Luke 14 - Sumi Naga CL (Re-edited) Bible (BSI)

Sabbath lono Milakhi Shipivi

¹ Sabbath lakhi lo kughou Jisü no Phariseemi yepeu kilo aghulhu shiniye wu keno, panongu no pa jukuto ae.

² Timi lakhi khuu aphiau lo azü chove no inguuve keno pa zülo aghi.

³ Jisü no Ayezah shikükami ngo Phariseemi vilo pi, “Sabbath lono shipivini keu ye Ayezah kiqilo kemo kea?”

⁴ Ikemu panongu no tshümu shimono ngove. Ikehu timi hu sawo pa phivilo qhino pa no shipivive no puwuve.

⁵ Eno panoqo vilo pa no pi, “Nongu dolo khuu no anu lakhi momu amshitsü akelo, tino Sabbath lono azükikhe alou ikiqi ilove aye, mtazü tipa mtsa sünhephe luvemo nani kea?”

⁶ Panongu ye hipa tsa khochile mlave.

Külakupu Ghulhu Kimghikipiye

⁷ Kughou aghulhu lo kusü püakeqo no kishi ighi no agigihupu lakhü lo iqa niye pükha keno Jisü no ithulu püzü tipaqo vilo kimghikipiye pi,

⁸ “Külakupu ghulhu lo o kusü kelo, agigihupu lakhü lo iqa kevilo, tikumo aye o nguno alau ajuaje kimchimi khuana ghi kusü püaghi püzü,

⁹ khuu o kusü keno ampeu huno ighi püzü o vilo, ‘O lakhü pesü timi hipau tsüvelo,’ ipi aye, no ye tile akukujopu shi akuchuniu lakhü lo iqa masave nani.

¹⁰ Ikemu kughou o kusüni keno, wuno akuchuniu lakhü pükhalo, tishianguno saküsüu huno ighi kelo o vilo pi nani, ‘Aküsau, akuchuqu-a lo iku iqalo.’ Tileno o gholo iqa akemi kümtsü zülono nono agigihu ithulu nani.

¹¹ Kughengu alikhi asüqhe kemi kümtsü kuchunive nani, eno alikhi ampi kuchuni keu süqhe nani.”

Aghulhu Kije Kimghikipiye

¹² Pa no pa kuküsüu vilo highi pi, “Kughou nono alibe tsüni keno, o küsami na, o thiküzü cheli na, o bolomi na, o kisüghümi kinimi namu kusü kevilo, tikumo aye panongu ghi o kusü no o lochileve nosake.

¹³ Ikemu kughou nono aghulhu tsüni keno, kumlhomi, alho vimo kemi, anhechemi kusülo,

¹⁴ tishikeu lono nou no akümghau shilu nani, kughengu panongu ye o tsüchile mla nani. Kughengu amikuchomi xüchilekulu tsala lono o tsüchile nani.”

¹⁵ Kughou aghulhu lüpa lo akeu milakhi no hipa tsa chilu keno, pa no Jisü vilo pi, “Khunono Alhou yekipe lo ilo chushoni keno akümghapue!”

¹⁶ Ikemu Jisü no pa vilo pi, “Ghuthu lakhi lo milakhi no aghulhu kije tsüno timi kutomo kusüe.

¹⁷ Aghulhu do ighi kelo, timi huno pa qeu hape kusü püakeqo lau pi wupe, ‘Itehi ye kümtsü kutope qhive ake ighive lo.’

¹⁸ Ikemu panongu kümtsü no küptsa püa keshi jekujeli shiuve. Atüghüu no pi, ‘Ni ye anileshi alu lakhi qhü püanike ti juwu masave ake I kipimi qhitsülo.’

¹⁹ Lakhiu no pi, ‘Ni ye alu kümla mishitsü atüna pungu qhü kehu tipaqo juwu cheae, kimiye no I kipimi qhitsülo.’

²⁰ Itaghi lakhiu no pi, ‘Ni ye akibo shive no anipu auva keke ighilu moae.’

²¹ Ikehu aqeu no ighi no qhoi pa mpeu vilo pive. Tile ampeu no amloideve no pa qeu vilo pi, ‘Mtazü wuno aphughi lo alaghila eno alapa lo kumlhomi, aphiau kinitave kemi, anhethi eno apukhu kighichemi sasü ighilo.’

²² Aqeu huno pi, ‘Akijeu, nono kiu za tsü keno tishive tsüae pi ithilo, ikemu itaghi a-a ye aphie.’

²³ Ampeu huno aqeu vilo pi, ‘Aphughi hechesü ipelo eno I ki shepichhilu kepushi atoghila, lavela, eno aghüzüla lo cheghi keqo züiza saghi lo.

²⁴ Kughengu I no nongu vilo piani, azüu timi khunoqo kusü püa keno, lakhi nomu I ghulhu miche pemo nani.’”

Akhopemi Shikulupu Me

²⁵ Aqokitikhi kije no Jisü papeche, pa no tsüghüwo panoqo vilo pi,

²⁶ “Khunono I lau ighive no pa puaza, anipu atianuli, athiküzü acheli, eno pa küxüu ghi milive moni keno, pa ye I khopemi shimlae.

²⁷ Khukhumu paw kros xapusü I papemo keu ye I khopemi shimlae.

²⁸ Kughengu nongu gholo khuu no aqoghe kuchuqu shiqheni kelo, atüghüshi iqa no ame kihiju, eno pa ye ti shiqhilu kepu kini ani kemo keno tsaqüi kughu jumo nani kea?

²⁹ Tishimo kelo pa no aboqha süve no tithiu shimlave aye, ti ithulu kemi kümtsü no pa cheqhi

³⁰ eno pi nani, ‘Timi hipau ye mla thuve kemu asheho mlavae.’

³¹ Momu kükami khuu no akükau lakhi sasü aghü shini kelo, atüghüshi iqa no pa no qhethonhe chighi akeu huye lakhiu u lo qhethonhe muku akeu sasü küpüghülu nani kemo keno tsaqüi küpasü jumo nani kea?

³² Tishimo aye, pano ghümi no putou ajuu ghi ithumla aphi lono pa ye pa züqhukishimi hape külashive nike beküthau khu süghive peniae.

³³ Tihutoi nongu dolo khukhumu pa no aghi keu qhoi phevemo kelo pa ye I khopemi shimlae.

Ameküküha Miti

³⁴ “Amti ye aloe, ikemu tino aküqhü kühave aye, kishino qhümzai kithelu nani kea?

³⁵ Ti ye ikhipe peveni keu likhia thono ayeghi momu aghüma mu ala shitsü mlae. Khuu no chikulupu kini ani keno pa pelo chilu pelo.”