MALAKI 2 - Sumi Naga CL (Re-edited) Bible (BSI)

Ampeu no Achinemi Lomipi

¹ “Itehi, O achinemiqo, azah hipau ye nongu ghenguno ke.

² Nongu no ini move aye, nongu no I je gihuni keu amlo lo qhimove aye, aqokitikhi Mpeu no pi, I no ghukusho nongu lau puwu nani eno I no nonguw kükümghaqo ghushove nani. Nongu no amlo lo hipau süpu moveke ghenguno mtsüqheino I no panoqo ghushovae.

³ Julo, I no nongu tianuli lomipi no nongu kümllagho tübatüzü pesü nongu gi nudatsü nani, eno tipau gholono nongu peve nani.

⁴ Tishikeu lono azah hipau ye I no nongu tsü kepi nongu no ithi nani, eno Levimi lau Iw puloshoqhi ye puthugho lu nani, aqokitikhi Mpeu no pi.

⁵ Pa lau Iw puloshoqhi ye aküxüküa lakhi eno aloino keu, ti ye I no pa tsüe. Ti ye sükümsa puloshoqhi, pa no I sümsa eno I je gihu ghi puthughoe.

⁶ Kuchou kükütsütsa no pa kichi lo ae, eno pa mütsü loye kiumu achipikumo ithumla. Külakishi eno müzüchoi I gholo cheche, eno pa no axine lono timi kutomo tutsüghü tsüe.

⁷ Kughengu achinemi lakhi kichi loye akighithi tsa pükha phetsü masa, eno timiqo ye pa tsapi lono akükütsütsa phu masae, kughengu pa ye aqokitikhi Mpeu tsapeu ke.

⁸ Ikemu nongu ye mtsüqhei keu laghi lono tsüghü wuvae. Nongu kükütsütsa vecheo timi kutomo no küpxavae. Nongu no Levimiw puloshoqhi shipüsavae, aqokitikhi Mpeu no pi,

⁹ ikehu nongu no I laghi papemo eno nongu kükütsütsa lo agiju keu qhemi I no nongu pesü timi kümtsü zülono thaigha eno jukuloti peke.”

Judah no Puloshoqhi Shipütha

¹⁰ Ningu kümtsü Apu lakhi anike kumo? Alhou lakhi no ningu lhophe kekumo keshea? Imaye kushiye ningu ye lakhi no lakhi pükhübemla no ningu puasüqow puloshoqhi shipüthave kea?

¹¹ Judah ye pükhükümla shi ighivae, Israel eno Jerusalem lo aphikümqhüpu kümla shivae. Kughengu Judah ye Ampeu chineki, khikhi Pa no kimiye cheni keno tipau shipüthave eno inaghami lhou nga sasü külauve ke.

¹² Alaghami dolo khukhumu hipa gholau no akümllagho pesü aqokitikhi Mpeu tsükeu ye Ampeu pelo Jacob phiki lono ikhive peni!

¹³ Thime akiniu hipau nongu no shi ani. Nongu no ighamku eno qakeu nhezü kipiji vecheo Ampeu kümlla khache pütsü cheni, kughengu Pa no nongu kümllagho kihi tsüamo momu nongu u lono kimiyeqhiyi ti ikhilutsü amovae.

¹⁴ Ikemu nongu no pi, “Pa ye kushiye ikhilu tsüamo kea?” Kughengu Ampeu no no eno o lhothe lo nipu, khuu puloshoqhi vecheo o nipu eno o tüna keghi nono li zülo pükhükümla shikeno, nokujo dolo thopi ke.

¹⁵ Pa no pama pesü ashi aghungu lakhishi küqhatsü kekumo keshea? Eno Alhou ye tipau vecheo kiu phucheni kea? Alhou sükümsa lagha. Ikehu nongu ye aghungu lono jukuto alo, eno nongu dolo khumu nongu lhothe lo nipu lau pükhükümla shi kevilo.

¹⁶ “Kughengu timi khuu no pa nipu kimiye move no li küghüxaveni keno, Ampeu, Israel Lhou no pi, pa ye aji no pa phimini hedape ani, ipi aqokitikhi Mpeu no pi. Ikehu nongu ye aghungu lono jukuto alo, eno pükhükümla shi kevilo.”

Ampeu Tsapeu

¹⁷ Nongu no nongu tsa vecheo Ampeu lokümghavae. Ikemu nongu no pi, “Ningu ye kishi Pa lokümghave kea?” “Khukhumu küsakügha shikeu ye Ampeu nhethe lo akivi ke eno Pa ye tipaqo lo aloqi cheni, ipikeu lono ke.” Momu “Achipiu xakütha Lhou ye khile ani kea?” ipikeu lono ke.