Luke 10 - Sumi Naga CL (Re-edited) Bible (BSI)

Jisü no Lhotsüni-Kini Puwu

¹ Tithiu Ampeu no kütami pano lhotsüni-kini süsü no pa ampi no mishiphu eno a-a khipaqo lo wuniye akeno, pa züuno cheghi penike kini-ni no ti kümtsü lo puwu.

² Pa no panoqo vilo pi, “Ghile ye apolu kepushi ani, ikemu ajumi no aghulo likhi ani. Tighenguno ghile Mpeu lau Paw ghile lo ajumi puhutsü penike amlo tsüqhiyi khulo.

³ Wulo; eno ithilo, ambetiqo no tüngtügha loji dolo ilolu ketoi I no nongu puwu ani.

⁴ Pisabo na, aphikumsho na, apukhuqho namu pemoni, eno ala lo khumu sasü petha shimoni.

⁵ Nongu no khuno kilo ilo namu atüghüshi, ‘Aki hipau lo aloino alo!’ ipilo.

⁶ Tile aloino keu ithulu küzüpumi aghi aye, nongu no pikeu huno pa shou anani. Ikemu kühave aye, nongu lau idechile ighive nani.

⁷ Aki lakhi lono kütau iqesü wu kevilo, ikemu lakhi lo likhi ngono ampemi no kiu tsü keno chusholo, kughengu akümla kishiu ye ajume ithulu küzüe.

⁸ Kughou nongu no mishiphu lakhi lo iloni keno nongu sasü aye, nongu zülo kiu kutope qhitsü keno chulo.

⁹ Küsükinimi aghi keqo shipivi lo, eno panoqo vilo, ‘Alhou yekipe ye nongu kupunu ighivae,’ ipilo.

¹⁰ Ikemu nongu no mishiphu lakhi lo ilo kelo timiqo no nongu sasü move aye, alaghila lono pilo,

¹¹ ‘Nongu kipimi shive keu michipu shi now mishiphu lono ayeghimkhu ni pukhu lo daluve aghi keu ghi nino kukhu qhive ani.’ Ikeghi hi ithilo, ‘Alhou yekipe ye nongu kupunu ighivae.’

¹² I no nongu vilo piani, tipa tsala lo Sodom ghimeu nomu aphughi tipau nguno puqhe kulupu shi nani.

Xaidemo keu Phughiqo

¹³ “Chorazin! O hasapue, Bethsaida! O hasapue. Kughengu nongu lau akumto kümla shikeu huno Tyre ngo Sidon lau shi püaghi keaye, tipaqo ye khaghi no kumshophi ngo ayevu lo ihi xaideve aghini cheke.

¹⁴ Ikemu küghakütha tsala lo Tyre ngo Sidon ghimeu nomu nongu nguno puqhe kulupu shiniae.

¹⁵ Eno no, Capernaum! No ye atsütsü kutolo o süqhe penishi ani keshea? No ye Kithigha lou sünheqhive nani.

¹⁶ “Khuu no nongu tsa chiluni keno, I tsa chilu ani, eno khuu no nongu kileveni keno, ni eno I puwu keu kileve ani.”

Lhotsüni-Kini no Ideighi

¹⁷ Tithiu lhotsüni-kini no alokivi shi ideighi no pi, “Ampeu, o je lono tüghamiqou ghi ningu zülo ikiqie!”

¹⁸ Pa no pi, “Tsütsüpha toi Satan no atsütsü lono ikiqive keu I no ithulue.

¹⁹ Julo, nongu pelo tüghükupu pighi ngo achuwopaza nedalu, eno aghümi küka kümtsü qhasülu penike I no kükagha nongu tsüvae; eno kiumu nongu ghüzamo nani.

²⁰ Tishimu, nongu ye aghawuqo no nongu zülo ikiqi ke ghenguno alovi kevilo, ikemu kungugha lo nongu je yepüa keu ghenguno alovilo.”

