LESHELE 95 - Sumi Naga CL (Re-edited) Bible (BSI)

Ningu Shekiqhe Le Pheni

¹ O ighilo, ningu Ampeu lau ale pheni; ni xakulu tuqu lau alokivi ghügha ighani nolo!

² Shikimthi keu pesü ningu Pa zülo wuni; Pa lau shekiqhe le phepe alokivishi ighani nolo!

³ Kughengu Ampeu ye akughushu Lhou, eno alhou kümtsü shou akughushu Kükau ke.

⁴ Ayeghi kuthoku ye Pa u lo ani; eno naghuto kiqheqo ghi Paw ke.

⁵ Azüghi ye Paw ke, kughengu Pa no ti mlae, eno Pa u no qhaike yeghi kughulho ke.

⁶ O ighilo, ningu itsaqi no Pa mllani; Ampeu ni Lhoküsüu zülo qhoqhünheni nolo!

⁷ Kughengu Pa ye ningu Lhou, eno ningu ye Pa tsüni kümtsha kümzami ke, eno Pa u no tuchomjo chekeu ambe ke. Tsala ishi tsala lo nongu no Pa sütsa chilu aye,

⁸ Meribah eno yenguyike-a Massah lo toi nongu mlo kuthovi kevilo,

⁹ nongu puasüqo ye I kümlaqo ithuluve keghi I ghukeju eno I pejuke.

¹⁰ Ampe lhobidi kutolo I no pano tiqheli jupe I phimqhü eno pi, “Panongu ye pano mlo lono kauve kemi timiqo, eno panongu ye I laghi ithi move.”

¹¹ Tighenguno I loghu lono I no tushoqhive, “Panongu ye I kulhokiqhi-a lo ilolumo nani.”