Luke 18 - Sumi Naga CL (Re-edited) Bible (BSI)

Chimemi eno Küghaküthau

¹ Jisü no pa khopemi pelo alomtshü mono alhokuthu inikhu peniye panongu vilo kimghikipiye hipau pi.

² “Mishighüna lakhi lo Alhou mu msamo eno timiu ghi gihumo keu küghaküthau lakhi ache.

³ Tipa phughi lo achimeu lakhi ache keu no papashi pa lau ighi no piche, ‘I ghümi launo I saphu tsülo.’

⁴ Ado hami ghenguno pa ye milive ae, ikemu asheshi no pa mlouno kümsü, ‘Ni ye Alhou mu msa chemo eno timiu ghi gihu chemoe,

⁵ ikeghi achimeu hipau no I pünaqhi auve ake ni ye kuchou xakütha shipe li tsünia na, tishianguno li pelo I züpüzü pemonie.’”

⁶ Tileno Ampeu no pi, “Ayekümthau küghaküthau no kiu pi keno inilo.

⁷ Imaye Alhou ye Paw kishekiphemi khunono putho pucho Pa lau ighamku cheni keno, tipaqo lau kuchou xakütha tsümoni keshea? Pa ye panoqo kuphuni ke süpushu nani keshea?

⁸ I no nongu vilo piani, Pa ye ke-i xakütha shipe panongu tsü nani. Tishimu, Timi Nu no ighi kelo, pa ye ayeghi lo küpülümi phulu nani ma?”

Phariseemi ngo Zame Küqhau

⁹ Itaghi Jisü no kimghikipiye hipau pesü khunono alikhi apülüpivi no amikucho kepi pükha püzü kütami jukünatha chekeno, tipaqo vilo pi:

¹⁰ “Timi kini inikhuni ke achineki lo iqho, lakhi no Pharisee eno lakhiu no zame küqhau.

¹¹ Pharisee huno puthughope pa sala likhi hitoi inikhu: ‘Alhou, I no O shikimthi akeu no ni ye timi kütami toi süxa kuchumi, amikucho kumomi, salha-shupumi kumoe, momu hi zame küqhau toikeu mu kumoe.

¹² Ni ye apinedo lo ghuthu kini kümvü cheni; I no ithulu keu kümtsü lo chighi saje tsü cheni.’

¹³ Ikemu zame küqhau ye putou pa kütashi puthughope pa kütsü mu peqhemo no pa mla kukhu ghi pi, ‘Alhou, ni axinemi kimiyekütü tsülo!’

¹⁴ I no nongu vilo piani, Pharisee no kumono timi hipau no achipikalu no pa kilo idewo lue. Kughengu khuu no pa ampi süqheni keno kuchunive nani, ikemu khuu no aqhokigheu shini keno pa süqhe nani.”

Itimi pelo I lau Ighi pelo

¹⁵ Kughou timiqo no Jisü pelo kümghatsü peniye anga kughunu kutolo sasü ighi keno, akhopemi no ithulu no panoqo lomipi.

¹⁶ Ikemu Jisü no pa lau itimiqo kukütsü no pi, “Itimiqo pelo I lau ighi pelo, eno panongu lakha kevilo, kughengu Alhou yekipe ye hitoi keqo salae.

¹⁷ Mtsüqheino I no nongu vilo piani, khukhumu itimi lakhi toi Alhou yekipe ikhilumo keu ye kiu gholau nomu tile ilomla nani.”

Kinimi Yepeu

¹⁸ Tile yepeu lakhi no Jisü vilo ighiju, “Shikükau kiviu, ni ye lhokta küxü ighilu nike kiu shimasa kea?”

¹⁹ Jisü no pa vilo pi, “Kushiye alokeu ipi I ku ani kea? Alhou likhi no aloke thono khunomu kumoe.

