LESHELE 99 - Sumi Naga CL (Re-edited) Bible (BSI)Ampeu Ni Lhou ye Akimthe 1 Ampeu no ayepe ani; timi kümtsü no khokhoshilo! Pa ye cherubim shou iqa ani; ayeghi pelo itha pelo! 2 Ampeu ye Zion lo akughushuu ke; Pa ye timiqo kümtsü shou akiqheu ke. 3 Panoqo pelo O je kije eno akughushu sheqhe pelo! Pa ye akimthe ke! 4 Akükau no pa kumto lono kuchou xakütha kimiye cheni. Nono kümtsü lau aghibiu shi; Nono kuchou xakütha süghi eno Jacob lau achipiu mikucho süghike. 5 Ampeu ni Lhou süqhelo; Pa pukhu kinepu lono mllalo! Pa ye akimthe ke! 6 Moses ngo Aaron ye Pa chinemi ke, Samuel ghi Pa je ku inikhu chekemi dolo lakhi ke. Panongu no Ampeu je ku, eno Pa no panoqo khochile. 7 Pano khüngküsü khetsükucho lono panoqo pütsa; panongu no Pa yezah pape eno akhuaye Pa no panoqo tsükeu papeke. 8 O Ampeu ni Lhou, Nono panoqo khochile ke; No ye panoqo lau axine qhikütsü Lhou ke, ikemu panoqo no akumou mlakeu shou amkhükuluu ke. 9 Ampeu ni Lhou sheqhelo, eno Pa kimthe toghi lono mllalo; kughengu Ampeu ningu Lhou ye akimthe ke! |
The Bible Society of India
© 2023, Used by permission. All rights reserved. More
Bible Society of India