MALAKI 3 - Sumi Naga CL (Re-edited) Bible (BSI)

¹ “Julo, I no I tsapeu puwu ani, eno pa no I züuno alaghi kuto nani. Ampeu nongu no phuche keu ye Pa Chineki lo züleno ighi nani; eno puloshoqhi tsapeu khuu lau nongu no alokiqi acheni keno, julo, pa ye cheni, aqokitikhi Mpeu no pi.

² Ikemu khuu no pa ikighi tsala lo kutuu luni, eno khuu no pa no ipeghi kelo puthugho luni kea? Kughengu pa ye ghukimthe chekeu mi toi eno aphi kighishimiw asalu toi ke.

³ Pa no ghükayi ghukimthe eno thakimthe chekemi toi iqa nani, eno pa no Levi nuliqo shikimthe no ghükayi ngo ameshoyi toi panoqo ghukimthe nani, eno panongu no achipiu mikucho lono Ampeu lau akümllagho süghi nani.

⁴ Tileno wovekeu tsala eno khaghi mpeqo lo toi Judah ngo Jerusalem kümllagho ye Ampeu lau ikhikulupu shi nani.

⁵ “Tishino I no nongu lau küghakütha ghenguno kupunu ighi nani. Küdüumi, shupu chekemi, khunono akimki shoqhi shi cheni, khunono aqe kiqemi jume lo pishiqhi cheni, chimemi, mighimi eno inaghami qoqhi cheni, eno I sümsa chemo keno, I no panoqo shou küghatha nike ke-i thopi shi ighi nani, aqokitikhi Mpeu no pi.

Alhou Pükaqhi

⁶ “Kughengu Ni Ampeu ye kilive chemoe; tighenguno, O Jacob nuliqo, nongu ye pühave mphie.

⁷ Nongu puasüqo ghuloki lono nongu ye I yezah lono tsüghüve eno tipaqo pemove. I lau ideighilo, eno I no nongu lau ideighini, aqokitikhi Mpeu no pi. Ikemu nongu no pi, ‘Ningu ye kishi ideighini kea?’

⁸ Timi ye Alhou pükaqhilu nani keshea? Ikemu nongu no I pükaqhi ke. Ikeghi nongu no pi, ‘Ningu ye kishi O pükaqhive kea?’ Nonguw chighi saje eno akümllagho lono ke.

⁹ Angusü pe nongu ghushovae, kughengu nongu shiye kümtsü no I pükaqhivae,

¹⁰ Chighi saje kümtsü Iw pekükütsüki lo süghilo, tishianguno I ki lo achuqupu apenie. Tithiuno I no nongu ghenguno atsütsü lashe khaqhi tsüno nongu no lukümkha shimoke kutolo kükümgha lepiqi tsü nani mala I pejulo, aqokitikhi Mpeu no pi.

¹¹ I no nongu züqhushi külhüve chekeu pithe lomipi nani, tishikeu vecheo tino nongu yeghi lo axathiqo kütsavemo nani, eno alu lo nongu tsaiboqo ye pithi ixivemo nani, aqokitikhi Mpeu no pi.

¹² Tishino shiye kümtsü no angukiviu ipi nongu ku nani, kughengu nongu ye alokiqipu ghüna-a shi nani, aqokitikhi Mpeu no pi.

¹³ “Nongu no I shou mkamghai atsa pike, Ampeu no pi. Ikemu nongu no pi, ‘Ningu ye kishi O shou pipuku kea?’

¹⁴ Nongu no pi, ‘Ampeu qe akeu ye adoue. Pa za pape momu qanimlo Ampeu zülo chewu keu lo kiu ala ani kea?

¹⁵ Ikemu itehi ye ningu no akuchhomami vilo müghae pi ani. Küsaküghami ye kinikülü shiluke likhi kumono Alhou peju no pokaluve cheni.’”

Kümsüchilekulu Kaku

¹⁶ Ampeu sümsa chekemi lakhino lakhi sasü küptsae. Ampeu no amlo tsüqhiyi shino panoqo tsa chiluvae, eno Pa zülo Pa sümsa no gihu chekemi ye kümsüchilekulu kaku lakhi lo yesüve tsüe.

¹⁷ “I no kughou panongu pesü Iw akughupu mheghi shiluveni keno tipau tsala lono panongu ye Iw shive nani, aqokitikhi Mpeu no pi, eno apu lakhino anu khuu pa qe cheni keno pa kimiye ketoi I no panoqo kimiye nani.

¹⁸ Tishino achipiu mikuchou ngo küsaküghau dolo, eno I qe chekeu ngo qe chemo keu dolo kiyeqü akeu nongu no ithulu nani.