Mark 1 - Sumi Naga CL (Re-edited) Bible (BSI)

Baptiz Kishiu John no Ala Kutotsü

¹ Alhou Nu Jisü Khristo tsakiviu ghili hukuthu.

² Tungkupu Isaiah no yepüake toi, “Julo, I ghinikishiu khuu o laghi kutotsü nani keno I no o züu no puwu ani.

³ Yenguyi ke-a lo milakhi no ighamku ani: ‘Ampeu ghenguno ala kutolo; Pa laghi müzüchoi shitsü lo,’”

⁴ John no yenguyi ke-a lo baptiz shisü ighi eno axine qhitsü kepushi Alhou lau xaide ighi no baptiz shilu penike sheshu.

⁵ Judea ghakhu eno Jerusalem lo akemi kümtsü no pa lau wuche eno pano xine piphe kelo pa no Jordan ghoki lono panoqo baptiz shitsü cheke.

⁶ John ye sayeshi mhi phimini pepu, ashiyiko pokha pesü pa chita vehopu eno leusü ngo aghalo khingozü chuche.

⁷ Pa no ishi kütsü, “I thiu khuu cheni keno, pa ye I nguno akumtou kehu ni ye itsaqi no pa pukhukuqho kighi mu kuqho küzüpu kumoe.

⁸ I no azü pesü nongu baptiz shive tsüae, ikemu pa ye Aghungu Kimthe pesü nongu baptiz shitsü nani.”

Jisü Baptiz Shilu

⁹ Tipa ghuloki lo Jisü ye Galilee qhalo Nazareth lono chesü ighi no Jordan ghoki lono John no baptiz shive tsü.

¹⁰ Kughou Jisü no azü lono ithughi keno, paikhavi atsütsü khaqhi keu pa no ithulu eno Aghungu no miqhedu toi iqighi püzü pa shou ngove.

¹¹ Eno atsütsü lono asütsa lakhi ighi, “No ye I qhuu I Nu, O jupe I mloqi cheni.”

¹² Paikhavi Alhou Ghungu no pa hape yenguyi ke-a lo puwuve.

¹³ Eno pa ye yenguyi ke-a lo atsala lhobidi Satan no ghuju ae. Tilau pa ye tüghashiqo gholo ae, eno Alhou ghinimi no Pa jukuto kheae.

Jisü Kümla Hukuthu

¹⁴ John kügha luve kethiu Jisü no Alhou tsakiviu pesü Galilee lo asheshu ighi,

¹⁵ “Ado ye kupuvae, eno Alhou yekipe ye kupunuvae, xaidelo eno atsakiviu pülü lulo.”

¹⁶ Jisü no Galilee Züghi mxüsü wuche kelo akhakükhami Simon ngo pa thiküzüu Andrew pama akhame pesü azükutho lo vesü cheghi keu ithulu.

¹⁷ Jisü no pama vilo pi, “I papelo, I no nongu pesü timi kükhami shipeni.”

¹⁸ Paikhavi pama no akhame qhive no pa pape wuve.

¹⁹ Tishino khitohi kumo lo, Jisü no Zebedee nu James ngo pa thiküzüu John pama ashuka lono akhame pukho aghi keu ithulu.

²⁰ Pa no kukhavi pama no ashuka lo aqekiqemi gholo pama papu Zebedee qhive no pa pape wuve.

Tüghaküsa Shou Jisü Kükagha

²¹ Panongu no Capernaum lo wuve, eno Sabbath tsalani Jisü no sinagog lono kütsü ae.

²² Pa kükütsü chilu no timiqo ye akümzave, kughengu pa no Ayezah shikükami toi mono kükagha akemi toi kütsü ke.

²³ Züleno tüghaküsa no peitha akeu timi lakhi sinagog lo aghi püzü pa no igha ithughi,

²⁴ “O Nazarethmi Jisü, no ye ningu lau kiu shikepu ani kea? No ye ni kütsave niye ighive akeshea? Ni ye no khuu keno ithi ani—Alhouw Akimtheu ke.”

