LESHELE 96 - Sumi Naga CL (Re-edited) Bible (BSI)

Akimthe Juküvü lono Mllalo

¹ O Ampeu lau ale kithe lakhi phelo; ayeghiqha kümtsü no Ampeu lau ale phelo!

² Ampeu lau ale phelo, Pa je sheqhelo; tsalakipetsü Paw xakulu ghili pilo.

³ Shiye kümtsü lau Pa juküvü eno timiqo kümtsü vilo Paw akümzapu kümlaqo sheshulo!

⁴ Kughengu Ampeu ye kije eno akiqheu lono sheqhe kepue; alhou kütauqo nguno alau Pa gihu kepue.

⁵ Kughengu timi kütami lhouqo ye ameküküha julhoqo ke, ikemu Ampeu no kungugha lhophe ke.

⁶ Ajuküvü eno akükanguagha ye Pa zülo ani aküka eno jukivi no Pa chineki chhitoi ani.

⁷ Ampeu sheqhelo, O ayeghi lo ashiayeqo, ajuküvü eno aküka pesü Ampeu sheqhelo!

⁸ Ampeu sheqhelo Pa je juküvü sheqhelo; akümllagho peighi lo, eno Pa chineki lo ighilo!

⁹ Akimthe juküvü lono Ampeu mllalo; ayeghiqha kümtsü no Pa zülo khokhoshi lo!

¹⁰ Shiyeqo vilo pilo, “Ampeu no ayepe ani! Iyei, ayeghiqha ye mtotoi ani eno khilemu ithavemo nani; Pa no achipiu xakütha pesü timiqo shou küghatha nani.”

¹¹ Kungugha pelo aloqilu pelo, atsütsü pelo alovilu pelo; azüghi eno tile lhoxü akeqo kümtsü pelo ighamku pelo;

¹² aluza eno tile akeqo pelo alovi igha pelo! Aghasa lo asübo kümtsü no alokivishi

¹³ Ampeu zülo alephe nani, kughengu Pa no ayeghi shou küghathabe nike cheni. Pa no achipiu mikucho lono ayeghiqha shou eno Paw pükhükulu vecheo timiqo shou küghatha nani.