Luke 1 - Sumi Naga CL (Re-edited) Bible (BSI)

Theophilus lau Ikhiphekütsü

¹ Timi kutomo no thime jeli ningu lau shikupuve keqo aboake shi kithipe qhitsüni ye yekümla huthuvae,

² ti ye hukuthu lono thopimi eno Atsa sheshumi no ningu lau pikiye süghitsü keu pasü lono ke.

³ Ikehu shishe akiqheu Theophilus, hipa vehu kümtsü idewo abothu lono tsaqütsalei phukide eno küpasülu keu kiqi lono, ni ghi o ghenguno kithikiyi keu yekümla hi shitsüni ke pulolue,

⁴ tishikeu lono o shika piyeve keu laghi kümtsü lo no ye mtsümishei lunani.

Baptiz Kishiu John Punu

⁵ Judea kükau Herod ghuloki lo achinemi lakhi Abijah mqo lo küami, Zechariah ipikeu ache. Pa nipu Elizabeth ye Aaron lagha lono ighi kemi.

⁶ Pama gha Alhou zülo amikuchomi, eno Ampeu zakütsü ngo ayezah kümtsü tukutiye kühano papeche.

⁷ Ikemu Elizabeth no anuhami kehu pama ye anuli kühano ache, eno pama gha kitemi shive.

⁸ Kughou Zechariah mqo kikiphi do ighi keno, pa no Alhou zülo hukuthu kümla shia,

⁹ achine kümlapu lo khuaye kiqi lono Ampeu chineki alou ilo axokütsüngü piti wunike asaqhi kelo pa shou ikughi.

¹⁰ Tile axokütsüngü piti ake tüqhüdo lo kuho kumqo akemi no khalau no akighini shia.

¹¹ Tile Ampeuw kungumi lakhi akiptia ajeu puthugho no pa lau ipeghi.

¹² Kughou Zechariah no pa ithilu keno, akümsa no tsügha luve.

¹³ Ikemu kungumi huno pa vilo pi, “Msa kevilo, Zechariah, kughengu o kighini chiluve tsüae, o nipu Elizabeth no anu lakhi punu nani, eno nono pa je John kutsü nani.

¹⁴ No ye amlokiqi eno alokivi anani, eno kutomo no pa punu lo alovi nani,

¹⁵ kughengu pa ye Ampeu zülo kije shi nani. Pa ye khilemu aji momu shomzü kepu aji kümka yemo nani, eno pa ye aza polo aphi lono Aghungu Kimthe no chhitoi nani.

¹⁶ Pa no Israelmi kutomo sachile sawo Ampeu pano Lhou tsü nani.

¹⁷ Pa no Elijah nguagha eno küka lono apuaza pelo atianuli lau tsüghü ighi, eno hekibidemi pelo amikuchomi laghi lo ighi penike Ampeu züuno wu nani, tishikeu lono Ampeu ghenguno timiqo kutope qhitsü nani.”

¹⁸ Zechariah no kungumi vilo ighiju, “Ni ye kishino hi ithini kea? Kughengu ni eno I nipu ye kitemi shivae.”

¹⁹ Kungumi huno pa khochile, “Ni ye khuu Alhou zülo puthugho cheni keno, Gabriel huke, eno atsakiviu hipau pesü o lau süghi no o pütsa penike I puwue.

²⁰ Julo, nono I tsa khikhi ado achipi lono shikupu nani keno, ti pülümo kehu hipaqo shikupu ke tsala tomoke kutolo no ye atsa pimla no inaqhoi ngove nani.”

²¹ Zechariah no ado süpushu achineki alou auve kehu timiqo ye kishive akeno kümsüju ghi kheae.

²² Kughou pa no ipeghi keno, pa ye timiqo pütsa mlave. Pa no au kulope panoqo tsüake thono atsa ye pimlave, ikehu panongu no pa ye alou ake lono kungunhetsü ithulu kenia pi kiqi luve.

²³ Kughou pa kümlapu do kishekhave keno, pa ye aki lo wove.