Apu Lopu shikeu lo Jisü Lokivi

²¹ Tipa süchedo lo Jisü no Aghungu Kimthe lono alovilu no pi, “Atsütsü ayeghi Mpeu, Apuo, I no O sheqhe akeu ye Nono alokütsümi ngo kighithimi launo thime hipaqo küsüve no itimi kititiqo lau pephetsü ke; iyei Apuo, kughengu hitoi shikeu no O mlokiqipu ke.

²² I Pu no thokha kümtsü pesü I u lo süve tsüae; Apu likhino thono khumu Anu ye khuu keno mthae, momu Anu, eno khukhumu Pa no piyeni ke kishelu keu likhino thono khumu Apu ye khuu keno mthae.”

²³ Pa no akhopemi lau tsüghüwo lomoshi pi, “Khuno nhethi no nongu no ithulu akeu ithuluni keno akümghapue!

²⁴ Kughengu I no nongu vilo pi anike tungkupmi eno kükami kutomo no nongu no ithulu akeu ithuluni shi eno chilu akeu chiluni shiche, ikemu tishi mlave.”

Samariami Kiviu Kimghikipiye

²⁵ Ghulo lakhi Ayezah shikükau no puthugho no Jisü pejuni ye pi, “Shikükau, ni ye lhokta küxü ighi lunike kiu shimasa kea?”

²⁶ Pa no khochile, “Ayezah lo kiu yepüani kea? No ye kishi philu cheni kea?”

²⁷ Timi huno khochile, “O mlo kuchopu, o ngulho kuchopu, o kumto kümtsü, eno o kükümsü kümtsü pesü Ampeu o Lhou kimiye lo, eno o likhi o toi o kisüghüu kimiye lo.”

²⁸ Jisü no pa vilo pi, “No ye achipi shi khochilevae, hi shilo, eno no ye aküxüpu ithulu nani.”

²⁹ Ikemu timi huno pau no achipiu ipi penishi kehu Jisü vilo pi, “Maye khuu no I kisüghüu kea?”

³⁰ Jisü no khochile, “Timi lakhi no Jerusalem lono Jericho lo iqiche kelo küpkami u lo ilove, panongu no pa phikümsa likhi thono qhoi püka luvetsü, eno akithikumo shi heqhipe qhive no cheve.

³¹ Achinemi lakhi tipa la lo cheghi, ikemu kughou timi hu ithulu keno, ala tüxau no mxüsü wuve.

³² Levimi lakhi ghi lo-i titoi shi, kughou pa no ighi no ithulu keno pa ghi ala tüxau no wuve.

³³ Ikemu Samariami lakhi no tipa la lo cheke lono tile ighilu, eno kughou pa no timi hu ithulu keno, pa ye ighono amlo saqhiyive.

³⁴ Pa no timi hu lamlu, pa zakuqo lo thazü eno atsaizü süno khavetsü; tishino paw lhoxü shou puku no timi hu sawo inaki lo qhino tucho.

³⁵ Thoghiu pa no denarius kini pesü inaki mpeu tsüno pi, ‘Pa tucholo, eno kiu kiumu nono ala puwove keu ye I no ideighi kelono o loveni.’

³⁶ No ye hi pano küthü dolo khikhiu no küpkami u lo ilove keu timi lau akisüghüu kuchoue pi phulu ani kea?”

³⁷ Ayezah shikükau no pi, “Kimiyekini piye keu noe.” Jisü no pa vilo pi, “Wuno titoi shilo.”

Martha ngo Mary

³⁸ Jisü no paqomi sasü chekelo aphu lakhi lo ilo. Tile Martha ipikeu totimi huno li kilo Jisü sasü.

³⁹ Li tsünipu lakhi Mary ipikeu no Ampeu pukhu philo iqa no paw shiküka tsa inia.

⁴⁰ Ikemu Martha ye lokiji ghenguno ito khamla no nughüza Jisü lau ighi no pi, “Ampeu, I likhi no loji peniye I tsünipu no kuchoqhive tsüake No ye alomsü tsümo kea? Li vilo I kuphu tsülo pilo.”

⁴¹ Ikemu Ampeu no khochile, “Martha, Martha, no ye thime kutomo ghenguno nughüza ani,

⁴² ikemu thime lakhi avehupu shi ani. Mary no asaje aloke kishe luvae, eno li launo ti luve tsümo nani.”