Luke 23 - Sumi Naga CL (Re-edited) Bible (BSI)

Pilate Zülo Jisü Sawu

¹ Timi kümtsü no puthughove no pa sasü Pilate zülo wu.

² Panongu no pa nguku thuve, “Timi hipau no ni shiye saküghüzü no Caesar lau zame ghi tsüpe moniye lakha ani, eno pa ampi no Messiah, akükau kepi piani.”

³ Pilate no pa vilo iniju, “No ye Jewmi kükau keshea?” Pa no khochile, “Nono pivae.”

⁴ Pilate no achinetomi ngo aqokitikhi vilo pi, “Ni ye timi hipau lau akipimi kiumu phulu amoe.”

⁵ Ikemu panongu no tsüikhomo pi, “Pa no Galilee lono Judea kümtsü eno hi kutolo timiqo xukutho kütsü ani.”

Herod Zülo Jisü

⁶ Kughou Pilate no hi chilu keno, pa no timi huye Galileemi kesheno iniju,

⁷ pa no Jisü ye Herod yepe qholo akemie pi ithive kehu pa pesü Herod lau puwuve.

⁸ Kughou Herod no Jisü ithulu keno, pa ye ighono amloqive, kughengu pa ye ado kushuo lono pa ghili chiluche kehu pa no amchipu kiuala shikeu ithuluni shi cheke.

⁹ Pa no ado lughi Jisü vilo ighikuju tsa iniju akemu Jisü no kiumu khochile moe.

¹⁰ Achinetomi ngo Ayezah shikükami no akumou pa nguku ae.

¹¹ Herod no paw ghüshimi sasü Jisü thaigha eno junuqhi. Tishino aphimini kighiche pa pipe no Pilate lau kighide puwove.

¹² Hipa züu Herod ngo Pilate pama ye aghümi shi ache kemu tipa tsala lono aküsami shiluve.

¹³ Pilate no achinetomi ngo aqoaho sakiphemi kukütsü,

¹⁴ eno panongu vilo pi, “Nongu no timi hipau ye timiqo saküghüzü anie pi I lau saghi. I no nongu zülono pa piqhiju kethiu ni ye nongu no pa xube ghi akipimi tsü akeu lakhimu ithumlae.

¹⁵ Herod ghi phumla no ningu lau kighide puwove tsüae. Timi hipau ye akithi ithulu küzüpu kiumu shi püamoe pi ithilo.

¹⁶ Ikehu I no pa ghimeve no kuqho pheveni.”

¹⁷ (Kughengu akhuaye lono Hechekulu ghuloki lo pa no akughumi lakhi khaqhiphe cheke.)

Jisü Yedave Penike Tsüve

¹⁸ Ikemu timi kümtsü no aqoshi ighamku, “Timi hipau pithive lo, eno Barabbas kuqhope ningu tsülo.”

¹⁹ Barabbas ye aphughi lo yepeka hebide ipeghi no timi ghiqhive kelono akughu shive ke.

²⁰ Pilate no Jisü xapheni shi akehu itaghi ghuthu lakhi timiqo vilo pi,

²¹ ikemu panongu no alau ighamku, “Yedave lo, pa yedave lo!”

²² Ghuthu aküthüu pa no timiqo vilo pi, “Kushiye kea? Pa ye kiu lhoksa shive akea? Ni ye akithi pa tsü küzüpu kipimi ithulu püamoe. Tighenguno I no pa ghimeve no kuqho pheveni.”

²³ Ikemu panongu no tsüikhomo ighamku pa ye pithive masae pi khu auve kelo panongu ghügha no ghüsüve.

²⁴ Ikehu Pilate no timiqo no khu ketoi tsüni keu shive.

²⁵ Pa no timi khuu hekibide eno ghikiqhi ghenguno akughu shipüa keno, timiqo no khu ketoi pa kuqhopheve no Jisü pesü panoqo pulou shivetsü.

Kros lo Yedave

²⁶ Timiqo no Jisü sawu chekelo, milakhi Cyrenemi Simon ipikeu aphughi lo ilo cheghi kelono tsüqüpe Jisü thiu no kros xapupe.

²⁷ Aqokitikhi kije eno totimi kutomo no pa ghenguno mloqa papeche.

²⁸ Ikemu Jisü no tsüghüwo panongu vilo pi, “Jerusalem totimiqo, I ghenguno kumono nongu ampi eno no tianuli ghenguno mlo lo.

