Luke 19 - Sumi Naga CL (Re-edited) Bible (BSI)

Jisü ngo Zacchaeus

¹ Jisü no Jericho lo iloghi no ti hechesü wuche.

² Tile timi lakhi Zacchaeus acheke pa ye zame küqhami shou atou eno kinimi lakhi.

³ Pa no Jisü ye khuu keno juniye pükapütsa aqokitikhi gholo che kemu pa no shiti kehu ithumlave.

⁴ Ikehu pa no Jisü juniye azüu powu no tüküthibo lakhi lo ikuve, kughengu Jisü ye tipa la heche wuniye ake.

⁵ Kughou Jisü no tile ighi keno pa no pishipuku juno Zacchaeus vilo pi, “Zacchaeus, mtazü iqighi lo, kughengu ni ye ishi o kilo ngo masa ani.”

⁶ Pa no mtazü iqighi no alokivi shi Jisü ikhilu.

⁷ Kughou timiqo no ti ithulu keno, kümtsü no nhenheshi pi, “Pa ye axinemi kilo ngoniye ilovae.”

⁸ Zacchaeus no müzüchoi ngove no Ampeu vilo pi, “Julo, Ampeu, I no akeu küakini tüxa ye kumlhomi tsüve niae. Eno I no kiuala pesü khuana pishiqhi püaghi aye, ghuthu bidi no küghüsüpe athoputho tsüni.”

⁹ Jisü no pa vilo pi, “Ishi no xakulupu akibo hipau lo ighivae, kughengu pa ghi Abraham laghami ke.

¹⁰ Kughengu Timi Nu ye pühave no akemi phuni ke eno xaluni ke ighie.”

Alhou Yekipe Pekukho Kümla

¹¹ Timiqo no Jisü tsa hipaqo ini ake lono pa no kimghikipiye lakhi pikibe, kughengu Pa ye Jerusalem kupunu chea eno panongu no Alhou yekipe ye ke-i ighive niye ani küghashi kümsü ake.

¹² Ikehu pa no pi, “Ghenimi lakhi no aghacheu aghakhu lakhi lo wuno pa sala kükaqha ighilu no ideighini keu shi.

¹³ Pa no pa qemi chighi kuno Mina lakhikhi pesü kije tsüno panongu vilo pi, ‘I no ighi moke dolo hi pesü kimje aghilo.’

¹⁴ Ikemu pa ghakhumi no pa mithi chekehu aghinimi khami pa thiu no puwu no atsape ishi tsü, ‘Ningu ye timi hipau pelo ni shou ayepe penishi amoe.’

¹⁵ Ikemu kughou pa no kükaqha ighipe ideighive keno, pa no aqemi khunoqo lau pisa tsüpüa keno, panongu ye kiu lo imasü no khije kimjelu keno ithini ke panoqo kusaghi peni keu za tsü.

¹⁶ Atüghüu no pa zülo ighi no pi, ‘Akijeu, ow Mina lakhi huno Mina chighi kimjelue.’

¹⁷ Pa no khochile, ‘Aghile shivae, aqeu kivi! No ye aghulo lo ghi pükhükulupu shike itehi ye nono aphughi chighi shou aküka peithani.’

¹⁸ Akiniu no ighi no pi, ‘Akijeu, ow Mina lakhi huno pungu kimjelue.’

¹⁹ Pa no khochile, ‘Nono aphughi pungu shou peithani.’

²⁰ Lakhiu no ighi no pi, ‘Akijeu, ow Mina lakhi khikhi I no aphi kümtsha no ghope qhivetsü keno hi chenie;

²¹ kughengu no ye tsatsai kemi kehu ni ye o msave. No ye imasümo mu ithuluve cheni eno xusümo mu xoluve cheni.’

²² Pa no khochile, ‘O likhi o tsa pesü I no akipimi o tsünia na, no kixikila qeu! Ni ye tsatsai kemi, imasümo no ithulu eno xusümo no xolu chenie pi nono ithi ani ya?

²³ Imaye kushiye I no ideighi kelo aqu gholo akighishe ghi qhakütsülu kepushi no ye Iw pisa pesü ghükaki lo sütsümo kea?’

