Luke 8 - Sumi Naga CL (Re-edited) Bible (BSI)

Jisü Gholo Kichemi Totimi

¹ Tithiu Jisü no Alhou yekipe tsakiviu sheshusü mishighüna eno aphuqo lo wu. Akhopemi chighikini no pa gholo wu,

² eno totimi khami khuno philono aghawu lhoksa haphetsü, eno küsükini no tsügha püa kelo pa no shipivitsü keno, panoqo ghi cheke: Magdalene ipi chekeu Mary, khuu philono tüghami tsüni haphe keno;

³ Chuza nipu Joanna, Herod kibo jukükütsüu; eno Susanna ishi, tinguno alau kütami kutomo no pano u ghi lono ipeghi keu pesü panoqo kuphu tsüe.

Apitikiveu Kimghikipiye

⁴ Kughou aqokitikhi kije no mishiphu lakhi shelo lakhi lono ighi kumqope akeno, Jisü no kimghikipiye lono pithuve,

⁵ “Apitikiveu no pa piti pesü veniye wu. Pa no veche kelo, hami no ala lo ikiqive no neda qodave, eno aghauqo no yewo mighive.

⁶ Hami no atuqu shou vepukulu, tino thuikughi kelo thoni-tsanyi ke-a lo kumo kehu thizümüi ilove.

⁷ Apiti hami no asahuli lo ikiqi ilove, eno asahubo no tipa gholono thuikughi no ghüsüve.

⁸ Ikemu hami ye ayeghi kivi lo ilolu no thuikughi püzü aqhe piqi pithilu.” Jisü no atsa hipaqo pi akelo ighamku asheshu, “Khukhumu chikulupu kini pu akeu no chilulo.”

Kimghikipiye Kimji

⁹ Kughou akhopemi no kimghikipiye hipau kiqi pa vilo ighiju keno,

¹⁰ pa no pi, “Nongu ye Alhou yekipe tuqhou ithi penike tsüvae, ikemu kütami ghengu ye kimghikipiye lono ke, tishianguno ‘panongu no ithulu animu ithikuthu monani, eno chilu animu vethamla nani.’

¹¹ Kimghikipiye kimji ye hike: Apiti ye Alhou Tsa ke.

¹² Ala lo ikiqive keqo ye Atsa chiluve keqoe; tileno tüghami no ighi no pano mlo lono Atsa hu ikhi süwuve tsü cheni, tishikeu lono panongu pelo pülülu no xalu pemo niye ke.

¹³ Khikhi atuqu shou iku keno tipaqo ye, Atsa chilu kelo alokivishi ikhilu chekeqoe. Ikemu panongu ye akuhu küha kehu ado kitila ghenguno pülü cheni, eno peju keu do ighike lono idewove cheni.

¹⁴ Asahuli lo ikiqi keqo ye Atsa chiluve kemi, ikemu ayeghi xülou azüvü keu, küakini kimne eno ashi ghakiqipu küxü huno panongu no wuche keu la lono ghüsüve, eno pano xathi ye nimove cheni.

¹⁵ Ikemu khikhi ayeghi kivi lo ilolu keno, tipaqo ye Atsa chilu püzü panow kuchou eno akivi mlo lo tsatsai qhiluve chekemi, ikehu pano ye kheakulu shikeu lono axathi pithilu cheni.

Akulu Küqüpe Qho Kevilo

¹⁶ “Khunomu akulu küqüpe ali no qhove chemo momu alüpa qhou qhive chemoe, ikemu akibepu shou qhi cheni, tishikeu lono aki lo iloghi kemi no aküvü ithulu cheni.

¹⁷ Kughengu itehi küsü püakeu kiumu pephemo nikeu ye kühae, tike kumono tuqhou vehu kiumu ithi move eno aküvü lo saipeghi moveni keu kühae.

¹⁸ Tighenguno nongu ye kishi chilu cheni keno tsaqüi shilo, kughengu khuu no aghini keno alau shi tsü nani, eno khuu no aghi moni keno, pa no kiu anie pi kümsü cheni keno, tiu ghi luve tsü nani.”

Jisü Paza eno Athiküzümi

¹⁹ Tithiu Jisü paza ngo athiküzümi no pa lau ighi, ikemu aqokitikhi ghenguno ilo pa kupunu mlano ae.

²⁰ Pa vilo ishi pi, “O za ngo o thiküzümi ye o sasü kusholu nishi kehu hule khalau puthugho ani.”

²¹ Ikemu pa no khochile, “Khunono Alhou tsa chilu no ti pecheni keno, pano no I za eno I thiküzümie.”

Jisü no Pasapagha Ghasü

²² Ghulo lakhi Jisü no pa khopemi sasü ashuka lo ikuno panoqo vilo pi, “Ningu azü kathasü tüxau ikuni shilo.” Panongu no wuche

²³ kelo pa ye züuve. Tile pasapagha mülhü kuloghi no azü lo fuchighi iloghi, azü no panongu shuka chili ikughiuve no akümsapu lo ilove.

²⁴ Panongu no wu püzü Jisü küda puthu no pi, “Ampeu, Ampeu, ningu ye pühauve cheae!” Pa no ithu amülhü ngo azü fukukucho lomipi, ikelo tipaqo no tave, eno tile iqüghaive.

²⁵ Pa no panongu vilo pi, “Nongu küpülü khile ani kea?” Panongu ye msaichi eno akümzaqhiyi lakhi no lakhi vilo piae, “Timi hipa ye khuu keno amülhü eno azü kutolo azah tsü, eno tipaqo no pa gholu kea?”

Tüghami no Sa-akeu Shipivi

²⁶ Panongu no Galilee ghüngü lo a-a lakhi Gerasenes lo wuve.

