Mark 10 - Sumi Naga CL (Re-edited) Bible (BSI)

Aküghüxa Vehu Shika

¹ Jisü no tipa-a qhive no Judea eno Jordan kukuu wuve. Itaghi aqokitikhi no pa lau ighi no kumqo luve kehu alhoaye lo pa no shiche ketoi itaghi panoqo kütsüshika ae.

² Phariseemi no ighi no pa peju niye ighiju, “Ayezah lo timi lakhi ye pa nipu küghüxalu nanima?”

³ Pa no khochile, “Moses ye azah kiu nongu tsü kea?”

⁴ Panoqo no pi, “Moses ye timi lakhi pelo aküghüxa shepe yeve no pa nipu puwuve peni keu puloza tsüe.”

⁵ Jisü no panoqo vilo pi, “Nongu mlo kümka ghenguno Moses no hipa zakütsü yepe nongu tsüe.

⁶ Ikemu pulhoküsü bothu lono Alhou no kiptimi ngo totimi lhoe.

⁷ ‘Tighenguno timi lakhi ye pa puaza qhive no pa nipu sasü küghüna wuveni,

⁸ eno pama ye ashi lakhi shiveni.’ Ikehu pama ye kini kumovae ikemu ashi lakhi shivae.

⁹ Tighenguno Alhou no kiu kime küqhave tsü akeno, timi khuu pelomu hexavetsü pekevilo.”

¹⁰ Aki lo ighive kethiu akhopemi no itaghi hipa vehu pa vilo ighiju.

¹¹ Pa no khochile, “Khukhumu pa nipu küghüxave no kütami sasü külauve keu ye pa nipu shou kütüqhave keu xine shi ani,

¹² eno anipu no akimi küghüxave no kütami sasü külauve aye, li ye kütüqhave keu xine shi anie.”

Itimiqo I lau Ighi Pelo

¹³ Timi khami no Jisü pelo itimiqo shou pa u betsü penike sasü ighi akehu akhopemi no panoqo lomipi.

¹⁴ Ikemu kughou Jisü no ti ithulu keno, pa ye aghaideve no panoqo vilo pi, “Itimiqo pelo I lau ighi pelo; panoqo lakha kevilo, kughengu Alhou yekipe ye hitoi keqo salae.

¹⁵ Kuchou no I no nongu vilo piani, khukhumu itimi toi Alhou yekipe ikhilumo keu ye khilemu tile ilomla nani.”

¹⁶ Tishino pa no itimiqo khape ngono panoqo shou pa u beno kümghatsü.

Apumi Kinimi Lakhi

¹⁷ Jisü no tipa-a qhive no wuche kelo timi lakhi no ala lo hasü ighi no pa zülo qhoqhünhepe ngono pi, “Shikükau kiviu, ni ye lhokta küxü ighilu nike kiu shimasa kea?”

¹⁸ Jisü no pa vilo pi, “No ye kushiye I vilo akiviu ipi ani kea? Alhou likhino akivi kethono khunomu kumoe.

¹⁹ Nono azakütsü ithi ani noshi: ‘Ghiqhi kevilo, Shupu-salha kevilo, Püka kevilo, Akimki thopi tsü kevilo, Pishiqhipe süxaluve kevilo, O pu ngo o za gihulo.’”

²⁰ Apuu huno pi, “Shikükau, hi kümtsü I lhothe lono pelu ighivae.”

²¹ Tile Jisü no pa kimiyeqhiyi juno pi, “No ye thime lakhi no mikhe ani: wulo, nono aghi keu kümtsü jepe kumlhomi tsüve lo, eno no ye kungugha lo küakini aniae; tishino I pape ighilo.”

²² Hipa tsa no anhü thizümüipe pa ye agi khümüi wove, kughengu pa ye akini kütsasa acheke.

²³ Jisü no tsüghüwo juno pa khopemi vilo pi, “Kinimi no Alhou yekipe lo iloluni keu ye kishi kushokütsüpu kelae!”

²⁴ Pa tsa chilupe akhopemi ye akümzave. Ikemu pa no itaghi panoqo vilo pi, “Anuliqo, Alhou yekipe lo iloluni keu ye kishi kushokütsüpu kelae!

²⁵ Kinimi no Alhou yekipe lo iloluni keu ye sayeshi no ayipuki lono wuve keu no akümlaue.”

²⁶ Akhopemi no akumou akümza kitheve no pa vilo pi, “Imaye khuno xalu nani kea?”

²⁷ Jisü no panoqo juno pi, “Timi ghengu ye shikümlapue, ikemu Alhou ghengu ye kumoe. Kughengu Alhou ghengu ye thokha kümtsü shikulupu likhie.”

²⁸ Tile Peter no pa vilo pi thuve, “Ningu ye qhoi qhive no o pape ighive akehu ithilo.”

