu panongu no aqeu küghape heqhi no au kümsa puwo.

⁴ Itaghi tithiu alu pighiu no aqeu kütami puwu kemu panongu no akütsü kuchopu azaku pipe heqhi no pa kiphikumo shi peitha.

⁵ Tipa shelo ghi aqeu kütau puwu, ikemu tiu ye panoqo no pithive tsü. Hitoi kütami kutomo lau shive, khami ye heqhi eno khami ye pithive tsü.

⁶ Ti kutolo alu pighiu ye itaghi kimiye kicheu nu ake. Ikehu ashekha shi pa no kümsü ghi puwu, ‘Panongu ye I nu gihu nani.’

⁷ Ikemu mishikulumi no ishi pikile, ‘Hi no amheghi kiyighiu ke ighilo, ningu pa pithiveni eno amheghi pesü niw shiveni.’

⁸ Panongu no pa küghape pithive no alu khalau pa vepheve.

⁹ Tishiaye, alu pighiu ye kiu shi nani kea? Pa no ighi no mishikulumi pithive no atsailu pesü kütami tsüve nani.

¹⁰ Nongu ye Kuchoyesü hipau philu mphi kea? “‘Aki kishimi no atu kileve keu huno atsüghi tuqu shivae,

¹¹ hi ye Ampeu kümlae, eno ni nhethi lo hi ye akümzapue.’”

¹² Jisü kipimi phu akeqo no pa no kimghikipiye pikeu ye panoqo shou pipuku akepi vethaluve no pa kügha luveni keu la phuae. Ikemu panongu ye aqokitikhi msave püzü pa qhive no wuve.

Caesar lau Zamekütsü

¹³ Tithiu Phariseemi ngo Herod papemi no Jisü tsapi lono pa meluve niye pano qomi khami pa lau puwu.

¹⁴ Panongu no ighi no pi, “Shikükau, no ye süchomie pi nino ithi ani. Kughengu no ye khuu lau mu agiju chemo momu ala saphu mono aphiphishi kihi cheni, eno kuchou no Alhou laghi pesü shika cheni. Ike zame pesü Caesar tsükeu ye ayezah kiqilo kemo kea? Ningu ye tsü kepu kemo kea?”

¹⁵ Ikemu panoqow agi kini kupu lhoaye Jisü no ithi akehu pa no pi, “Kushiye I peju ani kea? Pisa muno Denarius lakhi I lau peighi lo, I no tipau juni.”

¹⁶ Panongu no peighi kelo pa no ighiju, “Hi ye khuu julho eno khuu je chishida püani kea?” Panoqo no khochile, “Caesar ke.”

¹⁷ Jisü no panoqo vilo pi, “Caesarw pesü Caesar tsülo, eno Alhouw pesü Alhou tsülo.” Ikelo panongu ye pa jupe akümzave.

Sadduceemi eno Xüchilekulu

¹⁸ Sadduceemi, khunoqo xüchilekulu kühae piche keno, khami no Jisü lau ighi no pa vilo ighikuju tsa iniju,

¹⁹ “Shikükau, Moses no ni ghenguno hitoi yetsü, timi lakhi no atianuli kühano anipu likhi qhive no thive aye, pa thiküzüu no anipu tipau luve masae eno pamu ghenguno atianuli shitsü masae.

²⁰ Tishiaye, athiazü tsüni ache; atüghüu no anipu lu, ikemu atianuli kühano thive.

²¹ Ikehu athiküzüu akiniu no li valuve, pa ghi anuli kühano thive, eno aküthüu ghi ti paphi shive.

²² Titoi pano tsüni kümtsü anuli shimono thive, eno ashekha lo totimi ghi thive.

²³ Imaye, xüchilekulu tsala lo panongu no ithughi kelo, pano tsüni gha totimi tipau pesü anipu shi püani kehu li ye khuu nipu shi nani kea?”

²⁴ Jisü no panoqo khochile, “Nongu no Kuchoyesü na Alhou küka namu ithi chemo kehu hi ghenguno nongu ye küqü anike kumo?