²⁷ Kughou Jisü no ashuka lono ipeghi keno, mishighüna lono timi lakhi, khuu tüghami no sa-ache keno, ighi no pa sasü kusholu. Pa ye ado kushuo lono aphimini pumo, eno aki lo kumono akumo kilive lo ache.

²⁸ Pa no Jisü ithulu püzü ighamku pa zülo ikiqive no asütsa kuloghi lono pi, “O Shishe Akiqheu Alhou Nu Jisü, no ye I lau kiu shikepu ani kea? I no o qhüiniju anike I shikughuju kevilo.”

²⁹ Kughengu Jisü no mithekumo ghawu vilo timi launo ipeghive lopi azah tsüae. (Ghuthu kutomo hi no timi hu tsüqü luve che kehu timiqo no ayikichhe no tshüpe apukhu lo ayikha süve tsüno kheche, ikemu pa no süthave tsü, eno tüghami no pa hape yenguyi ke-a lo puwuve cheke.)

³⁰ Jisü no pa vilo pi, “O je khuu kea?” Pa no pi, “Legion,” kughengu aghawu kutomo no pa philo ake.

³¹ Tüghamiqo no Jisü vilo panoqo hape ayeghi qhou aqo lo puwu pemoni ke qhüinijua.

³² Tipa tüqhüdo lo naghuto qhau awo loji kije no achu mzasü cheghi kehu panoqo no pa vilo awoqo philo ilove penike qhüiniju. Ikehu pa no pulove tsü.

³³ Tüghamiqo no timi hu philono ipeghi no awoqo philo ilove, eno awo loji ye atuxu lo kohasü iqive püzü tilau no azüghi lo ikiqi ilo pütsüqhi khave.

³⁴ Kiu shive keno awo khemi no qhoi ithuluve no powo aphughi eno acheaxü lo pikülhave tsü.

³⁵ Timiqo no ti juniye wu, eno panongu no Jisü lau ighi kelo khuu philono tüghamiqo haphe keno, timi hu Jisü pukhu philo iqa no aphimini pepusü akükümsü ghi achipilo aghi keu ithulu, panongu ye msave.

³⁶ Thopimi no ighi akemi vilo kishi timi hu tüghami u lono xaphetsü keno aboake shi lhepiye.

³⁷ Gerasenes ngo tipa cheaxü lo küxümi ye akümsa no chhitoive kehu kümtsü no Jisü vilo pano launo wuve tsülopi qhüiniju. Tighenguno pa no idewove niye ashuka lo ikuve.

³⁸ Eno khuu philono tüghamiqo haphetsü keno, timi huno Jisü vilo pa gholo wulu pelo pi qhüiniju, ikemu pa no ishi pino pa puwove,

³⁹ “O kilo idewo lo eno Alhou no khipa qhemi o ghenguno mlave tsü akeno shuphe tsülo.” Ikehu pa ye aphughi kuchopu khipa qhemi Jisü no pa ghenguno mlatsü keno sheshusü wove.

Totimi Lakhi ngo Jairus Nga

⁴⁰ Kughou Jisü no ideighi keno, aqokitikhi kümtsü no pa khelho akehu alokivi shi pa sasülu.

⁴¹ Tile timi lakhi khuu sinagog lo yepemi keno, Jairus ipikeu no ighi. Pa no Jisü pukhu philo ikiqi ngono mlominyi pa kilo ighitsü penike qhüiniju.

⁴² Kughengu pa nga lakhi likhi achekeu, ampe chighikini qhalo shi akeu, ye thiveni keshi ae. Jisü no wuche kelo timiqo no tsatsai pa lau kuko iloghi.

⁴³ Totimi lakhi khuu ampe chighikini kutolo aji poche keno tile che. Li no akini qhoi shikipivimi launo puwove keghi khunomu li shipivi mlave.

⁴⁴ Li no Jisü thiu no hasü ighi no pa phi kighikipili bulu, paikhavi no chiji akeu hu tave.

⁴⁵ Tile Jisü no pi, “Khuu no I bu kea?” Timi kümtsü no milive kelo, Peter no pi, “Ampeu, aqokitikhi hijeje no sühope kukokile o gholo cheni kehu!”

⁴⁶ Ikemu Jisü no pi, “Khuana no I buvapi, kughengu I launo aküka ipeve keu I no pimhe luvae.”

⁴⁷ Kughou totimi huno küzükugho shi khamlave keno, li no thüthüshi ighi no pa zülo itsaqipe ngono aqha nhethe lono kushiye pa bu, eno kishi paikhavi no li shipivive tsü keno shuphe tsü.

⁴⁸ Jisü no li vilo pi, “Angao, o küpülü no o shipivivae; aloino wolo.”

⁴⁹ Pa no atsa pi aphi lono timi khami yepeu ki lono ighi no pi, “O nga ye thive ake Akükütsüu püna akevilo.”

⁵⁰ Jisü no ti chilu kelo yepeu vilo pi, “Msa kevilo, pülüke likhi shilo, eno li ye alove nani.”

⁵¹ Pa no aki lo ighi no pa gholo Peter, John ngo James, eno anga puaza likhi thono khumu alou ilo pemove.

⁵² Kümtsü no li ghenguno mloqa akemu pa no pi, “Mloqa kevilo, kughengu li ye züani thono thive mphie.”

⁵³ Li ye thivae pi panoqo no ithi akehu numighei shi pa jukünatha.

⁵⁴ Ikemu Jisü no li u tsüqüpe li vilo pi, “Angao, ithulo.”

⁵⁵ Tipamtsa li ghungu ideighive no li no ithughive. Jisü no kiuala chukepu pesü li tsü penike mijetsü.

⁵⁶ Li puaza no akümza qhiyive, ikemu kiu shive keno khuu vilomu pipemo nike pa no ghutuve.