²⁹ Jisü no pi, “Kuchou no I no nongu vilo piani, I je ghenguno eno atsakiviu ghenguno akibo, momu athiküzü acheli, apuaza, atianuli, momu aki alu qhive kemi kümtsü

³⁰ asaxü ithulu nani. Hipa tiqheli lo eno ighini keu lhokta küxü lo pa no itehi akibo, athiküzü acheli, aza, atianuli, aki alu akeu nguno, eno kijiküpsa ghi süküqha no, ghuthu aqhe piqi ithulu nani.

³¹ Ikemu atüghümi kutomo no ashekhami shive nani, eno ashekhami no atüghümi shive nani.”

Akithi eno Xüchilekulu vehu Itaghi Pi

³² Jisü ngo akhopemi no Jerusalem lo iqho niye ala lo chekelo, pa no kütami züu shiche. Akhopemi ye kümsü kimghei che eno panoqo pape chekemi ye ighüqhiyi che. Jisü no itaghi pano chighikini kütashi kuluve no pa lau kiu shiniye ani keno panoqo vilo pi thuve,

³³ “Ningu ye Jerusalem lo iqho cheni, eno Timi Nu ye küghape achinetomi ngo Ayezah shikükami u lo süve tsü nani, tishino panongu no akithipu za pa shou küghathave tsüno pesü Jewkumomi u lo süvetsü nani.

³⁴ Tithiu panongu no pa kiphikumoshi junu nani, amiti pesü müsüte, akighikipili ngo asüthalu pesü heqhi no pithive nani. Tishimu atsala küthü thiu pa ye ithughive nani.”

James ngo John no Qhüiniju

³⁵ Zebedee nu James ngo John pama no Jisü lau ighi no pi, “Shikükau, nikujo no o lau kiu kiumu khu kelo o pelo ni ghenguno shitsü penishi ani.”

³⁶ Pa no pama vilo pi, “I pelo nokujo ghenguno kiu shitsü penishi ani kea?”

³⁷ Pama no pi, “O juküvü tsala ighi kelo nikujo lakhi no o u ajeu eno lakhi no o u piyiu iqalu penike azah tsülo.”

³⁸ Jisü no pama vilo pi, “Nokujo ye kiu khu ani keno ithi amoe. Nokujo ye I no shoniye akeu jukhu sholu nanio? Momu baptiz khikhi I shou shitsü keno nokujo ye baptiz tipau shilu nanima?”

³⁹ “Nikujo ye shilu nani,” pama no khochile. Jisü no pama vilo pi, “Nokujo ye I no shokeu jukhu sho nani, eno baptiz khikhi I shou shitsü keno nokujo ghi baptiz tipau shilu nani,

⁴⁰ ikemu I u ajeu momu piyiu iqani keu za ye I no tsü nanike kumoe, ikemu ti ye khuno ghenguno kutope qhive akeno pano salake.”

⁴¹ Kughou akhopemi chighi no hi chilu keno, panongu ye James ngo John pama jupe aghaideve.

⁴² Ikemu Jisü no panoqo kukütsü no pi, “Jewkumomi gholo ye khunono yepemi kepi cheni keno tipaqo no timiqo shou ampeu shicheni, titoi panow kijemi no pano shou kükagha peche keu nongu no ithi ani.

⁴³ Ikemu nongu dolou ye tishimo nani, nongu gholo khukhumu akijeu shinishi keu no nongu qeu shimasa,

⁴⁴ eno nongu gholo atüghüu shinishi keu no kümtsü qüaxeu shimasae.

⁴⁵ Kughengu Timi Nuu ghi huthu peniye ighike kumoe, ikemu huthu niyeke, eno timi kutomo ghenguno pa küxü pesü xakipheme shi tsüniye ighike.”

Anhecheu Bartimaeus Shipivi

⁴⁶ Panongu no Jericho lo ighi; eno Jisü ye itaghi tileno akhopemi ngo aqokitikhi kije sasü wuche kelo, khukuchumi anhecheu Bartimaeus ipikeu, Timaeus nu, no alaphe lo iqaa.

⁴⁷ Kughou Nazarethmi Jisü kepi pa no chilu keno, pa no igha thuve no pi, “David Nu Jisü, I kimiyekütü tsülo!”

⁴⁸ Timi kutomo no pa vilo inaqhoive lopi sakiyi. Ikemu pa no alau ighamku, “David Nu, I kimiyekütü tsülo!”

⁴⁹ Jisü no ngove no pi, “Pa kulo.” Khami no pa kuno pi, “Amlo mtolo, pa no o ku anike ithughi lo.”

⁵⁰ Pa no hebephi ikhipe peve no ilhethu Jisü lau ighi.

⁵¹ Jisü no pa vilo pi, “No ye I pelo o ghenguno kiu shitsü penishi ani kea?” Anhecheu no pi, “Rabbi, ni ye ithulu kitheni shiani.”

⁵² Jisü no pa vilo pi, “Wolo; o küpülü no o shipivivae.” Paikhavi no pa ye anhetsü alove no ithulu kitheve püzü pa pape wuve.