Luke 24 - Sumi Naga CL (Re-edited) Bible (BSI)

Xüchilekulu

¹ Totimiqo no apine kithe tsala atüghüni tsütho ipeghi kelo axokütsüngü tsüni kuto püakeu pesü akumoki lo wu.

² Panongu no wo akumoki nha püakeu tuqu tukulove aghi keu ithulu,

³ eno kughou alou iloghi keno, Ampeu Jisü sükumo phumlave.

⁴ Ikehu panongu ye phiküghüzüpe ake lono züleno timi kini phuphushi keu phi pusü panongu phivilo aghive.

⁵ Panongu ye ighono msave no agi pishiqhope ayeghi daluve, ikelo pama no pi, “Kushiye nongu ye kithimi gholo küxümi phu cheni kea?

⁶ Pa ye hile kühae; pa ye ithughivae. Pa no Galilee lo nongu gholo ake lono kishi piche keno kümsülu lo,

⁷ Timi Nu ye küghape axinemi u lo süve no yeda pithive masa nani, eno aküthüni ye xüputhuve nani.”

⁸ Tileno pa tsaqo panongu no kümsüchilelu,

⁹ eno akumoki lono idewo akhopemi chighiqhaqhi eno kütami kümtsü vilo hipa vehu qhoi pi.

¹⁰ Totimi hipaqo no apostolmi lau piwu keqoe: Mary Magdalene, Joanna, James paza Mary, eno totimi kütamiqo.

¹¹ Ikemu apostolmi no hi kümtsü akiqi küha keu tsa shi kümsüve no pülü tsümoe.

¹² Tishimu Peter ye ilhethu mtazü akumoki lo powu; eno pa no itsaqipe jusü kelo akumo küküzü phi likhi aghi keu ithulu; tileno hi ye kiu shive ani kelapi pa ye akümzaqhiyi aki lo idewove.

Emmaus La lo

¹³ Tipani panoqo gholo kini ye Emmaus phulo wuche, ti ye Jerusalem lono kilometer chighiqhaqhi qhalo ke.

¹⁴ Pama ye anileshi kiu shive püzü akeno küptsa che,

¹⁵ ikelo Jisü ampi no pama kupunu ighi no kümtsa pama gholo wuve.

¹⁶ Ikemu pa michilu peni keu nhetsü pama tsümove.

¹⁷ Jisü no pama vilo iniju, “Nokujo ye kiu tsa no tishi kütsala kile cheni kea?” Pama no agi zümoipe inaqhoi ngove.

¹⁸ Tileno Cleopas ipikeu no pi, “Jerusalem lo shoinami o likhino ishi dolo tile kiu shive keno ithiamo keo?”

¹⁹ Pa no pi, “Kiu kea?” Pama no khochile, “Nazarethmi lakhi khuu tungkupmi shi ache keno Alhou eno timiqo zülo akümla atsapi lo aküka kumto pephe chekeu Jisü vehu pi anike.

²⁰ Ni chinetomi ngo yepemi no pa pithive peniye akithipu kipimi tsüve no yedave.

²¹ Ikemu ninguu ye pau no Israel xachilelu nanie pi laju cheke. Tinguno alau, hi kümtsü ishiküthüni no shivae.

²² Itaghi niqomi gholo totimi khami no ni phiküghüzü püani. Panongu ye inaqhe itheno akumoki tove,

²³ ikemu pa sükumo ithumlave kelo le panongu ye kungunhetsü ghi ithulu no kungumi no pa ye xüani ipi kepi panongu no pisü ighi.

²⁴ Niqomi khami no akumoki lo wu kelo totimiqo no pike tho ithulu kemu pau ye phumlave.”

²⁵ Tile pa no pama vilo pi, “O mbomzümi, tungkupmi no hi kümtsü pikhave keghi nongu ye pülüni ke kishita qeinai kelae!

²⁶ Khristo ye aghime hipaqo sholu paghino pa juküvü lo iloni keu shike kumo?”

