Luke 15 - Sumi Naga CL (Re-edited) Bible (BSI)

Pühave keu Mbe

¹ Ghuthu lakhi zame küqhami ngo Ayezah heküxami kümtsü no Jisü kupunu ighia.

² Phariseemi ngo Ayezah shikükami no nhenheshi pi thuve, “Timi hipau ye küsaküghami ikhilu no pano sasü chusho chenie.”

³ Jisü no panongu vilo kimghikipiye hipau pi:

⁴ “Nongu dolo khuu no ambe aqhe akelo, lakhi pühave aye, lhotoku-toku ye achu kümzape qhive no lakhi pühave keu ithulu moke kutolo apashe wumoni keshea?

⁵ Kughou ti phuluni keno, pa no alokivi shi pa bighi lono xapusü

⁶ aki lo ighi no pa küsami ngo akisüghümi kukütsü püzü panoqo vilo pi cheni, ‘I gholo alovi küqha lo, kughengu ni ye I mbe pühave keu hu phuluvae.’

⁷ Tihutoi I no nongu vilo piani, kungugha lo amikuchomi lhotoku-toku khuno müzülo xaidekulu avehupu shimoa keno, tipaqo ghenguno alovi keu nguno axinemi lakhi xaidelu keu lokiviu paje nani.

Pühave keu Pisa Muno

⁸ “Momu totimi khuu no pisa muno chighi akelo lakhi pühave aye, ti ithulu moke kutolo akulu küqüpe aki khu no chixechilei phujumo nani kea?

⁹ Kughou ti phuluni keno, li no aküsami ngo akisüghümi kukütsü no picheni, ‘I gholo alovi küqhalo, kughengu ni ye Iw pisa muno pühave keu phuluvae.’

¹⁰ Tihutoi I no nongu vilo piani, axinemi lakhi no xaidelu keu lo Alhouw kungumi gholo ghi alokivi kije acheni.”

Pühave keu Nu

¹¹ Jisü no pi, “Timi lakhi no anu kini ache.

¹² Ayitiu no papu vilo pi, ‘I pu, amheghi lo I saje akeu ye I tsüve lo.’ Apu no anu pama dolo amheghi hu kijeve tsü.

¹³ Kushuo kumo lo anu ayitiu no pa saje qhoi kimje pesü a-a kushuo lo wuve, eno tilau no pa kini kümtsü kuthole peitha khave.

¹⁴ Kughou pa no qhoi peitha khave keno, tipa ghakhu lo püqümiye kije ipeghive no pa ye thokha avehupu shiuve.

¹⁵ Ikehu pa no tipa ghakhumi lakhi lau wuno akümla ighiju kelo, awoqo loji penike pa lu lo puwuve.

¹⁶ Tilau pa ye awoqo no chuche keu axa kolamu chunishi kütü lajuche namu khunomu kiumu pe pa tsümoe.

¹⁷ “Ikemu kughou pa no atsüveshe kümsülu keno, pa no pi, ‘I puw qekuchumi khije no chukepu kupukuno shi ani püzü ni ye hilau akhüava no thiu chea kelae!

¹⁸ Ni ye ithu no I pu lau woni, eno pa vilo ishi pini, “I pu, I no Alhou eno o zülo ghi axine shivae.

¹⁹ Itehi ni ye o nue pi kuni keu aküzüpu kumovae. Ikehu o qemi kiqi lono I peitha tsülo.”’

²⁰ Pa no ithu papu lau idewo. Ikemu pa no putou chephi lono papu no ithuluve no pa mlo saqhiyive, eno pa no anu lau posü wuno pa khadape müma.

²¹ Anu no pa vilo pi, ‘I puo, I no Alhou eno o zülo axine shivae. Itehi ni ye o nue pi kuni keu aküzüpu kumovae.’

²² Ikemu apu no pa qemiqo vilo pi, ‘Mtazü aphimini akiviu süghi no pa pipelo, pa u lo anguthi sütsü lo, eno pa pukhu lo apukhuqho süpipe lo.

²³ Amshiti athakupuu sawo heqhilo, eno ningu aghulhu shi alovini.

²⁴ Kughengu I nu hipau ye thive, ikemu itehi ye xüluvae; pa ye pühave kemu phuluvae.’ Tile kümtsü no alovi küqhauve.

²⁵ “Ikemu anu akichiu ye alu lo akehu, pa no aki kupunu ighi kelo, ale kiphe eno akighilhe sütsa chilu.

²⁶ Pa no aqemi lakhi ku püzü kiu ghenguno tishi ani keno ighiju.

²⁷ Aqeu no pa vilo pi, ‘O thiküzüu ye ighivae, eno pa no kütüsü mono ighilu kehu o pu no amshiti athakupuu heqhivae.’

²⁸ Ikemu pa ye amloideve no aki aloumu ilo move. Apu no ipeghi no pa ghozü,

²⁹ ikemu pa no papu vilo pi, ‘Julepi, ni ye ampe hijejehi o huthu ighiva, eno ni ye khilemu o zakütsü hebide mphi, ikeghi I küsami sasü alokivi shi aghulhu shilu penike no ye aneti mu khilemu I tsüju mphie.

³⁰ Ikemu kughou o nu khuu o mheghi kuchopu pesü kütüqhalimi gholono kuthole khave tsü keno, hipau no ighi kelaye nono pa ghenguno amshiti athakupuu heqhi tsüe!’

³¹ Apu no pa vilo pi, ‘I nu, no ye alhokuthu I gholo acheni, eno I no aghi keu thime kümtsü ow ke.

³² O thiküzüu hipau ye thive kemu xüluvae; pa ye pühave no phuluvae, tighenguno aghulhu shi alovi akeu ye achipie.’”