²⁰ Nono azakütsüqo ithi anie: ‘Salha kevilo, Ghiqhi kevilo, Püka kevilo, Akimki thopi shi kevilo, O pu ngo o za gihulo.’”

²¹ Pa no pi, “Ni ye I lhothe lono hi kümtsü pekupu ighivae.”

²² Kughou Jisü no hi chilu keno, pa no pi, “No ye thime lakhino kupu mphi kena. Nono akeu thime kümtsü jepe kumlhomi kijeve tsülo, eno no ye kungugha lo akinikhuki aniae; tishino ighi no I papelo.”

²³ Ikemu kughou yepeu no hipaqo chilu keno, pa ye akini kütsasa ache kehu ighono amlo imeve.

²⁴ Pa mlo ghime ithulupe Jisü no pi, “Kinimi no Alhou yekipe lo iloluni keu ye kishita kushokütsüpu kelae!

²⁵ Kinimi no Alhou yekipe lo iloluni keu ye sayeshi no ayipuki lono wuve keu no akümlaue.”

²⁶ Ti chilu keqo no ighiju, “Imaye khuno xalu nani kea?”

²⁷ Ikemu pa no khochile, “Timi zülo kiu no tokümlapu keno Alhou züloye shikulupue.”

²⁸ Peter no pi, “Ningu ye ni kibolomi qhive no o pape chea kehu ithilo.”

²⁹ Jisü no panongu vilo pi, “Mtsüqheino I no nongu vilo piani, Alhou yekipe ghenguno akibo anipu, athiküzü acheli, apu aza, momu atianuli qhive kemi khunomu

³⁰ asaxü pühave monani, ikemu hipa tiqheli lo eno hithiu lhokta küxü kutolo kutomo küghüsü no ithulu nani.”

Jisü no Pa Kithi Vehu Pikithe

³¹ Jisü no chighikini kusawo pa gholo qhino pi, “Ningu ye Jerusalem lo iqho chea kehu ithilo, eno Tungkupmi no Timi Nu vehu yekeu qhoi shikupuve niye ani.

³² Pa küghape Jewkumomi u lo süve tsüno thaigha, akukujopu shi peitha, eno müsüte nani.

³³ Akighikipili pesü hetha pinyive kethiu pa pithive nani, eno atsala aküthüu lo pa ye xüthughive nani.”

³⁴ Ikemu akhopemi ye atsa hipaqo kiumu vethalu move. Pa kipitsa hipau ye panongu launo küsüpe qhive kehu kiu pi akeno panongu ye kiqikuto mlave.

Jisü no Anhechemi Shipivi

³⁵ Jisü no Jericho kupunu ighi kelo, anhechemi lakhi alaphe lo ngo no khuchu aghi.

³⁶ Aqokitikhi no shewu chekeu chilu kehu pa no kiu ghenguno keno ighiju.

³⁷ Panongu no pa vilo pi, “Nazarethmi Jisü hu hipaqha kathawu cheni.”

³⁸ Pa no ighamku ipeghi, “O David Nu, Jisü, I kimiyekütü tsülo!”

³⁹ Pa zülo akeqo no inaqhoive peniye pa lomipi. Ikemu pa no alau shi igha, “O David Nu, I kimiyekütü tsülo!”

⁴⁰ Jisü no ngove no pa saghi penike azah tsü, eno kughou timi huno aphivilo ighi keno Jisü no ighiju,

⁴¹ “No ye I pelo o ghenguno kiu shitsü penishi ani kea?” Timi huno khochile, “Ampeu, ni ye ithulu kitheni shi ani.”

⁴² Ikehu Jisü no pa vilo pi, “Ithulu kitheve lo; o küpülü no o shipivivae.”

⁴³ Paikhavi timi huno ithulu kitheve, eno pa no Alhou sheqhe ghi pa pape wuve. Kughou timiqo no ti ithulu keno, kümtsü no Alhou sheqhe shikimthi tsüe.