²⁴ Ado hami thiu, pa nipu Elizabeth ye mishiuve, eno aqhi pungu dolo li ye ashou ipe move. Li no pi,

²⁵ “Ampeu no timiqo zülono I kukujopu xave tsüniye I shou jupuku no hi mlave tsüae.”

Jisü Punu Azünatha Pi

²⁶ Elizabeth no aqhi akütsüghou lo chekelo, Alhou no Galilee lo Nazareth mishiphu lo kungumi Gabriel puwu,

²⁷ eno ililhothe lakhi Mary lau ighi, li ye David laghami Joseph sasü küsükhave no ache.

²⁸ Kungumi huno li lau ighi no pi, “O Ampeu mlo kuchuu, alovi lo, Ampeu no o gholo ani!”

²⁹ Ikemu li ye ighono amlo pünave no hi ye kiu kiqi tsa shi aghi nani keno kimchi luniye pükapütsa.

³⁰ Kungumi huno li vilo pi, “Msa kevilo, Mary, kughengu no ye Alhou lopu shiluvae.

³¹ Julo, no ye mishiluve no anu lakhi punu nani, eno nono pa je Jisü kutsü nani.

³² Pa ye kije shi nani eno Shishe Akiqheu Nu ipi ku nani. Ampeu Alhou no pa sü David kükalakhü pa tsü nani,

³³ eno pa no pülhapuju Jacob lagha shou ayepe nani, eno pa yekipe ye khilemu kishekhave monani.”

³⁴ Mary no kungumi vilo pi, “Ni ye akimi küha keghi kishino tishi luni kea?”

³⁵ Kungumi no khochile, “Aghungu Kimthe no o shou ikughi nani eno Shishe Akiqheu küka no o nhape ngo nani; ikehu anu punu niye akeu ye Alhou Nu akimtheu ipi ku nani.

³⁶ Julo, no bolomi khuu vilo anuhau ipiche keno Elizabeth hughi ateasü shiu cheke lono anu mishipu luve no hi aqhi akütsüghou lo cheni.

³⁷ Kughengu Alhou gholo ye tokümlapu kiumu kühae.”

³⁸ Mary no pi, “Julo, ni ye Ampeu qemi; o tsa kiqi lono I lau tishi peni.” Kungumi no li launo wuve.

Mary no Elizabeth Xuju

³⁹ Tithiu Mary no mtazü Judea lo ato yeghi lo mishiphu lakhi lo wu,

⁴⁰ eno Zechariah kilo ilo alokivi shi Elizabeth kue.

⁴¹ Kughou Elizabeth no Mary sütsa chilu keno, li polo anu huno ithauve no li ye Aghungu Kimthe no chhitoive,

⁴² li no asütsa kuloghi shi ighamku, “Totimiqo gholo no ye akümghaue, eno o polo kicheu Nu ye akümghaue!

⁴³ Kishino I Mpeu paza no I xuju ighilupe kepu tüqhüdo hipau I lau khaqhitsü kea?

⁴⁴ Kughengu kughou ow pethakütsü I kini lo iloghi keno, I polo anu akeu no alovi ilheuve ke.

⁴⁵ Totimi khuu no Ampeu no pikeu tsa ye shikupu nanie pi pülülu keno akümghapue.”

Maryw Shekiqhe Le

⁴⁶ Mary no pi, “I ngulho no Ampeu sheqhe ani,

⁴⁷ eno I ghungu no Alhou I Xakuluu lau alovi ani,

⁴⁸ kughengu Paw aqhokigheu qeliu shou Pa no jupukue. Ikehu itehi ye tiqheli kümtsü lo ni ye akümghaue pi kuniae;

⁴⁹ kughengu akumtou huno I ghenguno thime kije shive tsüae, Pa je ye akimthe ke.

⁵⁰ Paw kimiyekini ye tiqheli no tiqheli kutolo Pa sümsa chekemi ghenguno ke.

