LESHELE 92 - Sumi Naga CL (Re-edited) Bible (BSI)

O Kümla ye Kije

Sabbath Le

¹ Shikimthi keu Ampeu tsükeu ye aloe, O je sheqhe ale phekeu ye aloe, O Shishe Akiqheu;

² inaqhe no Ow iqemokeu kikimiye, eno putho lono O pükhükulu asheshu,

³ akighilebo eno küghaküsü lebo ghügha pesü eno aheo no müzü keu pesü asheshu keu ye aloke.

⁴ Kughengu, O Ampeu, Nono O kümla vecheo I lopivi tsüke; O u kümlaqo ghenguno I no alokivi shi ale pheni.

⁵ O Ampeu, O kümla ye kiutoi kije kea! O kükümsü ye shishe thonhei ke!

⁶ Küghüzümi ye ithilu chemoe; mbomzümi ye hipau vethaluni chemoe:

⁷ küsaküghami no atsüni toi mini ipeghi aghi namu eno kixikilami no kümtsü ikoishelu aghi namu, panongu ye qhoi kütsaveni keu lo phesüvae;

⁸ ikemu O Ampeu, No ye alholo yepeu ke.

⁹ Kughengu O ghümi julo, O Ampeu, kughengu julo, O ghümiqo ye pühave nani; kixikila shiche kemi ye kümtsü kutholeve nani.

¹⁰ Ikemu aviala toi Nono I kibo süqhe tsüe; thazü anile shi keu pesü Nono I shou lepuku tsüe.

¹¹ I nhethi no I ghümiqo ikiqive keu ithulue; I ghüza niye chekemi kixikilami no aveküsa sholu keu I kini lono chiluvae.

¹² Amikuchomi ye amsabo toi ikoishe cheni eno Lebanon lo cedarbo lakhi toi thuwu cheni.

¹³ Panongu ye Ampeu kilo asübo shosü püake toi nani panongu ye ni Lhou chineki lo ikoishe nani.

¹⁴ Panongu ye kitemi shiveke thiu ghi athi pithi cheni panongu ye pülhapuju xüthilei eno mtotoi ke.

¹⁵ Ampeu ye achipiu kepi asheshu; Pa ye I tuqu, eno Pa lolo ye achipikumo ye kühae.