Luke 3 - Sumi Naga CL (Re-edited) Bible (BSI)

Baptiz kishiu John no Ala Kutotsü

¹ Tiberius Caesar yepe mpe chighiapunguu lo, Pontius Pilate no Judea lo angh shi, Herod no Galilee lo yepeu shi, pa thiküzüu Philip no Ituraea ngo Trachonitis, eno Lysanias no Abilene lo ayepe chekelo,

² Achinetomi Annas ngo Caiaphas ghuloki lono, yenguyi ke-a lo Alhou tsape Zechariah nu John lau ighi.

³ Pa no Jordan sükümxa kümtsü lo axine qhivetsü penike xaide no baptiz shimasa keu tsa pesü sheshu wu.

⁴ Ti ye tungkupu Isaiah kaku lo yepüa keu tsa kiqi lono ke, “Yenguyi ke-a lo milakhi no ighamku ani: ‘Ampeu ghenguno Ala kutolo, Pa laghi müzüchoi shitsülo.

⁵ Akhila kümtsü shepichhive nani, naghuto ngo atoghi kümtsü kuchunive nani, ihoghülai keu la no müzüchoive nani, kukokilei keu la no müdüniyi kughulhove tsü nani,

⁶ eno timi kümtsü no Alhouw xakulu ithulu nani.’”

⁷ Ikehu John no aqokitikhi pa launo baptiz shiniye ighi keqo vilo pi, “Nongu tüghü pighitiqo! Khuu no nongu ye Alhou loghu ighini ye akeu lono polu nanie pi ghutu kea?

⁸ Aküxü xaidelu keu michipu shi axathi pithilo. Nongu dolono, ‘Abraham no ningu pasüe,’ ipi kevilo. Kughengu I no nongu vilo piani, Alhou ye atu hipaqo mu pesü Abraham tianuli shi saputhulu nani.

⁹ Itehimu amüghü ye asübo philo qhipüani. Tishikeu lono axathi kivi pithimo keu sübo thaqhü ye yeqhipe ami lo vesüve nani.”

¹⁰ Tile aqokitikhi no pa vilo ighiju, “Imaye ningu ye kiu shini kea?”

¹¹ Pa no khochile, “Khukhumu aphiküzü kini akeu no küha kemi sasü küsaje lo, titoi achuqupu akeu no tishilo.”

¹² Zame küqhami ghi baptiz shitsü penike ighi no pa vilo ighiju, “Akükütsüu, ningu ye kiu shilopi kea?”

¹³ Pa no pi, “Bekütha nguno alau ye qha kevilo.”

¹⁴ Ghüshimi ghi pa vilo ighiju, “Maye ningu yeo, ningu ye kiu shilopi kea?” Pa no pi, “Kütamiw pisa süxaluve niye anguka lono kichi kümsa momu akimki pesü nguku kevilo, ikemu nongu jume lo aghakiqi shilo.”

¹⁵ Timiqo no Messiah khekulho shiche kehu kümtsü no khileala John keo ipi kümsü kimghei akelo,

¹⁶ John no kümtsü khochile pi, “I no azü pesü nongu baptiz shitsü ani, ikemu I nguno akumtou lakhi cheni, khuu pukhukuqho kighi mu ni ye kuqho küzüpu kumo keno, pa no Aghungu Kimthe eno ami pesü nongu baptiz shitsü nani.

¹⁷ Pa niqa shikimthe no athi pekütsüpe pa le lo sünike pa u lo athi xukütsü kepu süküba pe ani, eno amuu ye pa no ghapinhe kümlapu mi lono pitive nani.”

¹⁸ Ikehu shikumtokütsü tsa kütau kutomo pesü pa no timiqo lau atsakiviu kütsü.

¹⁹ Ikemu yepeu Herod ye pa thiküzüu nipu Herodias ghenguno, eno pa kümla lhoksa ghenguno John no pa sakiyi püa kehu,

²⁰ hi kümtsü süküqha no pa no John küghape akughuki lo khathave.

²¹ Timi kümtsü no baptiz shiluve kethiu, Jisü ghi baptiz shive no akighini shi akelo kungugha khaqhive,

²² eno Aghungu Kimthe no ashi phimpi lono miqhedu kimihi shi iqighi no pa shou ngove; eno kungugha lono asütsa lakhi ighi, “No ye I Nu I qhuu, O jupe Ni ye amlokiqi shicheni.”

Jisü Khristow Laghaphi

²³ Kughou Jisü no pa kümla huthu keno, pa ye ampe shighi qhalo shiae, (azüu no kimshitsü ketoi) pa ye Joseph nu, eno Joseph no Heli nu,

²⁴ Heli no Matthat nu, Levi nu, Melkhi nu, Jannai nu, Joseph nu,

²⁵ Mattathias nu, Amos nu, Nahum nu, Esli nu, Naggai nu,

²⁶ Maath nu, Mattathias nu, Semein nu, Josech nu, Joda nu,

²⁷ Joanan nu, Rhesa nu, Zerubbabel nu, Shealtiel nu, Neri nu,

²⁸ Melkhi nu, Addi nu, Cosam nu, Elmadam nu, Er nu,

²⁹ Joshua nu, Eliezer nu, Jorim nu, Matthat nu, Levi nu,

³⁰ Simeon nu, Judah nu, Joseph nu, Jonam nu, Eliakim nu,

³¹ Melea nu, Menna nu, Mattatha nu, Nathan nu, David nu,

³² Jesse nu, Obed nu, Boaz nu, Sala nu, Nahshon nu,

³³ Amminadab nu, Admin nu, Arni nu, Hezron nu, Perez nu, Judah nu,

³⁴ Jacob nu, Isaac nu, Abraham nu, Terah nu, Nahor nu,

³⁵ Serug nu, Reu nu, Peleg nu, Eber nu, Shelah nu,

³⁶ Cainan nu, Arphaxad nu, Shem nu, Noah nu, Lamech nu,

³⁷ Methuselah nu, Enoch nu, Jared nu, Mahalaleel nu, Cainan nu,

³⁸ Enos nu, Seth nu, Adam nu, Alhou nu.