⁵¹ Pa no Pa u mlo lo aküka pephe; amlo alou no qheza chekemi Pa no kutholevae;

⁵² Pa no akumtomi pano kükalakhü lono sünheqhive no akuchuni-a lo akemi süqhevae;

⁵³ Pa no thime kivi pesü athokhami tsüvae, eno kupukuno shi akemi ye Pa no au kümsa puwuvae.

⁵⁴ Pa no Paw kimiyekini kümsüchile luniye Pa qeu Israel kuphuvae,

⁵⁵ ti ye Pa no ni puasü Abraham eno pa tikughukomi vilo alholo ghenguno piqhive keu kiqi lono ke.”

⁵⁶ Tithiu Mary no Elizabeth gholo aqhi küthü qhalo ngo apüzü li kilo idewove.

Baptiz kishiu John Punu

⁵⁷ Elizabeth no küaküzü do tove kelo, li no kiptimi punuve.

⁵⁸ Ampeu no kimiyekini kije piye keu li kisüghümi eno abolomi no chilu püzü li gholo alovi küqha.

⁵⁹ Atsala akütacheu lo panongu no anu phighüyiko ghave tsüniye saghi, eno anu jeu ghi apu tholono Zechariah kutsü niye shi,

⁶⁰ ikemu aza no pi, “Moe, pa je ye John kutsü nani.”

⁶¹ Panongu no li vilo pi, “No bolomi khumu aje hipau ku püamoe.”

⁶² Panongu no anu papu lau au kukulo lono pa ye khuu kutsü penishi ani keno kighinikile.

⁶³ Pa no kiyetupha khu no yetsü, “Pa je ye John.” Panongu kümtsü no akichiqhive.

⁶⁴ Paikhavi no pa kichi eno amili xükhove tsü, eno pa no atsa piluve no Alhou sheqhe thuve.

⁶⁵ Akisüghümi kümtsü lolo msaichi ighive, eno Judea lo ato yeghi kümtsü lo hipa tsa kügha wove.

⁶⁶ Hipa tsa chilu kemi kümtsü no amlo lo xapusü ishi kümsüe, “Imaye anu hipau ye kiu toi nani kelae?” Kughengu Ampeu u no pa gholo ae.

Zechariah Tungkuptsa

⁶⁷ John papu Zechariah ye Aghungu Kimthe no chhitoive no tungkuptsa pithuve,

⁶⁸ “Israel Lhou Ampeu ye sheqhe küzüe, kughengu Pa no Paw timiqo xuju ighi no qhüchile luvae.

⁶⁹ Pa no ni ghenguno Pa qeu David lagha lono timiqo xaluni keu kibo süqheve tsüae,

⁷⁰ ti ye mulhou no Paw tungkupu kimthemi vecheo pike toi

⁷¹ ni ghümi launo eno ni mithi chekemi kümtsü u lono ningu xaluve niye ke.

⁷² Tishikeu lono ni puasü lau piqhi püakeu kimiyekini piye, eno Pa kimthe shoqhi kümsüchile luniye ke,

⁷³ ti ashoqhi Pa no ni sü Abraham lau shikeu ye

⁷⁴ ni ghümi u lono xaphe luve akehu, ningu ye msaichi keu kühano Pa huthu peniye;

⁷⁵ ni küxü tivilo Pa zülo akimthe eno amikucho shipeniye ke.

⁷⁶ Anu, no ye Shishe Akiqheuw tungkupu kepi ku nani; kughengu nono Ampeu züuno pa laghi kuto tsünike wunani,

⁷⁷ paw timiqo xine peve tsükeu lo xakulupu kighithi pesü panoqo loshipütsü tsü nani.

⁷⁸ Ni Lhouw kimiyekini ghenguno inaqhe khetsünhe no atsütsü lono ni shou yepüvü ighi ketoi,

⁷⁹ aküzü eno akithi yekükhü lo akeqo lau aküvü tsü nani, eno aloino keu laghi lo ni pukhu kichetsü ghi wu nani.”

⁸⁰ Anu ye thuwuve no aghungu mtotoi shi ipeghive, eno pa ye Israelmi mishi zülo pekiphe shi ipeghi keu tsala tomoke kutolo yenguyi ke-a lo ache.