MALAKI 4 - Sumi Naga CL (Re-edited) Bible (BSI)

Ampeu Tsala Kije

¹ “Kughengu julo, atsala ye cheni, amiphoki lo toi iqü ani, akuchhomami eno küsaküghami kümtsü aghijini toi pitive nani. Atsala tipau chekeu huno panoqo pitive nani, aqokitikhi Mpeu no pi, tishianguno tino panoqo ghenguno akuhu momu aloka mu qhimono pitive nani.

² Ikemu nongu I je sümsa chekemi ghengu ye, achipiu mikucho no khetsünhe küvü toi shikipivi süghi nani. Amshitiqo no kakashi ilhe ketoi nongu no alovi nani.

³ Tipau tsalani kughou I no mlani keno, nongu no küsaküghami qoda nani, kughengu panoqo ye nongu pukhumza lo ayevu shive nani, aqokitikhi Mpeu no pi.

⁴ “I qeu Moses Yezah, xaküthaza eno akhuayeqo I no Horeb lono Israelmi kümtsü lau tsükeu kümsülu lo.

⁵ “Julo, atsala kije eno aküighüpu ighikumo züu I no Elijah tungkupu nongu lau puwu nani.

⁶ Eno pa no apunoqo mlo tsüghü sawo anuliqo tsü nani eno anuliqo mlo pesü apunoqo tsü nani, tikumo aye I no kütsakungo keu xaküthaza pesü ighi no ayeghi lo hepuku nani.”