LESHELE 97 - Sumi Naga CL (Re-edited) Bible (BSI)

Ampeu no Ayepe ani

¹ Ampeu no ayepe ani, ayeghiqha pelo alovi pelo; züdoyeghi kutomo akeqo pelo alokivishi pelo.

² Khüngküsü eno aküzü kutho no Pa vehomxape ani; amikucho eno kuchou xakütha no Pa yekipe boqhae.

³ Ami no Pa züu shino Pa sümxape akeqo aghümi kümtsü pitiqhi cheni.

⁴ Paw tsütsü kukulo no ayeghiqha yepüvü; ayeghiqha no ti ithulue eno khokho shive.

⁵ Ampeu zülo naghutoqo eno ayeghi kümtsü no aghügha toi ijileve.

⁶ Kungugha no Pa chipiu mikucho pesü sheshu ani eno shiye kümtsü no Pa juküvü ithuluke.

⁷ Khunono panow ameküküha julhoqo pükhüpe qheza acheni keno ajulho mlla chekemi kümtsü akukujo lo süve nani; nongu alhouqo kümtsü no Ampeu mllalo!

⁸ Zion no chilu no alovi ani, eno Judah ngaqo no alokiqi shi ani, ti ye Ow xaküthaqo ghenguno ke, O Ampeu.

⁹ Kughengu, O Ampeu, No ye ayeghiqha kümtsü shou shishe akiqheu; No ye alhou kümtsü shou qhemghai süqheke.

¹⁰ O nongu Ampeu kimiye chekemi, alhoksa mithilo! Pa no Paw akimthemi küxü pükhalu cheni; Pa no küsaküghami u lono panoqo xalu nani.

¹¹ Aküvü no amikuchomi shou yepuku ke, eno amlo kümzümi shou alovi ke.

¹² O nongu amikuchomi, Ampeu lono alovilo, shikimthi keu pesü Pa je kimthe tsülo!