²⁹ Kughengu ishi pikepu tsala cheni, ‘Totimi khunono atianuli küha, anga kughunu lojiputhu jumo keno akümghapue!’

³⁰ Panongu no naghutoqo vilo pi nani, ‘Ni shou ilu ikughi lo,’ eno atoghiqo vilo, ‘Ni küghütshü lo.’

³¹ Kughengu asü no aküxü shi aphilo thotsü hikithipu shi aye, tino qhaive aye kishive nani kea?”

³² Tile küsaküghami kini pa gholono pithiveni ke sawuve.

³³ Kughou panongu no Aboghe ipiche ke-a lo ighi keno, panongu no tile pa yedave, eno küsaküghami pama ghi lakhi no pa u ajeu eno lakhiu no piyiu yedave.

³⁴ Jisü no pi, “Apu, panongu ye kiu shi ani keno ithiamo ke akipimi qhive tsülo.” Panongu no pa phimini kije luveni ye asaqhi.

³⁵ Timiqo no puthughope jukuto akelo yepemi no pa jukünatha ghi pi, “Pa no Alhouw Messiah, kishekipheu ipi aghi aye, kütami xalu cheke toi pa ampi xaluve pelo!”

³⁶ Ghüshimi ghi pa lau ighi no thaigha ghi akiqhi ji pesü tsü,

³⁷ eno pi, “Nono Jewmi kükau shiaghi aye, o likhi o xaluve lo!”

³⁸ Jisü kütsü sholo atsa ishi yepe qhitsü, “Hi no Jewmi Kükaue.”

³⁹ Küsaküghami lakhi no Jisü thogha ghi pi, “No ye Messiah ke kumo? O xaluve no nikujo ghi xalulo!”

⁴⁰ Ikemu lakhiu no pa sakiyi pi, “Ningu aghime aphiphi shi akeghi no ye Alhou msamo keo?

⁴¹ Monimo aye nikujo ye ni kümla jume achipi lono ithulu ani, ikemu timi hipau ye kiumu pimi püamoe.”

⁴² Pa no hi ghi pi, “Jisü, kughou nono o yekipe lo iloni keno I kümsülu lo.”

⁴³ Jisü no pa vilo pi, “Mtsüqheino I no o vilo piani, no ye ishi no I gholo alokughuno-a lo aniae.”

Jisü Kithi

⁴⁴ Puchomta lono phitsü kutolo tipa ghakhu kuchopu aküzü no nhaluve,

⁴⁵ ti ye khetsünhe küvü no hailove. Achineki lo nhaqhiphi no ixü kütüta shive.

⁴⁶ Jisü no asütsa kuloghi lono pi, “I puo, O u lo I ghungu kulhuqhive tsüae!” Tishino pa tuthu kishekhave.

⁴⁷ Aqhe shou zatsüu no ti kümtsü ithulu no Alhou sheqhe, “Mtsüqheino timi hipau ye akipimi küha kena!”

⁴⁸ Kughou aqokitikhi ti juniye ighi keqo no hi kümtsü ithulu keno, kümtsü no amloiju amla kukhu aki lo idewove.

⁴⁹ Pa küsami eno Galilee lono totimi khunoqo pa papeche keno, tipaqo no putou puthugho no ti kümtsü juae.

Jisü Shiqhove

⁵⁰ Jewmiw mishiphu Arimathea lono ighi keu timi kivimi eno amikuchomi lakhi Joseph ipikeu ache, pa ye Jewmi Hoho lo kihimpemi.

⁵¹ Ikemu pa ye aqomi xakütha lo pulomo no Alhou yekipe laju cheke.

⁵² Pa no Pilate lau wuno Jisü sükumo khuluve.

⁵³ Tishino pa no kros peqhi no akumo küküzü phi pesü küzüve no pewo khile atu chitha ilo akumoki shipüa keno, timi khumu qhomphi ke-a lo süve.

⁵⁴ Ti ye Sabbath huthuni ke zülo Akukuto tsala shiae.

⁵⁵ Totimi khunoqo Jisü gholo chekeno, Galilee lono pa pape ighi keqo no Joseph sasü wuno akumoki eno kishi Jisü kumo qhipüa keno ithulu.

⁵⁶ Tithiu panongu no idewo axokütsüngü eno shikipivi tsüni kutope qhive. Azakütsü kiqi lono panongu no Sabbath loye akulhoqhive.