²⁵ Ikemu Jisü no pa ghasüve no pi, “Inaqhoive lo, eno pa lau no ipeghive lo!”

²⁶ Tüghaküsa huno timi phiau sükütsüpe sükuchoqhi püzü asütsa kuloghi shi igha no pa launo ipeghive.

²⁷ Ikelo timi kümtsü no akümzave püzü panoqo dolo ishi ighiju kile, “Hi ye kiu kea? Kükagha pesü akükütsü kithe tsü ani nokua! Pa ye tüghaküsaqo ghi azah tsü ani, eno tipaqo ghi pa gholu anie.”

²⁸ Paikhavi no Galilee eno ti sümxape akeu qha kümtsü lo pa juaje kügha wove.

Jisü no Timi Kutomo Shipivi

²⁹ Tithiu Jisü no sinagog qhive no mtazü James ngo John pama sasü Simon ngo Andrew kilo ilove.

³⁰ Tipa tüqhüdo lo Simon pani ye aghamki püzü azüa lo akehu timiqo no mtazü li vehu pesü Jisü vilo pi.

³¹ Ikehu pa no ighi no li u tsüqüpe sünhe puthu kelo paikhavi aghakimki no li launo wuve, eno li ye timiqo loji thuve.

³² Tipani avelau kughou khetsünhe ilove keno, timiqo no küsükinimi ngo tüghaküsa no ghime akeqo kümtsü sasü Jisü lau ighi.

³³ Eno aphughi lo küxümi aqha no aki khala lo kumqo luve.

³⁴ Ikehu pa no aküsü jeli xapusü akemi kutomo shipivi tsü, eno tüghaküsa kutomo hapheve tsü. Ikemu pa ye tüghaküsaqo pelo atsa pilu pemoe, kughengu panoqo ghi pa ithi ake.

Jisü no Galilee lo Kütsüwu

³⁵ Thanau tsükutho lau Jisü no itheno ithuve no züghüi aphi lono yenguyi ke-a lo wuve, eno tilauno inikhue.

³⁶ Ikemu Simon ngo pa qomi no Jisü phuche

³⁷ kehu pa ithulu kelo panoqo no pi, “Kümtsü no o phu cheni.”

³⁸ Jisü no panoqo khochile, “Aphughi kütau akupunu lo akeqo lo ghi ni ye asheshu masa anike ningu wuni nolo, kughengu ni ye ti ghenguno hilau ipeghive ake.”

³⁹ Tishino pa no Galilee qha kümtsü lo wuno sinagog lono kütsü eno tüghaküsaqo haphe.

Jisü no Apüghami Shikimthe

⁴⁰ Ado hami thiu apüghami lakhi no Jisü lau ighi no qhoqhünhe pe tsüikhomo pa qhüiniju, “Nono pulo aye no ye I shikimthelu nani.”

⁴¹ Jisü no amloighive no pa u chhope apüghami bu püzü pi, “Ni ye pulo ani, mithe luvelo!”

⁴² Paikhavi no pa philo apügha kühave, eno pa ye mithe luve.

⁴³ Jisü no mtazü pa hapuwove ghi tsatsai pa ghutu,

⁴⁴ eno pi, “Khuu vilomu kiu tsa mu pi kevilo. Ikemu wuno o mpi pesü achineu piyelo, tishino o shikimthe luve keu ghenguno timi zülo thopi shi kepushi Moses no azah tsü ketoi akümllagho tsülo.”

⁴⁵ Ikemu pa no wuve no hipa tsa zaleuve eno pikülha thuve, ikehu hipa thiu Jisü ye aphughi khalau yenguyi ke-a lo kumo aye pekiphe shi aphughi lo ilo mlave, ikemu timiqo no akuaqha lono pa lau ighi.