²⁴ Yepeu huno tile puthugho akeqo vilo pi, ‘Pa launo Mina lakhi luve no Mina chighi akeu tsüve lo.’

²⁵ Panongu no khochile, ‘Akijeu, pa ye chighi auva keghi!’

²⁶ ‘I no nongu vilo pi anike khukhumu aghi keu lau alau küphatsü nani, ikemu khuu no küha keno, pa no kiu aghulo aghini keno tiu ghi luve tsü nani.

²⁷ Eno I ghümi ghengu ye, khunono I pelo pano yepeu shipenishi mono akeno, hile saghi no I zülono ghiqhivelo.’”

Tokulu Hukülü shi Ilo

²⁸ Kughou Jisü no atsa hipaqo pive keno, pa ye Jerusalem küdau wuve.

²⁹ Eno Olive toghi ipikeu bophi lo Bethphage eno Bethany kupunu ighi kelo, pa no akhopemi kini puwu,

³⁰ eno pi, “Nokujo züu aphu akeu lo ilolo, eno tile khurha lhothe lakhi khipa shou khunomu iqamphi keno, tshü püaghi nanike ti kuqhope hile saghilo.

³¹ Khuana no nokujo vilo, ‘Kushiye ti kuqho ani kea?’ ipi ighiju aye, ishi khochile lo, ‘Ampeu no hi avehupu shi ani.’”

³² Pama no tile ighi kelo Jisü no pike toi ithulu.

³³ Pama no ti kuqho akelo ampemi no ighiju, “Kushiye nokujo ye ti kuqho ani kea?”

³⁴ Pama no khochile, “Ampeu no hi avehupu shi ani.”

³⁵ Tishino pama no Jisü lau saghi, eno panongu no pütütaw hebephi pesü khurha shou qhatsü no Jisü küghüqa.

³⁶ Pa no tipa shou iqasü chekelo timiqo no alaghi lo panow hebephi qhatsü.

³⁷ Pa no Olive toghi lono iqighi keu la touve kelo aqokitikhi pa papeche kemi kümtsü no asütsa kuloghi shi igha eno panongu no akümzapu kümla kümtsü ithulu ke ghenguno alovi Alhou sheqhe thuve,

³⁸ “Ampeu je lono akükau khuu cheni keno Alhou no kümgha tsülo! Kungugha lo iqüghai eno kungugha kiqhe lo ajekipi shilo!”

³⁹ Aqokitikhi gholo Phariseemi khami che keqo no pa vilo pi, “Shikükau, o papemi lomipi lo.”

⁴⁰ Ikemu pa no khochile, “I no piani, hipaqo no inaqhoive aye, atuqou no ighamku ipeghi niae.”

Jerusalem Ghenguno Mloqa

⁴¹ Kughou Jisü no kupunu ighi no Jerusalem ithulu keno, pa no tipa ghenguno mloqa

⁴² ghi pi, “Noghi lae, kiu no külashilu cheni keno ishi nomu nou no ithike aye lae! Ikemu itehi ye o launo küsüvae.

⁴³ Kughengu o ghümi no o bothape aliwo shive no o khasüpe no ako kümtsü lono le iloghini keu tsala ighi nani.

⁴⁴ Panongu no no eno o gholo atianuli kümtsü kütsave tsü nani, eno nono o xukuju ghuloki ithi move kehu o phughi lo atu lakhino lakhi shou küqape qhitsümo nani.”

Jisü no Achineki Shikimthe

⁴⁵ Tithiu Jisü no achineki lo ilo no kimje akeqo haphe thuve,

⁴⁶ eno panongu vilo pi, “Ishi yepüani, ‘I ki ye akighini ki ipi kunani,’ ikemu nongu no ti pesü küpkami küghütshü-a shive tsüae.”

⁴⁷ Jisü no tsalakipe achineki lono shika ae. Achinetomi ngo Ayezah shikükami eno ampemi no pa pithive nike kuchughua,

⁴⁸ ikemu aqokitikhi no pa tsa phemono ini kimighe akehu panongu ye kiumu shimla no ae.