Mark 11 - Sumi Naga CL (Re-edited) Bible (BSI)

Tokulu Hukülü shi Ilo

¹ Kughou panongu no Jerusalem kupunu ghi Olive toghi pukhu lo Bethphage eno Bethany tokeno, Jisü no pa khopemi kini puwu

² eno pama vilo pi, “Nokujo zülo aphu akeu lo ilolo, eno ti tokelo khurha lhothe lakhi khunomu iqaju mphi keu tshü püaghi keu ithulu nanike ti kuqho saghilo.

³ Tsala khuana no, ‘Kushiye tishi ani kea?’ ipi aye, ishi khochile lo, ‘Ampeu no avehupu shi anike, eno pai sachile saghive tsü nani.’”

⁴ Pama no wo khurha lhothe alaghi phivilo ahukikha lo tshü püaghi keu ithulu no ti kuqhove.

⁵ Timi khami tile puthugho akeqo no pama vilo pi, “Nokujo ye kiu shi ani kea, khurha lhothe kuqho ani keo?”

⁶ Jisü no pike toi pama no khochile kelo pama puwuve.

⁷ Kughou pama no ti saghi no panoqow hebephi qhatsü keno, Jisü no khurha shou iqave.

⁸ Timi kutomo no alaghi lo panow hebephi qhatsü, eno khami no aluza lono asütsüni loka süghi keqo pesü qhatsü.

⁹ Timi azüu wuve kemi eno athiu papeche kemi kümtsü no ighamku, “Hosanna! Ampeu no khuu Pa je lono cheni keno kümgha tsülo.

¹⁰ Ni sü David yekipe ghuloki chekeu kümgha tsülo! Kungugha kiqhe lono Hosanna pi shelo!”

¹¹ Jisü no Jerusalem lo iloghi no achineki lo ilove. Pa no tsüghüwo qhoi juve no munuuve kehu akhopemi sasü Bethany lo ipeve.

Mububo Müsüini

¹² Tishiwo thoghiu panongu no Bethany qhive no wuche kelo, Jisü ye müzüthive.

¹³ Mububo lakhi miniboi putou no ithulu kehu athi pithi aghini mala Jisü no wuju. Kughou pa no ighi keno, mububo pithi kepu tüqhüdo tomo no akehu anipa kumo aye kiumu ithumlave.

¹⁴ Pa no asübo vilo pi, “Milakhi mu o xathi khilemu chu pemoniu.” Pa khopemi no ti chiluve.

Jisü no Achineki Shikimthe

¹⁵ Panongu no Jerusalem tove kethiu Jisü no achineki lo ilo khunoqo no küqhükili shi akeno haphe thuve, eno pisa kilitsü akemi kibepu ngo amiqhi je akeqo lakhü kümtsü tukulove tsü.

¹⁶ Tinguno alau milakhimu tinhemgha pesü achineki kathasü iqhoiqi pemove.

¹⁷ Pa no timiqo kütsüshika akelo panoqo vilo pi, “‘I ki ye shiye kümtsü ghenguno akighini ki ipi ku nani’ ipi yepüani ke kumo? Ikemu nongu no tipau pesü süxakuchumi küghütshü-a shive tsüae.”

¹⁸ Achinetomi ngo Ayezah shikükami no ti chiluve, eno pa pithiveni keu shi kuchughu, ikemu aqokitikhi kümtsü no paw shiküka chilupe akichiqhi pa gholo akehu panongu ye pa msa ae.

¹⁹ Kughou avela shive keno, Jisü ngo pa khopemi ye aphughi lono ipeve.

Mububo launo Shikalu

²⁰ Thanau inaqhe Jisü ngo pa khopemi no ala lo chekelo mububo huye akuhu kutolo thi-ilove aghi keu ithulu.

²¹ Peter no kümsülu no Jisü vilo pi, “Rabbi, julo! Nono müsüini ketoi mububo huye thi-ilovae.”

²² Jisü no panoqo vilo pi, “Alhou lau aküpülü alo.

²³ Kuchou no I no nongu vilo piani, khukhumu atoghi hipau vilo, ‘O likhi o pesü azüghi lo vesüve lo,’ ipi no pa mlo lono lipimo püzü ti ye shikupu nanie pi pülü aye, pa ghenguno ti shitsü nani.

²⁴ Tighenguno I no nongu vilo piani, nongu no kiu kiumu akighini lono khu kelo, ti ithuluvae pi pülülo, tishi aye ti ye ow shilu nani.

²⁵ Kughou nongu no akighini shiniye puthugho keno, khuana shou amlokiqi kumo aghi aye peve tsülo, tishikeu lono nongu Papu kungugha lo küau ghi nongu kipimi qhive tsü nani.”

²⁶ (Ikemu nongu no akipimi peve tsümo aye, nongu Papu kungugha lo küau ghi nongu kipimi peve tsümo nani.)

Jisü Kükagha Khü

²⁷ Itaghi panongu no Jerusalem lo ighi no Jisü no achineki khala lo chekelo achinetomi ngo Ayezah shikükami eno layemi no pa lau ighi.

²⁸ Panongu no pa vilo ighiju, “Nono akümla hipaqo shilu akeu ye kiu kükagha lono, momu khuu no kükagha o tsükeu lono kea?”

²⁹ Jisü no panoqo khochile, “I no nongu vilo ighikuju tsa inijuni ke I khochile lo, eno I no kiu kükagha lono hipaqo shilu ani keno pini.

³⁰ John no baptiz shitsü keu ye kungugha lono keo timi launo kea? I khochile lo.”

³¹ Panongu no lakhino lakhi dolo kütsala kile, “Ningu no, ‘Kungugha lono,’ ipi aye, pa no, ‘Imaye nongu ye kushiye pa pülümo kea?’ ipinia.

³² Ikemu le ningu no, ‘Timi launo,’ ipini keu ye kishimo,” kughengu timi kutomo no John ye kuchou no tungkupmi kepi kihiche kehu panongu ye aqokitikhi msa ae.

³³ Ikehu panongu no Jisü khochile, “Ningu ye ithi amoe.” Jisü no panoqo vilo pi, “Maye ni ghi kiu kükagha lono hipaqo shi cheni keno nongu vilo pimoae.”