LESHELE 94 - Sumi Naga CL (Re-edited) Bible (BSI)

Ampeu ye Paw Timi Phevemoe

¹ O Ampeu, amkhükulu Lhou; O amkhükulu Lhou, yepüvü tsü lo!

² Ithulo O ayeghiqha xaküthau; aqheküzami no kiu ithulu küzü keno tsüchile lo!

³ O Ampeu, küsaküghami ye ado khitohi, Küsaküghami ye khitohi alovi anani kea?

⁴ Panongu no pano qheküza tsa piqhi; kixikilami kümtsü no qhezae.

⁵ Panongu no Ow timi munudaqhi ke, O Ampeu, eno O mheghi timiqo ghimeqhi ke.

⁶ Panongu no chimemi eno kicheghüzümi pithive, eno mighimi ghiqhie;

⁷ panongu no pi, “Ampeu ye ithuluamoe; Jacob Lhou ye ithini chemoe.”

⁸ Vethalu lo, O aghüzü anikhami! Mbomzümiqo, kughono nongu ye alotsü luni kea?

⁹ Pa no akini mlasü tsüke, Pa ye chilu moveni keshea? Pa no anhethi mlasü tsüke, Pa ye ithulu moveni keshea?

¹⁰ Pa no shiyeqo ghime cheni, Pa ye panoqo sakiyi moveni keshea? Khuu no akighithi pesü timiqo shika cheni keno—

¹¹ Ampeu huno—timi kükümsü ithi ani, panoqo küxü ye atuthu kishe lakhi toi kepi ithi ani.

¹² O Ampeu, Nono ghasü chekemi, eno O yezah shika chekemi ye alokivipue,

¹³ aveküsa tsala lono Nono akulhokiqhi pa tsü, küsaküghami kitime nike ghenguno aqo lakhi chhuke.

¹⁴ Kughengu Ampeu ye Paw timi phevemo nani Pa ye Pa mheghi qhivemo nani;

¹⁵ kughengu kuchou xakütha ye amikuchomi lau ideighi cheni, eno amlo kümzümi kümtsü no ti pape nani.

¹⁶ Khuu no I ghenguno kixikilami lachile ithughini kea? Khuu no I ghenguno alhoksami lachile ithughini kea?

¹⁷ Ampeu no I kuphu moke aye, I ngulho ye inaqhoi keu yeghi lo mtazü wuve aghini cheke.

¹⁸ Kughou I no, “I pukhu nekipheveni cheni,” ipi kümsü keno, O Ampeu, Ow iqemokeu kikimiye no I sünhelu ke.

¹⁹ Kughou I mlo kütakihi keu no kutomo shive keno, O loinokütsü no I ngulho lopivi tsüe.

²⁰ Küsakügha yepemi khunono achipikumo lono ayezah mla cheni keno panongu ye O sasü visho shilu nani keshea?

²¹ Amikuchomi küxü lachile niye panongu no kuloji kumqo eno pimihami pithive nike xatha cheni.

²² Ikemu Ampeu ye Iw sükusho-a ke, eno I Lhou ye I küghütshü tuqu ke.

²³ Pa no panoqo xine pesü pano shou pechile ighi nani eno panow küsakügha ghenguno pano joleve nani; Ampeu ningu Lhou no panoqo joleve nani.