LESHELE 91 - Sumi Naga CL (Re-edited) Bible (BSI)

Iw Sükusho eno I Liwo

¹ Khuu no Shishe Akiqheuw sükusho lo acheni keno pa ye Akughushuu kicheqho lo cheche nani.

² I no Ampeu vilo pini, “Iw sükusho eno I liwo, I Lhou, I no Pa pükhü cheni.”

³ Kughengu Pa no tuqhou lichhe eno akithipu püsa lono o xalu nani.

⁴ Pa no Pa chishibo pesü o nhaluve nani; eno no ye Pa chishibo qholono sükusho ithulu nani; Paw pükhükulu ye azüto eno süshoyi ke.

⁵ No ye putho lo kichiqhi keu, momu puchou apiji kapuwo keu msavemo nani,

⁶ momu aküzü lo püsa küsü, puchomghü lo kütsakungo keu ye o papemo nani.

⁷ Qhethonhe no o phivilo ikiqi aghiluvi, qhethonhe chighi no o u ajeu aghiluvi, ikemu tipaqo ye o phivilo ighimo nani.

⁸ Nono o nhethi likhi no jupuwu nani eno küsaküghami lochile keu ithulu nani.

⁹ Kughengu nono Ampeu, Shishe Akiqheu, khuu I küghütshü-a keno Pa pesü o kungo-a shiluve ke—

¹⁰ tighenguno küsakügha kiumu o shou ikughi pemo nani, püsa kiumu o phiki phivilo ighimo nani.

¹¹ Kughengu Pa no azah tsüno o ghenguno Paw kungumi puwu tsü nani eno o laghi kümtsü lo o khekuto nani.

¹² Panongu no pano u pesü o khapeqhe luve nani, tishikeu lono o pukhu ye atu lo püsükho lumo nani.

¹³ Nono abongshuu eno tuopighi neda ghi chewu nani; o pukhu no abongshuu lhothe eno apighi qodaqhi nani.

¹⁴ “Kughengu pa no kikimiye kumto lono I tsüqüpe ngoke, I no pa xalu nani; I no pa süsho nani, kughengu pa ye I je ithi ani.

¹⁵ Kughou pa no I kuni keno, I no pa khochile nani; aveküsa lo I no pa gholo anani; I no pa xalu nani eno pa gihu nani.

¹⁶ Axükupushu pesü I no pa ghapiqi tsü nani eno Iw xakulu pa piye nani.”