²⁷ Pa no Kuchoyesü lo Khristo vehu kümtsü aboake shi Moses kaku lono huthusü Tungkupmi no yekeqo kutolo pama lau hepho piye.

²⁸ Ikelo panongu no aphu khile wuche keno touve kehu Jisü ye tinguno aghacheu wuche ketoi shi,

²⁹ ikemu pama no tsüikhomo pa vilo pi, “Avela shiu chea eno tsüzüve niake ni gholo ngove lo.” Ikehu pa no pama gholo ngoniye ilove.

³⁰ Kughou pama gholo chuniye iqa keno, pa no asho ikhipe shikimthi kütsü kighini shino süphope pama tsü.

³¹ Tileno pama nhethi xükhotsü eno pama no pa michiluve. Ikemu pa ye tipa mtsa pama zülono hauve.

³² Pama no ishi pikile, “Ala lo pa no Kuchoyesü lo akeu tsa piche kelo ni mlo alou no ami iqü ketoi ke kumo?”

³³ Tipa tüqhüdo lono pama no ithu Jerusalem lo idechile ighi no akhopemi chighiqhaqhi eno khunoqo panongu gholo kichemi keno hekütsü kumqope aghi keu ithulu.

³⁴ Pama no pi, “Kuchou nomu Ampeu ye ithughive no Simon lau ipeghivae!”

³⁵ Tishino pama no ala lo chekelo kiu shive, eno asho sükupho lono kishi pa kepi ithive keno aboake shi lhepiye.

Jisü no Pa Khopemi lau Ipeghi

³⁶ Panongu no hipaqo piake lono Jisü ampi no tile puthugho no panoqo vilo pi, “Aloino alo!”

³⁷ Ikemu panongu ye akümsa no amlo kichi pühave no aghawu ithulu ani küghashive.

³⁸ Jisü no panongu vilo pi, “Kushiye nongu ye amlo küpüna eno lipiuve cheni kea?

³⁹ I u ngo I pukhu julo, qeti hi ye ni ampi ke. I bulo eno ithilo, kughengu aghawu ye I no aphimpi akeu, khikhi nongu no ithulu ani keno, titoi ashiaji eno aghi anhü achemoe.”

⁴⁰ Jisü no hi pive no panoqo pelo ju penike pa u ngo pa pukhu piye.

⁴¹ Panongu no alovi kelauno pülümla no akümzaqhiyi ake lono pa no pi, “Nongu ye hile kiuala chukepu anio?”

⁴² Panongu no akha ghuve keu lakhi pa tsü,

⁴³ pa no ti ikhipe panongu nhethe lono chuve.

⁴⁴ Tishino Pa no panongu vilo pi, “Moses Yezah lono Tungkupmi eno Leshele kutolo I vehu yepüa keu kümtsü shikupuve masae pi I no nongu gholo acheke lono atsa hipaqo nongu vilo pikhavae.”

⁴⁵ Tileno Kuchoyesü ithikuthulu penike pa no panoqo kükümsü xükhotsü,

⁴⁶ eno pi, “Ishi yepüani, Khristo ye aghime shino aküthüni no akithi lono xüthughi masae,

⁴⁷ eno Jerusalem lono huthusü pa je lono shiye kümtsü lau xaidekulu eno axine qhikütsü pesü sheshu masae.

⁴⁸ Nongu no hipaqo vehu lo thopimi ae.

⁴⁹ Eno julo, I Pu no kiu piqhi püa keno I no nongu shou puku tsüni. Ikemu kunguu küka no nongu shepichhi moke kutolo aphughi lo ngo aghilo.”

Jisü ye Kungugha lo Sawuve

⁵⁰ Tithiu Jisü no akhopemi sasü Bethany kutolo ipe no pa u peqhepe panongu kümghatsü.

⁵¹ Panongu kümghatsü ghi pa ye panoqo launo kütüta shisü kungugha lo saikuve.

⁵² Panongu no pa mlla eno alokivi kije lono Jerusalem lo ideilove,

⁵³ eno tamo mithe achineki lono Alhou sheqhe ae.