²⁵ Kughou panongu no ithughini keno, khumu külakupu shimo nani, ikemu kungugha lo kungumi toi nani.

²⁶ Kithimi xüputhu keu vehulo, Moses kaku lo asüminipho tsamqo lo kishi Alhou no, ‘Ni ye Abraham Lhou, Isaac Lhou, eno Jacob Lhou,’ ipi keno nongu ye phimla aphi keshea?

²⁷ Pa ye kithimi Lhou ke kumoe, ikemu küxümi Lhou ke. Nongu ye aloqhi küqü ani.”

Azakütsü Kije

²⁸ Panongu lakhino lakhi sasü kütsala akelo Ayezah shikükami lakhi no ighi püzü chilu, eno Jisü no akivishi Sadduceemi khochileve keu ithulu no pa vilo ighiju, “Azakütsü dolo khikhiu no kümtsü nguno akhotou kea?”

²⁹ Jisü no khochile, “Kümtsü nguno akhotou ye, ‘Inilo, O Israel: Ampeu ni Lhou, Ampeu ye lakhi.

³⁰ O mlo kuchopu, o ngulho kuchopu, o kükümsü kümtsü eno o kumto kümtsü pesü Ampeu o Lhou kimiyelo.’

³¹ Akiniu no hike: ‘O likhi o toi o kisüghümi kimiye lo.’ Hinguno azakütsü akijeu kütau kühae.”

³² Ayezah shikükau no Jisü vilo pi, “No ye achipi, Shikükau. Nono kuchou no Pa ye lakhi, eno Pa nguno alau ye khumu kühae pivae.

³³ Eno tipau gholo amlo kuchopu, vethakulu eno akumto kümtsü pesü Pa kimiyeni keu, alikhi ampi toi akisüghüu kimiyeni keu, hipaqo no kuchopu kipti kümllagho eno aghakishi kümtsü nguno akijeu ke.”

³⁴ Kughou pa no alokütsü shi khochile keu Jisü no chilu keno, pa no pi, “No ye Alhou yekipe lono putosü movae.” Tithiu khunomu pa vilo ighikuju tsa iniju mlave.

Khristo ye Khuu Nu Kea?

³⁵ Jisü no achineki lo shika akelo pi, “Ayezah shikükami ye kishino Khristo ye David nue picheni kea?

³⁶ David ampi no Aghungu Kimthe vecheo ishi shuphe keghi, “‘Ampeu no I Mpeu vilo pi, “I no o ghümi pesü o pukhu qholo qhitsü moke kutolo I u ajeu iqalo.”’

³⁷ David ampi no pa vilo Ampeu ipiche ke kishino pa ye pa nue pini kea?” Aqokitikhi no amlo kiqishi ti chiluve.

Ayezah Shikükami Jukuto lo

³⁸ Jisü no shika akelo pi, “Ayezah shikükami, khunoqo chijeboike phi pusü iqhoiqi nishi eno alhikishiaqo lo agigihu laju cheni keno jukuto lo!

³⁹ Panongu no sinagog lo a-a akiviu eno aghulhua lo ghi agigihupu lakhü pükha cheni,

⁴⁰ eno chimemi kilo thime jeli pishiqhi luve tsüno amqüshi akighini kushuo shi cheni. Panongu no aghimepu alau ithulu nani.”

Chimemi Lakhi Kümllagho

⁴¹ Jisü no achineki khala lo akinibo püache keu züu iqa no aqokitikhi no tile akümllagho bolo pisa peqhisü keu jua. Kinimi kutomo no akini kütsasa pewo sütsü.

⁴² Tile kumlhomi achimeu lakhi no ighi no pisa muno gholo aghulou kini sütsü.

⁴³ Jisü no akhopemi pa lau kuno panoqo vilo pi, “Mtsüqheino I no nongu vilo piani, kumlhomi achimeu hipau no akümllagho bolo qhasütsü akemi kümtsü nguno alau süve tsüae.

⁴⁴ Kughengu panongu ye pano no pofushi akeu kiqi lono sütsüe, ikemu li ye aqüagha lou no, akhuna shilu kepushi li no pükhüpe akeu qhoi tsüve ke.”